មតិ៖ យុត្តិសាស្រ្ត នៃការឈ្លានពានខ្មែររបស់យួន តាមរយៈ«ច្រែះស៊ីដែក»
- ដោយ: អ៊ុម វ៉ារី ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញ ថ្ងៃទី១៨ សីហា ២០១៤
- កែប្រែចុងក្រោយ: August 28, 2014
- ប្រធានបទ: ទឹកដី
- អត្ថបទ: មានបញ្ហា?
- មតិ-យោបល់
-
ម្ចាស់គណនេយ្យហ្វេសប៊ុកមួយរូប លោក ហុង សុខ (Hong Sok) បានធ្វើការបកស្រាយពី «ហេតុនិងផល» ដែលអាចនាំឲ្យមាន«ច្រែះស៊ីដែក»នេះ ដោយបានយក«លំហូរ» នៃជនអន្តោប្រវេសន៍វៀតណាមចូលកម្ពុជា ដោយសេរី និងគ្មានវិធានការទប់ស្គាត់ ពីរដ្ឋាភិបាល មកបកស្រាយ និងពន្យល់យ៉ាងក្បោះក្បាយ។ ប្រិយមិត្តហ្វេសប៊ុករូបនេះ បានសរសេរថា៖ «បច្ចុប្បន្ននេះ ប្រទេសវៀតណាម កំពុងផ្ដើមប្រើយុទ្ធសាស្រ្ដច្រែះស៊ីដែក ជាលើកទី៤ តាមរយៈការបំភ្លៃប្រវត្តិសាស្រ្ត ខ្មែរកម្ពុជាក្រោម»។
នៅក្នុងការពិពណ៌នាជាបន្ត លោក ហុង សុខ បានទទួលស្គាល់ថា លោក ហូ ជីមិញ គឺជាអតីតថ្នាក់ដឹកនាំកំពូលរបស់ប្រទេសវៀតណាម ដែលបានដឹកនាំ ឲ្យប្រទេសនេះមានភាពរឹងមាំ ក្នុងការបន្តឈ្លានពានយកទឹកដីកម្ពុជា។ ដើម្បីពង្រឹងនូវអំណាចរបស់ខ្លួន លោក ហូ ជីមិញ បានបង្រៀនជនជាតិរបស់ខ្លួន ចេះប្រើនូវយុទ្ធសាស្រ្ត«ច្រែះស៊ីដែក»ជាមួយកម្ពុជា។ លោក ហុង សុខ បានលើកជាចំណោទថា តើអ្នកណាខ្លះដែលលោក ហូ ជីមិញ ចាត់ទុកថាជា«ដែក»? យួនសេរី ចិន ខ្មែរកូនកាត់សម្បុរស ឬ? អ្វីជាដែក? លោកបានពន្យល់ថា «ដែក»ជាមុខសញ្ញាដែលលោក ហូ ជីមិញ តំរូវអោយអ្នក«នយោបាយ»យួន ធើ្វការ«កំទេចចោល»។
ការការពារ យុទ្ធសាស្ត្រច្រែះស៊ីដែក...
