យន្ដហោះបាត់ខ្លួន ត្រូវបានប្រព័ន្ធចាប់រលកអាកាសថៃ មើលឃើញ?
របកគំហើញថ្មីទៀត ដែលអាចធ្វើឲ្យការស៊ើបអង្កេត ទៅលើយន្ដហោះបាត់ខ្លួនមានការប្រែប្រួល។ នោះគឺប្រព័ន្ធចាប់រលកអាកាស របស់កងទ័ពថៃ បានមើលឃើញនូវយន្ដហោះ នៅក្នុងដែនអាកាសរបស់ខ្លួន ដែលទំនងជាយន្ដហោះប៊ូអីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ។ ការមើលឃើញនេះ បានកើតឡើង នៅ៦នាទី ក្រោយពីប្រព័ន្ធទំនាក់ទំនង របស់យន្ដហោះបាត់ខ្លួន ត្រូវបានកាត់ផ្ដាច់។ នេះបើតាមការប្រកាសរបស់ អ្នកនាំពាក្យកងទ័ពថៃ លោក ម៉ុងថុល ស៊ូជោកន (Montol Suchookorn) នៅលើបណ្ដាញទូរទស្សន៍ ស៊ីអ៊ិនអ៊ិន (CNN)។
ចំណុចសង្ស័យដែលយន្ដហោះអាចនឹងចុះចត នៅក្នុងមហាសមុទ្រឥណ្ឌា។ (រូបថត Google Map)
បាត់យន្ដហោះ - អ្នកនាំពាក្យកងទ័ពថៃ លោក ម៉ុងថុល ស៊ូជោកន បានបញ្ជាក់នៅក្នុងកិច្ចសម្ភាសជាមួយទូរទស្សន៍អាមេរិកថា យន្ដហោះបានហោះត្រឡប់មកក្រោយវិញ សំដៅទិសដៅទៅភាគខាងលិច។ ប្រទេសថៃមិនបានចែករំលែកព័ត៌មាន ឲ្យបានឆាប់ជាងនេះ ព្រោះ«គ្មាននរណា» ស្នើសុំខ្លួនជាលក្ខណៈពិសេស។
«ត្រូវការអន្តរាគមន៍ពីអ្នកជំនាញ ដើម្បីយល់ ...»
អ្នកនាំពាក្យបានសារភាពទៀតថា «យើងមិនបានចាប់អារម្មណ៍ ឲ្យបានច្រើនជាងនេះទេ ព្រោះកងទ័ពអាកាសរបស់ថៃ ធ្វើការពិនិត្យតែហេតុការណ៍ ដែលខ្លួនយល់ថា ជាការគម្រាមដល់ប្រទេសរបស់យើងប៉ុណ្ណោះ។ ដូច្នេះ អ្វីដែលមិនធ្វើឲ្យយើងគិតថាជាការគម្រាមនោះ យើងគ្រាន់តែមើល ហើយមិនបានធ្វើអន្តរាគមន៍ទេ។»
យ៉ាងណាក៏ដោយ ក៏លោក ម៉ុងថុល ស៊ូជោកន បានបន្តពន្យល់ទៀតថា នៅថ្ងៃទី៨ ខែមីនា យន្ដហោះបានធ្វើការហោះហើររបស់ខ្លួន តាមលំហរអាកាស ម៉ាឡាកា។ ប្រព័ន្ធចាប់រលកអាកាសមួយ របស់ប្រទេសម៉ាឡេស៊ី បានមើលឃើញយន្ដហោះនេះ។ «វាត្រូវការអន្តរាគមន៍ ពីសំណាក់អ្នកជំនាញ ដើម្បីយល់ពីរឿងនេះ»។
តើពេលណាដែលយន្ដហោះ ត្រូវបានមើលឃើញនៅពេលចុងក្រោយបំផុត?
ជើងហោះហើរ MH370 ដែលដឹកមនុស្ស ២៣៩នាក់ នៅលើយន្ដហោះនោះ បានហោះចេញពីរដ្ឋធានីកូឡាឡំពួរ នៅម៉ោង០និង៤០នាទីរំលងអាធ្រាត យប់ថ្ងៃសុក្រចូលមកថ្ងៃសៅរ ទី៨ ខែមីនា។ បន្ទាប់មកប្រព័ន្ធទំនាក់ទំនងរបស់យន្ដហោះ បានឈប់លែងដំណើរការ ឬត្រូវបានកាត់ផ្ដាច់ នៅម៉ោង១និង២០នាទី។
អ្នកនាំពាក្យបានបន្តសន្និដ្ឋានថា «រលកសញ្ញា ដែលយើងទទួលបាន មិនមែនជារលកសញ្ញាធម្មតានោះទេ។ វាជារលកសញ្ញានៃយន្ដហោះមួយ នៅវេលាម៉ោង ១ និង២៨នាទី ដែលកំពុងហោះនៅក្នុងទិសដៅផ្ទុយ ពីទិសដៅធម្មតាពីជើងហោះហើរ MH370។ រលកសញ្ញាបែបនេះ មិនត្រូវបានយើងចាប់បានរាល់ថ្ងៃឡើយ ហើយវាក៏មិនបានប្រាប់ពីទិន្នន័យនៃ អត្តសញ្ញាណនៃជើងហោះហើរនោះដែរ។»
------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី១៨ មីនា ២០១៤