គ្រូបង្វឹកជម្រើសជាតិតោកំណាចអង់គ្លេស លោករ៉យ ហ៊ដសិន (Roy Hodgson) បានព្រមានដល់ខ្សែប្រយុទ្ធក្រុម​ម៉ែនឆេស្ទើ យូណៃធីត (Manchester United) វ៉ែន រ៉ូនី (Wayne Rooney) ថាគាត់អាចនឹងបាត់បង់ដំណែងជម្រើសជាតិ បើសិនជាគាត់មិនបានលេង ជាប់ជាជម្រើសដំបូង នៅក្នុងក្រុមជម្រើសជាតិរបស់គាត់។

កីឡាករដ៏ល្បីឈ្មោះ វ៉ែន រ៉ូនី ដែលទាត់នៅក្រុមបាល់ទាត់​ម៉ែនឆេស្ទើ យូណៃធីត។ (រូបថត AP)

សេចក្តីរាយការណ៏មួយ បានឲ្យដឹងថា រ៉ូនី គាត់ក៏មានការព្រួយបារម្មណ៏ដូចគ្នា ព្រោះតែនៅក្នុងក្រុមម៉ែនញូ គាត់ជា​ជម្រើសទី២ បន្ទាប់ពីខ្សែប្រយុទ្ធហូឡង់ រ៉ូបីន វ៉ាន់ផឺស៊ី (Robin van Persie) ទើបគាត់ទទូចចង់ចាកចេញ ខណៈដែលក្លិប​ឆែលស៊ី (Chelsea) កំពុងតែចង់បានរូបគាត់ស្រាប់ផង។ ប៉ុន្តែទោះជាយ៉ាងណា ម៉ែនញូ បានបដិសេធការដេញថ្លៃ​ចំនួន​២លើក របស់ក្រុមតោខៀវរួចមកហើយ។

លោករ៉យ ហ៊ដសិន ក៏មានការឈឺក្បាលខ្លាំងណាស់ដែរ ចំពោះភាពរកាំរកូសរបស់ខ្សែប្រយុទ្ធរ៉ូនី ជាមួយនឹងក្រុមម៉ែនញូ ហើយគាត់និយាយថា គាត់ពិតជាពិបាកជ្រើសរើសយករ៉ូនីណាស់ បើសិនជាគាត់ មិនបានចូលលេងឲ្យក្រុមម៉ែនញូ ជា​ជម្រើស១១នាក់ដំបូងឲ្យបានទៀតទាត់ និងលេងឲ្យបានល្អទេនោះ។

បុរសសញ្ជាតិអង់គ្លេស វ័យ៦៦ឆ្នាំ បាននិយាយថា៖ «វាជារឿងល្អមួយ សម្រាប់គ្រូបង្វឹកក្រុមជម្រើសជាតិ នៅពេលដែល​កីឡាកររបស់ពួកគេ កំពុងតែលេងឲ្យក្លិបបានទៀតទាត់ និងលេងបានល្អ។ ប៉ុន្តែវាជាការព្រួយបារម្មណ៏ដ៏ធំមួយ នៅពេល​ដែលកីឡាករសំខាន់ៗរបស់ពួកគេជាច្រើន ពុំសូវបានបង្ហាញខ្លួនចូលលេងឲ្យក្លិប។»

គួរបញ្ជាក់ថា រ៉ូនី ក៏បានជាប់ឈ្មោះនៅក្នុងក្រុមជម្រើសជាតិអង់គ្លេសដែរ ក្នុងការប្រកាសឈ្មោះកាលពីថ្ងៃព្រហស្បតិ៏ បើ​ទោះបីជាខ្សែប្រយុទ្ធរូបនេះ ទើបតែជាសាសស្បើយពីរបួសក៏ដោយ។ ក្រុមតោកំណាច អង់គ្លេស នឹងត្រូវប្រកួតសាកជើង​មិត្តភាព ជាមួយនឹងក្រុមជម្រើសជាតិស្កុតឡែន នៅថ្ងៃពុធសប្តាហ៏ក្រោយ។

លោក រ៉យ ហ៊ដសិន ក៏បាននិយាយទៅកាន់ កីឡាករ (រ៉ូនី) និងគ្រូបង្វឹកក្រុមម៉ែនញូ លោកដេវីដ ម៉យ (David Moyes) រួចហើយដែរ ដោយគាត់និយាយថា ខ្សែប្រយុទ្ធវ័យ ២៧ឆ្នាំ ចាំបាច់ត្រូវតែចូលលេងជាជម្រើស១១នាក់ដំបូងដាច់ខាត ដើម្បីក្រុមជម្រើសជាតិអង់គ្លេស។

វ៉ែន រ៉ូនី ជាខ្សែប្រយុទ្ធជើងចាស់ និងជាកីឡាករចំបងមួយរូប របស់ក្រុមជម្រើសជាតិអង់គ្លេស។ ខណៈដែលបាល់ទាត់​ពិភពលោក នឹងបើកយុទ្ធនាការនៅឆ្នាំក្រោយ ដូច្នេះទាំងគាត់ និងគ្រូបង្វឹកក៏មានការព្រួយបារម្មណ៏ដូចគ្នា ដរាបណា​អនាគតរបស់គាត់ នៅតែមិនមានភាពច្បាស់លាស់ ជាមួយនឹងក្លិបម៉ែនញូនៅឡើយ។

ខ្សែប្រយុទ្ធក្រុមបីសាចក្រហម រូនី បានចាប់ផ្តើមបង្ហាញខ្លួនឲ្យក្រុមជម្រើសជាតិអង់គ្លេស តាំងតែពីឆ្នាំ២០០៣ ហើយ​រហូត​មកដល់ពេលនេះ គាត់លេងឲ្យក្រុមជម្រើសជាតិបាន ១០ឆ្នាំហើយ។ គាត់ចូលលេងឲ្យក្រុមអង់គ្លេស បាន៨៣ប្រកួត និង​រកគ្រាប់បាល់បញ្ចូលទីបាន ៣៦គ្រាប់៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៩ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