លោកបានពន្យល់ តាមបែបគីមីវិទ្យាទៀតថា «ដែក» កាលណាត្រូវខ្យល់ ឬប៉ះសំណើម ក្នុងខ្យល់នោះ មានន័យថា ដែកកំពុងត្រូវបានតោង និងចាប់ផ្តើមស៊ីដោយ«ច្រែះ»ហើយ។ តើធ្វើយ៉ាងណា ដើម្បីការពារបាននូវដែកទាំងនោះ ពីការស៊ីរបស់ ច្រែះបាន? ក្នុងហេតុផលនេះ លោក សុខ ហុង បានលើកឡើងថា ត្រូវ«លាប»ថ្នាំការពារច្រែះនោះ។ សម្រាប់កម្ពុជា តើអ្វីជាថ្នាំដែលមានឥទ្ធិពល លាបលើដែកមិនឲ្យមានច្រែះស៊ីបាន? លោក ហុង សុខ បានឆ្លើយខ្លួនឯងថា ត្រូវតែអនុវត្តច្បាប់អន្តោប្រវេសន៍ ឲ្យមានប្រសិទ្ធិភាព។
ហេតុអ្វីបានជាមនុស្សទាំងនោះ នឹងអាចកើតច្រែះ? អ្នកណាជាអ្នកបង្កវាឡើង? លោក ហុង សុខ បានឆ្លើយថា គឺជាអ្នកដែលបង្កើត ឬបង្កឲ្យមាននូវ«ហឹង្សា» ដោយខ្មែរ នៅក្នុងប្រទេសខ្មែរខ្លួនឯង។ លោក បានសរសេរថា៖ «ខ្ញុំបានមើលឃើញថា យួនបានចាប់ផ្ដើមប្រើយុទ្ធសាស្រ្ដ ច្រែះស៊ីដែកលើកទី១ គឺក្នុងរបប លន់ ណុល។ របបនេះបានសំលាប់ជនអន្ដោប្រវេសន៍ ធ្វើអោយយួនកុម្មុយនីសទទួលបានជោគជ័យ ក្នុងការអនុវត្ដន៍យុទ្ធសាស្រ្ដច្រែះស៊ីដែក។»
លោក ហុង សុខ បានសរសេរទៀតថា៖ «លើកទី២ ក្នុងរបបខែ្មរក្រហម យួនកុម្មុយនីស ទទួលបានជោគជ័យដោយប្រើក្រុមច្រែះស៊ីដែក ដែលបង្កប់ក្នុងជួរកម្មាភិបាលខ្មែរក្រហម យួនទទួលបានជោគជ័យ។ និងលើកទី៣ ក្រោយឆ្នាំ១៩៧៩ ដោយអោយខ្មែរសម្បុរខ្មៅ ហៅចិន និងខ្មែរកូនកាត់សម្បុរស ថា៣៥១ (...) លុះដល់ឆ្នាំ១៩៨៥ ដោយយួនកុម្មុយនីស មើលឃើញថាយុទ្ធសាស្រ្ដ«ច្រែះស៊ីដែក» មិនដំណើរការ ក៏បានបង្កើតអោយមាន ក៥ ដើម្បីសំលាប់ខ្មែរ និងយួនសេរី បានជោគជ័យទៀត។»
«ឥលូវយួនកំពុងចាប់ផ្ដើម ប្រើជាលើកទី៤ ហើយដោយបង្វែរប្រវត្តិសាស្រ្ដកម្ពុជាក្រោម ក្នុងគោលបំណងញ៉ុះញ៉ុង អោយខ្មែរអ្នកជាតិនិយម មានកំហឹងចំពោះយួនកុម្មុយនីស ដែលអាចឈានទៅដល់ការប្រកាន់ពូជសាសន៍សារជាថ្មី។»
ដើម្បីទប់ទល់យុទ្ធសាស្រ្ដច្រែះស៊ីដែក របស់យួនកុម្មុយនីស ជាពិសេសរបស់លោក ហូ ជីមិញ នោះ លោក ហុង សុខ បានឲ្យយោបល់ថា យុវជនស្នេហាជាតិ មិនត្រូវធ្វើបាតុកម្ម មុខទូតយួន ឬក៏ដុតទង់ជ័យយួនឡើយ ព្រោះនោះ នឹងអាចនាំទៅដល់អំពើហឹង្សា ហើយយួនកុម្មុយនីស នឹងប្រើក្រុមច្រែះស៊ីដែករបស់វា ដែលកំពុងកាន់អំណាច អោយចាប់ក្រុមយុវជនដាក់គុក ដោយស្របច្បាប់ ឬឈានទៅសម្លាប់ចោល ថែមទៀត។
ប៉ុន្តែលោក ហុង សុខ បានបន្ថែមយោបល់ របស់លោកដូច្នេះថា «យុវជនសេ្នហាជាតិ ត្រូវងាកមកធ្វើបាតុកម្មឲ្យរដ្ឋាភិបាល អនុវត្តច្បាប់អន្តោសប្រវេសន៍វិញ (...) មិនត្រូវឲ្យរដ្ឋាភិបាល ពន្យារពេលអនុវត្តច្បាប់អន្ដោរប្រវេសន៍ទៀតឡើយ»៕