សហភាពសហជីពពាណិជ្ជកម្មអន្តរជាតិ ថាប្រាក់ឈ្នួលកម្មករគួរឡើងដល់ ២៦០ដុល្លារ
នាពេលពលករជាច្រើន បាននាំគ្នាធ្វើបាតុកម្មដើម្បីតំឡើងប្រាក់ខែ ឲ្យដល់១៦០ដុល្លា រហូតដល់មានការបង្ក្រាប ដោយហិង្សា ពីសំណាក់កងអាជ្ញាធរប្រកបដោយអាវុធនោះ មន្ត្រីមួយរូបពីសហភាពសហជីពពាណិជ្ជកម្មអន្តរជាតិ បានធ្វើដំណើរមកប្រទេសកម្ពុជា ដើម្បីជួបជាមួយមន្ត្រីពាក់ព័ន្ឋក្នុងក្រសួងការងារ ក្នុងគោលបំណងដើម្បី ពិភាក្សាជុំវិញបញ្ហាព្រឹត្តិការណ៏ហិង្សាទាំងឡាយ ដែលកើតមានចំពោះពលករកម្ពុជា។ មន្ត្រីរូបនេះបានថ្លែងថា ប្រាក់ឈ្នួលដែលកម្មករនិងគ្រួសារគេអាចរស់បាន គួរតែទទួលបានរហូតដល់ ២៦០ដុល្លារ។
លោក ជៀប វើណេន ជាអគ្គលេខាធិការរង សម្រាប់ដោះស្រាយទំនាស់ទូទៅនៃ សហភាពសហជីបពាណិជ្ជកម្មអន្តរជាតិ។ (រូបថត MONOROOM.info/ Senghong)
វិបត្តិការងារ - លោក ជៀប វើណេន (Jaap Wienen) ជាអគ្គលេខាធិការរង សម្រាប់ដោះស្រាយទំនាស់ទូទៅនៃ សហភាពសហជីពពាណិជ្ជកម្មអន្តរជាតិ បានថ្លែងនៅមុខក្រសួងការងារ បន្ទាប់ពីកិច្ចពិភាក្សាជាមួយមន្ត្រីពាក់ព័ន្ឋ ត្រូវបានបញ្ចប់នាវេលាម៉ោង៤ល្ងាច ថ្ងៃទី១៣ ខែមករា ឆ្នាំ២០១៤ថា លោកបានជំរុញដល់មន្ត្រីដែលពាក់ព័ន្ឋក្នុងបញ្ហានេះ ឲ្យគិតគូឡើងវិញ អំពីអំពើហិង្សាកើតឡើងដោយសារការចង់តម្លើងប្រាក់ឈ្នួល របស់កម្មករកម្មការី និងគិតគូឡើងវិញ ចំពោះបញ្ហាកោះហៅលោករ៉ុន ឈុន ចូលតុលាការនាថ្ងៃទី១៤ ខែមករា ឆ្នាំ២០១៤ ។
ក្រោយពីចេញពីក្រសួងការងារ លោក ជៀប វើណេន បានធ្វើអំពាវនាវតាមរយៈអ្នកសារព័ត៌មាន ទៅដល់រដ្ឋាភិបាលនូវចំណុចមួយចំនួន ដោយយោងតាមបទពិសោធន៏ដូចជា៖
ទី១. នាយករដ្ឋមន្ត្រី គួរសិក្សាស្រាវជ្រាវឲ្យបានស៊ីជម្រៅ ជុំវិញបញ្ហាទាំងឡាយទាក់ទង និងប្រជាពលរដ្ឋចំពោះការតំឡើងប្រាក់បៀវត្សរ៍ និងការគោលបំណងរបស់ប្រជាពលរដ្ឋ បើមិនដូច្នេះទេ អំពើហិង្សាប្រាកដជាមិនអាចបញ្ចប់បានឡើយ។
ទី២. លោកស្នើរសុំដល់លោកនាយករដ្ឋមន្ត្រី ធ្វើការដោះលែងជនជាប់ឃុំទាំង២៣នាក់ យ៉ាងឆាប់បំផុតតាមដែលអាចធ្វើទៅបាន
ទី៣. លោកស្នើរសុំដល់លោកនាយករដ្ឋមន្ត្រី បញ្ឃប់ការហៅលោករ៉ុន ឈុន ចូលតុលាការនាថ្ងៃនេះ។
