ទំព័រហ្វេសប៊ុក I Love Cambodia Hot News ទាំងពីរធ្លាក់ប្រជាប្រិយ
នៅពេលថ្មីៗនេះ ទំព័រហ្វេសប៊ុកដ៏ល្បីឈ្មោះ I Love Cambodia Hot News ដែលមានអ្នកចូលចិត្តតាមដាន ជាង៣០០ពាន់នាក់ និង I Love Cambodia Hot News II មានអ្នកចូលចិត្តតាមដាន ជាង២០០ពាន់នោះនោះ បានធ្លាក់ចំនួនអ្នកគាំទ្រ ជាពិសេសទៅលើការបង្ហោះរូបភាព និងព័ត៌មានទាន់ហេតុការណ៍ជាច្រើន ដែលខុសប្លែកពីមុន ដែលទំព័រនេះមានការគាំទ្រច្រើនពីយុវជន និងអ្នកប្រើប្រាស់បណ្តាញហ្វេសប៊ុក។ តើបញ្ហានេះបណ្តាលមកពីអ្វី?
រូបគម្របរបស់ទំព័រដ៏ល្បីទាំងពីរ។ (រូបថតផ្តិតពីហ្វេសប៊ុក)
ហ្វេសប៊ុក - ទំព័រហ្វេសប៊ុកបង្ហោះផ្សាយព័ត៌មានកម្ពុជាដ៏ល្បី នៅក្នុងបណ្ដាញសង្គមហ្វេសប៊ុក ដែលគេស្គាល់ភាគច្រើននោះ គឺ I Love Cambodia Hot News និង I Love Cambodia Hot News II នោះ បានស្គាល់ការធ្លាក់ចុះ នូវប្រជាប្រិយភាពរបស់ខ្លួនយ៉ាងខ្លាំង នៅក្នុងរយៈកាលចុងក្រោយនេះ។ ទំព័រហ្វេសប៊ុក ដែលត្រូវបានគេស្គាល់តាមរយៈការផ្តល់ព័ត៌មានសង្គមទាន់ហេតុការណ៍ និងរិះគន់រដ្ឋាភិបាល ថ្មីៗនេះ មានចំនួនអ្នកចូលចិត្តតាមដាន (Like) ថមថយ និងពេលខ្លះ ថែមទាំងបានធ្លាក់ចុះយ៉ាងច្រើននោះទៀតផង។
លោក អេង ពន្លក អតីតអ្នកគ្រប់គ្រងទំព័រ I Love Cambodia Hot News ដែលតែងតាមដានពីទំព័រល្បីទាំងពីនេះ បានសរសេរលើទំព័ររបស់ខ្លួនថា៖ «ពីមុនទំពរ័ I Love Cambodia Hot News បានជួបរឿងធ្លាក់ចំនួន Like ពេលនេះទំពរ័ I Love Cambodia Hot News II កំពុងតែជួបរឿងបែបនេះដែរ។ ប៉ុន្មានថ្ងៃចុងក្រោយនេះ ទំពរ័ I Love Cambodia Hot News II បានធ្លាក់ចំនួន Like យ៉ាងច្រើន ដែលកំនើនចំនួន Like ក្នុងមួយសប្តាហ៌ធ្លាក់ពីជាង ៧០០ មកនៅត្រឹមតែជាង ១០០ ហើយចំនួននេះនឹងធ្លាក់ចុះជាចំនួនអវិជ្ជមាននាពេលខាងមុខ។ ទោះបីអ្នកគ្រប់គ្រងទំពរ័ និង អេដមីន (Admin) ទំពរ័ទាំងអស់ ប្រឹងផុស (Post) ប៉ុណ្ណាក៏ដោយ ក៏មិនអាចទប់ការធ្លាក់ចុះ នេះបានដែរ។»
លោក អួន វណ្ណសាក់ ម្ចាស់គ្រប់គ្រងទំព័រI Love Cambodia Hot News II ក៏ទទួលស្គាល់ពីបញ្ហានេះដែរថា៖ «ខ្ញុំអត់លុយប្រម៉ូត (Promot) ទេ តាមវាសនាទៅចុះ»។
ឆ្លើយតបនឹងការធ្លាក់ចុះ នៃចំនួនអ្នកគាំនេះដែរ លោក អួន វណ្ណសាក់បានអះអាងថា៖ «អ្នកគាំទ្រ មិនធ្លាក់ទេ។ ទាំងអស់នេះ មកពីក្រុមហ៊ុនហ្វេសប៊ុក ចង់អោយយើងដាក់លុយប្រម៉ូត»។ ក្រុមហ៊ុន ហ្វេសប៊ុក ដែលបង្កឲ្យបណ្ដាអ្នកចូលចិត្តតាមដាន មិនសូវមើលឃើញការចុះផ្សាយរបស់ទំព័រលោក។ អ្នកគ្រប់គ្រងទំព័ររូបនេះ បានបន្តថា៖ «ក្រុមខ្ញុំ នៅតែបន្ដសកម្មភាពរហូត មិនរាថយទេ» បើទោះបីអ្នកចូលចិត្តតាមដាន មិនមើលឃើញ ការចុះផ្សាយរបស់ក្រុមនោះក៏ដោយ។
ផ្ទុយពីកាលើកឡើងរបស់ ម្ចាស់ទំព័រ ដែលមាននិន្នានាការទៅរកគណបក្សប្រឆាំងខាងលើនេះ ប្រិយមិត្តមួយរូប ដែលដាក់ឈ្មោះនៅលើបណ្ដាញហ្វេសប៊ុកថា Kin Nha Junior និងជាអ្នកធ្លាប់គាំទ្រការបង្ហោះរូបភាព និងវីដេអូរបស់ ទំព័រហ្វេសប៊ុកទាំងនេះ បានសរសេរថា «ខ្ញុំផ្អាក like ពីព្រោះទំព័រ I Love Cambodia Hot News II នេះ ច្រើនតែចោទប្រកាន់គេ ពុំមានមូលដ្ឋានច្បាស់លាស់ ដូចជាពេលដែលចោទប្រកាន់ កញ្ញា ធី សុវណ្ណថា ជាដើម (...) ខ្ញុំក៍ធ្លាប់ចាំថាលោក អេង ពន្លក ក៍ធ្លាប់ចោទប្រកាន់ កញ្ញា ធី សុវណ្ណថា ដែរ។ ការចោទប្រកាន់គេដោយពុំមានមូលដ្ធានច្បាស់លាស់ គឺវាធ្វើឱ្យប្រជាប្រិយភាពខ្លួនឯងធ្លាក់ចុះ។»
សម្រាប់ប្រិយមិត្តម្នាក់ទៀត ឈ្មោះ Lychee Cambodia បានយល់ថា ការធ្លាក់ប្រជាប្រិយភាពនេះ ដោយសារតែយុវវជន និងតារាហ្វេសប៊ុកមួយចំនួន មិនចាប់អារម្មណ៍នឹងរឿងនយោបាយទៀត ដែលមានតែរឿងដដែលៗ បង្កការធុញទ្រាន់សម្រាប់អ្នកលេង៕
---------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២៦ មេសា ២០១៤