ពន្លឺនៃដំណោះស្រាយ និងការតាមចាប់ជនដៃដល់ ដែលបានប្រើ«ហិង្សា» មកលើពលរដ្ឋអ្នកភូមិបឹងកក់ កាលពីយប់ថ្ងៃ​ទី២២ ខែកញ្ញា នៅរមណីដ្ឋានវត្តភ្នំ និងការដង្ហោយហៅឲ្យអាជ្ញាធរជួយការពារ ឃ្លាំមើលពីសុវត្តិភាព អាយុ​ជីវិតរបស់​សកម្មជនដីធ្លីទាំងនេះ នៅមិនទាន់បានលេចចេញ ឲ្យឃើញជារូបរាងនៅឡើយ។ ទាំងនេះជាមូលហេតុជំរុញឲ្យ ក្រុម​ពលរដ្ឋទាំងនោះ បានដាក់បន្ថែមទៀតនូវភស្ដុតាងទាំងឡាយ ដែលពួកគេទទួលបាន ទៅកាន់ស្ថាប័នពាក់ព័ន្ធ​ជាបន្តទៅ​ទៀត ក្នុងនោះមានសាលាដំបូងរាជធានីភ្នំពេញ និងអគ្គស្នងការនគបាលជាតិ។

ទិដ្ឋភាពនៃការតវ៉ា របស់ពលរដ្ឋអ្នកភូមិបឹងកក់ នៅមុខសាលាដំបូងរាជធានី ថ្ងៃទី៣១ខែតុលាឆ្នាំ២០១៣។ (រូបថត MONOROOM.info/ O.Vary)

រាជធានីភ្នំពេញ - តាមការអះអាងរបស់តំណាងប្រជាពលរដ្ឋ បានថ្លែងឲ្យដឹងថា  លិខិតពីរដោយឡែកពីគ្នា ដែលមានផ្តិត​មេដៃចំនួនប្រាំបួននាក់ លិខិតមួយដាក់ទៅសាលាដំបូងរាជធានីភ្នំពេញ និងមួយទៀតដាក់ទៅអគ្គស្នងការនគបាលជាតិ  ដើម្បីបញ្ជាក់ឡើងវិញពីទុកលំបាក និងបញ្ហា ដែលបានកើតឡើងនាពេលកន្លងមក ទៅលើពួកគេ។ លិខិតទាំងពីរនេះ បាន​ធ្វើ ខណៈដែលក្រុមពលរដ្ឋទាំងនោះ បាននាំគ្នាមកជួបជុំគ្នានៅមុខសាលាដំបូងរាជធានីភ្នំពេញ កាលពីព្រឹកថ្ងៃទី៣១ ខែតុលានេះ។

ក្នុងលិខិតមួយដែលបានដាក់ទៅ អគ្គស្នងការនគបាលជាតិ បានសរសេរថា ប្រជាពលរដ្ឋសហគមន៍បឹងកក់ បានរងនូវការ​គំរាមកំហែង ការប្រើហិង្សាតាមរយៈការវាយ ទាត់ធាក់ ការឆក់(ឆក់នឹងដំបងឆក់) ការចាប់ខ្លួនជាដើម។ លិខិតនេះបាន​សរសេរបន្តរថា «ពាក្យបណ្តឹងរបស់យើងខ្ញុំដែលបានដាក់ទៅតុលាការ មិនដែលមានចំណាត់ការម្តងណាឡើយ។ (...) ឯអ្នកបឹងកក់ក៏កំពុងស្ថិតក្នុងស្ថានភាពគ្រោះថ្នាក់ គ្មានសុវត្ថិភាព ក្រោមការប៉ុនប៉ងធ្វើបាប និងសំលាប់នៅគ្រប់កន្លែង​ពី​សំណាក់ឈ្មួញទុច្ចរិត មន្រ្តីពុករលួយ និងកងកម្លាំងប្រដាប់អាវុធរបស់រាជរដ្ឋាភិបាល។»

អ្នកស្រី ស៊ុង ស្រីលាភ បានបញ្ជាក់ប្រាប់ទស្សនាវដ្តីមនោរម្យព័ងអាំងហ្វូថា ពាក្យបណ្តឹងដែលបានដាក់ ទៅកាន់សាលា​ដំបូងរាជធានីភ្នំពេញនៅថ្ងៃទី១១ ខែតុលានោះ មានតែពាក្យបណ្តឹងជនរងគ្រោះ និងសាក្សី។ អ្នកស្រីបន្ថែមថា ថ្ងៃនេះ​ក្រុមអ្នក​បឹងកក់ ត្រូវដាក់សំណុំឯកសារបន្ថែម ពាក់ព័ន្ធនឹងជនដៃដល់ ហើយស្នើឲ្យស្ថាប័នតុលាការ ក៏ដូចជាអគ្គស្នងការ​នគរបាល​ជាតិ ជួយដោះស្រាយ ជំរុញ និងចាប់ខ្លួនជនទាំងនោះ មកផ្តន្ទាទោសតាមច្បាប់។

