ទន្ទឹមនឹងការជួបពិភាក្សាព្រមព្រៀងគ្នាបង្កើត គណៈកម្មការចម្រុះ ដោយមានសមាសភាពស្មើគ្នា ដើម្បីរៀបចំ​ក្រប​ខណ្ឌ​កំណែទម្រង់ការបោះឆ្នោត នាពេលខាងមុខ គណបក្សសង្រ្គោះជាតិ ក៏ស្នើអោយមាន​ការដោះលែង​អ្នកដែល​កំពុងជាប់ឃុំនៅពន្ធនាគារ ទាំង២១នាក់ផងដែរ។

កិច្ចប្រជុំរវាងគណបក្សប្រជាជនកម្ពុជា និងគណបក្សសង្គ្រោះជាតិ ថ្ងៃទី១៨ ខែកុម្ភះ ឆ្នាំ២០១៤ នាវិមានព្រឹទ្ធសភា។ (រូបថត MONOROOM.info/ O. Vary)

ប្រព័ន្ធយុត្តិធម៌ - ថ្លែងនៅក្នុងសន្និសិទកាសែត បន្ទាប់ពីជំនួបចរចារវាងគណបក្សរវាងទាំងពីរ នៅថ្ងៃទី១៨ ខែកុម្ភៈ ឆ្នាំ២០១៤ នៅវិមានព្រឹទ្ធសភា លោក ស៊ុន ឆ័យ ប្រធានក្រុមការងារគណបក្សសង្គ្រោះជាតិ បាននិយាយថា​គណបក្សសង្រ្គោះជាតិ ចង់អោយមានការដោះលែងអ្នកទាំង ២១នាក់ ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាម។

លោកបន្តថាក្នុងពេលឆាប់ៗនេះ គណបក្សសង្រ្គោះជាតិនឹងទៅមើលជនជាប់ឃុំទាំងនោះ ក្នុងពន្ធនាគារម្តងទៀត ដែលលោកនឹងជ្រើសរើសចំថ្ងៃ ដែលមិនមែនជាថ្ងៃសៅរិ៍ និងថ្ងៃអាទិត្យ ដោយសារកន្លងមក​ប្រធានពន្ធនាគារ​មិន​អនុញ្ញាតអោយចូលទៅមើល ព្រោះជាថ្ងៃសៅរិ៍ និងថ្ងៃអាទិត្យ។ លោកបានបន្តបញ្ជាក់ជំហរ​របស់គណបក្សប្រឆាំង ដូច្នេះថា «បើមានការដោះលែងអ្នកទាំង២៣នាក់ អោយនៅក្រៅឃុំវា នឹងកាន់តែបង្កបរិយាកាសល្អថែមទៀត ទៅ​ដល់ការខិតខំប្រឹងប្រែងក្នុងការរកដំណោះស្រាយ ដែលជាផលប្រយោជន៍ជាតិអោយបានឆាប់រហ័ស»។

ឆ្លើយតបភ្លាមៗទៅនឹងការលើកឡើងរបស់មន្ត្រីគណបក្សប្រឆាំងខាងលើនេះ លោក ព្រុំ សុខា រដ្ឋលេខា​ធិការ​ក្រសួង​មហាផ្ទៃ និង​ប្រធានក្រុមការងារគណបក្សប្រជាជនកម្ពុជា បានចាត់ទុកថា សំនុំរឿងអ្នកទាំង២១នាក់ ជា​សមត្ថកិច្ច​របស់តុលាការ ដូច្នេះគឺតុលាការ​ជាអ្នកសម្រេច។ យ៉ាងណាក៏ដោយ ក៏មន្ត្រីតំណាងឲ្យគណបក្សប្រជាជនកម្ពុជា និង​តំណាង​ឲ្យក្រសួងមហាផ្ទៃ នៅតែបង្ហាញតម្រុយថា «បញ្ហាដែលនៅសេសសល់យើងនឹងបន្តធ្វើទៀត តែ​យើងចង់​ឃើញអ្វីៗ នាំមកនូវបរិយាកាសដែលមានការជឿទុកគ្នា ដើម្បីឈានទៅបញ្ចប់បញ្ហាអោយបានឆាប់ ហើយ​មធ្យោបាយ​ដែលល្អបំផុត គឺការដោះស្រាយសន្តិវិធីតាមរយៈការចរចា»។

ពាក្យសម្ដីរបស់មន្ត្រីរដ្ឋាភិបាលរូបនេះ ទំនងជាចង់ឲ្យក្រុមប្រឆាំងប្រើប្រាស់ការជួបជជែកជាមួយរដ្ឋាភិបាល ឬ​គណបក្សប្រជាជនកម្ពុជា ហើយបញ្ជៀសនូវការប្រមូលផ្ដុំគ្នាធ្វើបាតុកម្ម។ បាតុកម្ម​ដែលកន្លងមក បានឈានទៅ​ដល់ការផ្ទុះអំពើហិង្សា និងមានការបង្ក្រាបយ៉ាងរង្គាល ទៅលើពួកអ្នកតវ៉ាដែលបានជួបប្រជុំគ្នាធ្វើបាតុកម្ម ដោយ​សន្តិវិធីនោះ។

ចំពោះបញ្ហានេះដែរ ប្រធានផ្នែកបច្ចេកទេសស៊ើបអង្កេត នៃអង្គការលីកាដូ លោក អំ សំអាត ធ្លាប់បានអោយដឹងថា ការឃុំខ្លួនអ្នក​ទាំង​២៣នាក់នោះ ជារឿងលាបពណ៌អោយជាប់ទាក់ទងនឹងបញ្ហានយោបាយ។ លោកបញ្ជាក់​ផង​ដែរ​ថាគណបក្ស​នយោបាយទាំងអស់ មិនគួរយកជនទាំង២៣នាក់នោះ ធ្វើជាឧបករណ៍នយោបាយនោះទេ។

គួរបញ្ជាក់ អ្នកទាំង២៣នាក់ដែលកំពុងឃុំខ្លួននៅពន្ធនាគារត្រពាំងផ្លុងនោះមាន លោកវន់ ពៅ ប្រធានសមាគម​ប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ឋ (IDEA) លោក ចាន់ ពុទ្ធិស័ក្ត ជាតំណាងសហគមន៍បឹងកក់ លោកថេង សាវឿន ប្រធានបណ្តាញកសិករ និងកម្មករចំនួន២០នាក់ទៀតដែលបានចូលរួមធ្វើបាតុកម្ម ទាមទារប្រាក់ឈ្នួល​គោល១៦០ដុល្លាក្នុងមួយខែ។ ពួកគាត់ទាំងនោះត្រូវបាន ចាប់ខ្លួន កាលពីថ្ងៃទី២ និងទី៣ ខែមករា នៅតំបន់​សេដ្ឋកិច្ច​ពិសេសភ្នំពេញ និងនៅមុខសួនឧស្សាហកម្មកាណាឌីយ៉ាផ្លូវវ៉េងស្រេង។ នៅថ្ងៃទី៨ កុម្ភៈ កម្មករ២នាក់ត្រូវបានដោះ​លែងអោយនៅក្រៅឃុំ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ១៨ ខែកុម្ភៈ ឆ្នាំ២០១៤