ចំពោះព្រឹត្តិការណ៏ខាងលើនេះ លោកបាននិយាយថា នឹងធ្វើរបាយការណ៏មួយ ទៅសមាគមតំណាងថៅកែរោងចក្រ ជីម៉ាក (GMAC) និងប្រាប់ពិភពលោកឲ្យបានដឹង ពីរឿងរ៉ាវទាំងឡាយ ដែលកើតមានជុំវិញបញ្ហាពាណិជ្ជកម្ម និងបញ្ហាការងារនៅកម្ពុជា។
លោកបានបញ្ជាក់ថា ប្រាក់បៀវត្សរ៍១០០ដុល្លានេះ មិនគ្រប់គ្រាន់ចំពោះពលករ និងគ្រួសាររបស់ពួកគេ ដើម្បីការរស់នៅបានដោយស្រួលទេ នាពេលបច្ចុប្បន្ននេះ។ លោកបានជំរុញដល់រដ្ឋាភិបាល ធ្វើការគិតគូរដល់ប្រាក់ខែ របស់ពលករដោយតម្លើងឲ្យពួកគេ យ៉ាងតិច២៦០ដុល្លា ព្រោះវាមិនមែនប្រើសម្រាប់តែគិតគូរ ចំពោះពលករតែម្នាក់ទេ ប៉ុន្តែត្រូវគិតគូរទាំងក្រុមគ្រួសាររបស់ពួកគេទាំងអស់ ជាពិសេសដូចជាការលើកស្ទួយចំពោះកុមារជាដើម។
ទស្សនាវដ្ដីមនោរម្យព័ងអាំងហ្វូ មិនអាចទាក់ទងមន្ត្រីក្រសួងកាងារ របស់ប្រទេសកម្ពុជា បាននៅឡើយ រហូតមកទល់ថ្ងៃទី១៤ ខែមករានេះ។ តែលោក ហ៊ុន សែន នាយករដ្ឋមន្ត្រីកម្ពុជា នៅថ្ងៃអង្គារទី១៤ ខែមករានេះ ថ្លែងនៅចំពោះមុខនាយករដ្ឋមន្ត្រីវៀតណាមថា ប្រាក់បៀវត្សរ៍របស់កម្មករនៅប្រទេសវៀតណាម មានជាង១០០ដុល្លារតែប៉ុណ្ណោះ ហើយប្រាក់ឈ្នួលនៅកម្ពុជា ខ្ពស់ជាងប្រទេសឥណ្ឌា បេងក្លាដេស ឡាវ និងប្រទេសមីយ៉ាន់ម៉ា។
លោក ហ៊ុន សែន បានថ្លែងដូច្នេះថា៖ «ទារមួយប្រឹប (ប្រាក់ឈ្នួលកម្មករកម្ពុជា) ឡើងដល់ណា បើវាអត់មានលុយ? យើងធ្វើបន្តិចម្តងៗ ចេញពីស្ថានភាពដ៏លំបាក។ អ្នកណាធ្វើនាយករដ្ឋមន្ត្រីឬមេដឹកនាំ មិនចង់ឲ្យប្រជាជន មានជីវភាពខ្ពស់? ប៉ុន្តែលទ្ធភាពរបស់ប្រទេស ទៅរួច ឬទៅមិនរួច?»
ដោយឡែក លោករ៉ុង ឈុន ប្រធានសហភាពសហជីពនៅកម្ពុជា ដែលមានវត្តមាននៅមុខក្រសួងការងារ នៅពេលតែមួយដែរនោះ បានសំដែងនូវ សុទិដ្ឋិនិយមចំពោះវត្តមានរបស់លោក ជៀប វើណេន និងក្រុមការងាររបស់លោក ដែលបានគិតគូចំពោះបញ្ហាហិង្សាលើកម្មករនេះ ព្រមទាំងបញ្ជាក់ថា វត្តមានរបស់លោក ពិតជាសារៈសំខាន់ណាស់ សម្រាប់ការផ្លាស់ប្តូរប្រព័ន្ឋការងារនៅកម្ពុជា៕
--------------------------------------
ដោយ ក. សេងហុង (ទំនាក់ទំនង៖ [email protected]) - ភ្នំពេញ ថ្ងៃ១៤ ខែមករា ឆ្នាំ ២០១៤