លោកព្រះរាជអាជ្ញារងសាលាដំបូងរាជធានីភ្នំពេញ មាស ច័ន្ទពិសិដ្ឋ ដែលបានទទួលសំណុំរឿងនេះ ទស្សនាវដ្តីមិន​អាច​ស្នើសុំការបំភ្លឺបានទេ តែលោក រចនា ដែលជាក្រឡាបញ្ជីទទួលបន្ទុករឿងនេះបានបញ្ជាក់ថា សំណុំរឿងអ្នកបឹងកក់​បាន​ទទួល និងកំពុងរៀបចំណាត់ការ ទៅតាមនីធីវិធីហើយ។ ចំពោះការកោះហៅភាគីដែលពាក់ព័ន្ធ មកធ្វើការសាកសួរ​បន្ថែម​នោះ មិនទាន់ដឹងពេលវេលាច្បាស់លាស់ទេ ព្រោះរឿងនេះកំពុងតែស្ថិតក្នុងការស៊ើបអង្កេតបន្ថែម។ លោកបញ្ជាក់យ៉ាង​ដូច្នេះថា «លោកព្រះរាជអាជ្ញា បានចាត់ឲ្យអគ្គស្នងការនគបាលជាតិ ធ្វើសារស៊ើបអង្គេតបន្តរ»។

លោក សេក ភូមី មិនអាចសុំការបំភ្លឺបានទេក្នុងល្ងាចនេះ ព្រោះលោកកំពុងជាប់ប្រជុំ។ តែលោកបានបញ្ជាក់កាល​ពីព្រឹក​ថ្ងៃដដែល ក្រោយពេលទទួលសំណុំឯកសារពីខាងតំណាងអ្នកភូមិបឹងកក់ថា លោកតំណាងឲ្យអគ្គស្នងការនគបាលជាតិ ទទួលយកសំណុំឯកសារទាំងនេះ ជូនទៅថ្នាក់ដឹកនាំ ដើម្បីពិចារណា និងចាត់វិធានការ។ លោកបន្តរថា «ខ្ញុំមិនអាច​បញ្ជាក់អ្វីផ្សេងក្រៅពីនេះបានទេ។ ខ្ញុំមកសម្របសម្រួល និងទទួលយកឯកសារទាំងនេះ ជូនថ្នាក់ដឹកនាំចាត់ការ​តាម​ច្បាប់»។

ទោះជាយ៉ាងនេះក្តី អ្នកស្រី ស៊ុង ស្រីលាភ ក៏បានបង្ហាញពីការជឿជាក់ និងមិនអស់សង្ឃឹមចំពោះការស្វែង​រកយុត្តិធម៌​នោះទេ។ អ្នកស្រីបន្ថែមថា «តុលាការស្រុកខ្មែរ គាត់នឹងឯករាជ្យឡើងវិញ ហើយក្នុងអាណត្តិទីប្រាំនេះ ពួកគាត់​(តុលាការ) នឹងមានការកែគំនិត កែឧត្តមគតិ នឹងធ្វើការបំរើប្រជាពលរដ្ឋ ស្វែងរកយុត្តិធម៌ជូនប្រជាពលរដ្ឋ។ (...) ជាពិសេស​អគ្គស្នងការនគរបាលជាតិក៏នឹងធ្វើការបំរើប្រជាពលរដ្ឋ និងស្វែងរកយុត្តិធម៌ជូនប្រជាពលរដ្ឋឡើងវិញ ព្រោះតែមួយរយៈ​កាលកន្លងមកនេះប្រជាពលរដ្ឋដែលបានធ្វើការតវ៉ា តែងតែរងនូវភាពអយុត្តិធម៌យ៉ាងខ្លាំង (ដូចជាការបង្ក្រាបដោយ​កម្លាំងសមត្ថកិច្ច តាមរយៈការប្រើប្រាស់អំពើហិង្សា និងប្រព័ន្ធតុលាការមិនយុត្តិធម៌ជាដើម)៕»

-----------------------------------------------
ដោយៈ អ៊ុម វ៉ារី - ភ្នំពេញថ្ងៃទី៣១ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