បុរសជាឪពុក ដែលបានអះអាងថាខ្លួនភ្លេចទារករបស់ខ្លួនអាយុ២២ខែ នៅក្នុងរថយន្ដរហូតស្លាប់នោះ ទំនងជាបាន​ធ្វើរុករកចង់ដឹង តាមបណ្ដាញអាំងធើណែត ពីរបៀបរស់នៅក្នុងពន្ធនាគារ។ បុរស ថែមទាំងបានទស្សនារូបភាព​វីដេអូជាច្រើន បង្ហាញពីសត្វដែលស្លាប់ ដោយសារទុកនៅក្នុងរថយន្ដ ចតចោលកណ្ដាលថ្ងៃ នោះផងទៀត មុននឹង​ថ្ងៃកើតហេតុបានមកដល់។ តើឪពុករូបនេះ មានផែនការសម្លាប់ទារកខ្លួនឬ?

ឪពុក ដែលជាប់សង្ស័យ និងកូនប្រុសដ៏កំសត់ នៅមុនពេលស្លាប់។ (រូបភាពនគរបាល)

ទស្សនាវដ្ដីមនោរម្យ.អាំងហ្វូ ស្វែងរកព្រឹត្តិការណ៍ដ៏កម្រៗក្នុងលោក មកជូនប្រិយមិត្តអ្នកអានរបស់ខ្លួន។

ហួសប្រមាណ - មិនដឺងថា តើនេះជាសុបិន្ដអាក្រក់ ឬជាបំណងរបស់ឪពុករួបនេះឡើយ។ លោក ជូស្ទីន អារីស (Justin Harris) ជាតិ​អាមេរិកាំង អាយុ៣៣ឆ្នាំ ត្រូវបានចោទប្រកាន់ ថាបានទុកឲ្យទារករបស់ខ្លួន ដែលទើប​នឹង​មានអាយុ២២ខែ រហូត​ដល់ស្លាប់នៅក្នុងរថយន្ដ ដែលចតចោលកណ្ដាលថ្ងៃក្ដៅហែង អស់រយៈពេលជាង៧ម៉ោង។ ទារក កូព័រ (Cooper) ត្រូ​វបានដាក់ឲ្យអង្គុយនៅក្នុងកៅអីសម្រាប់ទារក ចង់ខ្សែក្រវ៉ាត់ ទៅនឹងកៅអីក្រោយ​របស់​រថយន្ដ ខណៈឪពុកររបស់ខ្លួន បានចាកចេញទៅធ្វើការបាត់ឈឹង។

ឪពុកបានថ្លែងសារទុក្ខ ថាខ្លួនគ្មានកំហុស និងអះអាងថា នោះជាឧប្បទេវហេតុប៉ុណ្ណោះ។ លោក ជូស្ទីន អារីស បានភ្លេចថា កូនរបស់លោក នៅអង្គុយនៅកៅអីក្រោយរបស់រថយន្ដ ហើយទើបតែដឹងខ្លួន នៅពេលលោក​បាន​ត្រឡប់មករករថយន្ដវិញ ពេលល្ងាចឡើងប៉ុណ្ណោះ។ លោកនិយាយថា លោកបានងាកមើលក្រោយ នៅប៉ុន្មាន​នាទីក្រោយ បន្ទាប់ពីបានចូលមកកាន់ចង្កូតរថយន្ដ ទើបដឹងថា កូនលោកបានផុតជីវិតទៅហើយ។

ប៉ុន្តែ ... សម្រាប់ក្រសែភ្នែករបស់ប្រព័ន្ធយុត្តិធម៌អាមេរិកាំង វាមិនមែនត្រឹមតែជាភាពចៃដន្យ អញ្ចឹងពេកទេ ...

