តាមបញ្ជីឈ្មោះបេក្ខជន ចេញ​ដោយ​នាយកដ្ឋាន​មធ្យម​សិក្សា ចំណេះ​ទូទៅ កាល​ពី​ថ្ងៃ​ទី​០៣ ខែ​តុលា​ដំណាល​គ្នា​នេះ បាន​បង្ហាញ​ថា បេក្ខជន​ចំនួន​១១ ត្រូវ​បាន​ដក​ចេញ​ពី«បេក្ខភាព»​ប្រលង​យក​សញ្ញាបត្រ មធ្យម​សិក្សា​ទុតិយភូមិ លើក​ទី​ពីរ ក្នុង​ឆ្នាំ​២០១៤​នេះ ពី​ចំណោម​បេក្ខជន​២១​នាក់ ដែល​ត្រូវ​បាន​ចោទ​ប្រកាន់ ថា​បាន​ប្រព្រឹត្តិ​កំហុស​ឆ្គង ក្នុង​ពេល​ប្រលង​លើក​ទី​មួយ​ កាល​ពី​ថ្ងៃ​ទី៤ ខែ​សីហា​កន្លង​ទៅ។

បេក្ខភាព​ទាំង​១១នាក់ មាន​មក​ពី​ខេត្ត​បាត់ដំបង​ចំនួន​ប្រាំ​នាក់, មក​ពី​ខេត្ត​កណ្តាល​ពីរ​នាក់ ​ខេត្ត​ស្វាយរៀង​បី​នាក់ មកពីខេត្តរតនគីរីពីរនាក់ ដែល​ក្នុង​ចំណោម​នេះ បេក្ខជន​ខ្លះ​ត្រូវ​ដក​បេក្ខភាព និង​ខ្លះ​ទៀត​បញ្ឈប់​មិន​ឲ្យ​ចូលរួម​ប្រឡង​តែ​ម្តង។ នេះ​បើ​យោង​តាម​បញ្ជី​ឈ្មោះ​បេក្ខជន ចេញ​ដោយ​នាយកដ្ឋាន​មធ្យម​សិក្សា ចំណេះ​ទូទៅ។

លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានបញ្ជាក់តាមសេចក្តី​សម្រេច​ខាងលើដូច្នេះ​ថា៖ «កន្លងមកនៅក្នុងដំណើរការ ប្រលងសញ្ញាបត្រមធ្យមសិក្សា ទុតិយភូមិ សម័យប្រឡងថ្ងៃទី០៤ ខែ​សីហា ឆ្នាំ២០១៤ មានបេក្ខជនមួយចំនួនបានប្រព្រឹត្តខុសឆ្គងរួមមាន បន្លំបេក្ខភាព ឲ្យអ្នកដទៃមកប្រឡង​ជំនួស ប្តូរលេខតុគ្នា និងប្រើប្រាស់ទូរស័ព្ទដៃក្នុងពេលប្រឡង ដែលជាប្រការផ្ទុយ ទៅនឹងបទបញ្ញត្តិ​នៃការ​ប្រឡង ហើយក្រសួងបានសម្រេដាក់កម្រិតវិន័យរួចហើយ។»

យោងតាមបញ្ជីឈ្មោះបេក្ខជន និងចេញដោយនាយកដ្ឋាន មធ្យមសិក្សាចំណេះទូទៅ និងសេចក្តីសម្រេច​របស់លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បេក្ខជនដែលប្រព្រឹត្តខុសឆ្គង នៅពេល​ប្រឡងលើកទីមួយ កាលពីថ្ងៃទី៤ ខែសីហាឆ្នាំ២០១៤ ក្នុងចំណោម២១រូប មានតែ១០នាក់ ប៉ុណ្ណោះដែល​អាច​ប្រលងលើកទីពីរ នាថ្ងៃទីទី១៣ ខែតុលាខាងមុខនេះបាន។ ពួកគេមានកំហុសស្រាល អាចអត់អោនឲ្យ​បាន គឺបានប្រើប្រាស់«ទូរស័ព្ទដៃ»នៅពេលប្រឡង។

រីឯកំហុសឆ្អងរបស់អ្នកទាំង១១នាក់ ដែលបានដកសិទ្ធិ ប្រលលើកទីពីរក្នុងខែតុលាខាងមុខនេះ មានដូចជា​ហាមមិនឲ្យប្រឡង រយៈពេលមួយឆ្នាំព្រោះ«ប្តូរលេខតុ»គ្នា ហាមមិនឲ្យប្រឡងរយៈពេលពីរឆ្នាំ ព្រោះ​«ប្រឡង​ជំនួស»គេ និង«ដកហូត»សិទ្ធិប្រឡងតែម្តង ព្រោះ«បន្លំបេក្ខភាព»។ តាមសេចក្តី​ជួនដំណឹងដដែល មាន​បញ្ជាក់ទាំងឈ្មោះ ខេត្ត និងសាលាដែលបេក្ខជនមានកំហុសឆ្គងទាំងនោះ សិក្សាផងដែរ៕