ចំណុចសង្ស័យដ៏គួរឲ្យភ្ញាក់ផ្អើលជាច្រើន បានធ្វើឲ្យចម្លើយរបស់ឪពុកខាងលើ បាត់បង់នូវសុពលភាពរបស់វា។  បើតាមភ្នាក់ងារនគរបាល បានឲ្យដឹងថា ដំបូងឡើយនៅថ្ងៃកើតហេតុ ជនសង្ស័យបានផ្ញើរសារអាសអាភាស និងរូបភាពពិសេសៗ ទៅកាន់ស្ត្រីចំនួន៦នាក់ ក្នុងនោះមានក្មេងស្រីជំទង់អាយុ១៦ឆ្នាំម្នាក់ផង។ នៅក្នុង​ម៉ាស៊ីន​កំព្យូទ័រយួរដៃ របស់បុរសជាឪពុករូបនេះ អ្នកស៊ើបអង្កេតបានរកឃើញ ពីទិន្នន័យរុករកជាច្រើន ទាក់ទងនឹង«ជីវិត​គ្មានកូន» «របៀបរស់នៅក្នុងពន្ទនាគារ» និងទស្សនាវីដេអូជាច្រើន ដែលនិយាយពី«សត្វស្លាប់ នៅក្នុងរថយន្ដ​ដែលចតកណ្ដាលថ្ងៃចេស»ជាដើម។

អាក្រក់ជាងនេះទៅទៀត អ្នកស៊ើបអង្កេតបានតាមដានមើលរូបភាពវីដេអូ ដែលថតទៅលើចំណតរថយន្ដ ដោយ​សហគ្រាសដែលលោក ជូស្ទីន អារីស ធ្វើការនោះ ហើយបានឲ្យដឹងថា លោក អារីស បានត្រឡប់មករថយន្ដវិញ នាវេលាថ្ងៃត្រង់ ដើម្បីទម្លាក់ម្ហូបចំណីដែលខ្លួនបានទិញ នៅលើកៅអីបើកបររបស់រថយន្ដ។ ចំណុចសង្ស័យ​មួយ​ទៀត ដែលគួរឲ្យបារម្ភដែរ គឺទារករបស់ ហារីស មានការធានារ៉ាប់រងជីវិត ដល់ទៅពីរ។ ប័ណ្ណធានារ៉ាប់រងមួយ ពី​ក្នុង​ចំណោមនោះ មានសំណងរហូតដល់ទៅ ២ម៉ឺនដុល្លារ។

នគរបាលទទួលបន្ទុកស៊ើបអង្កេត ករណីនេះ បានថ្លែងទៀតថា ពីរនាក់ប្ដីប្រពន្ធ មានលក្ខណៈដូចធម្មតា នៅពេល​ដែលពួកគេដឹងពីមរណភាពរបស់ទារក កូព័រ។ នាងជាម្ដាយ ឈ្មោះ ឡេណា (Leanna) ថែមទាំងបានសួរជជីកទៅប្ដី លោក ជូស្ទីន អារីស ក្រែងលោជនសង្ស័យ បាននិយាយជ្រុលមាត់ នៅក្នុងការសួរចម្លើយ របស់នគរបាលនោះ​ទៀតផង។

បុរសជាប្ដី ដែលមិនត្រូវបានអនុញ្ញាតឲ្យនៅក្រៅឃុំ តាំងពីថ្ងៃកើតហេតុមកនោះមក  ត្រូវបានចោទប្រកាន់​នៅថ្ងៃ​ឡើងសវនាការ ពីបទប្រព្រឹត្តិអំពើព្រៃផ្សៃ ទៅលើកូនរបស់ខ្លួន និងឧក្រិដ្ឋកម្មមនុស្សឃាត។ ចៅក្រម ហ្វ្រេខ ឃុក (Frank Cox) បានប្រកាសនៅបន្ទាប់ពីសវនាការកាលពីថ្ងៃទី៣ ខែកក្កដានេះ ក្នុងរដ្ឋចចារ (Georgia) ភាគអាគ្នេយ៍ នៃសហរដ្ឋអាមេរិកថា៖ «វាជាសំនុំរឿងមួយ ដែលទោសប្រហារជីវិត ទំនងជាត្រូវបានអនុវត្តន៍»៕