ខ្សែការពារខូឡូ តូរ៉េ (Kolo Toure) ជឿជាក់ថា ក្រុមហង្សក្រហមលីវើភូល (Liverpool) នឹងអាចប្រជែងយកកៅអី​ឆែមពានលីក (Champions League) នៅរដូវកាលក្រោយ ខណៈដែលពេលនេះ គាត់បានឈានជើងចូលក្នុងកីឡាដ្ឋាន​អេនហ្វៀល (Anfield) ដើម្បីជួយបង្កើតប្រវត្តិសាស្ត្រថ្មីមួយទៀត។

កីឡាករខ្សែការពារ ខូឡូ តូរ៉េ បង្ហាញអាវរបស់គាត់ នៅពេលចូលមកដល់ក្រុមលីវើភូលដំបូង។ (រូបថត liverpoolfc.com)

កីឡាករវ័យ៣២ឆ្នាំ សញ្ជាតិកូឌឺវ័រ បានមកចូលរួមជាមួយលីវើភូល ក្នុងកិច្ចសន្យា២ឆ្នាំ បន្ទាប់ពីគាត់បញ្ចប់កិច្ចសន្យា​ជាមួយ​នឹងក្រុមម៉ែនឆេស្ទើ ស៊ីធី (Manchester City)។

គាត់បាននិយាយថា៖ «យើងចង់ឈ្នះពានរង្វាន់ ប៉ុន្តែយើងក៏ចង់លេងក្នុងក្របខ័ណ្ឌឆែមពានលីកខ្លាំងណាស់ដែរ។ ក្លិបនេះ ជាក្លិបមួយសម្រាប់ឈ្នះ។ ខ្ញុំចង់ក្លាយជាផ្នែកមួយ នៃប្រវត្តិសាស្រ្តនៅទីនេះ។»

តូរ៉េ បានបង្ហាញខ្លួនឲ្យក្រុមម៉ែនស៊ីធី បាន១០២ប្រកួត បន្ទាប់ពីផ្ទេរមកពីក្រុមអាសិណល (Arsenal) ក្នុងតម្លៃ ១៤លាន​ផោន កាលពីឆ្នាំ២០០៩ ហើយគាត់ជាផ្នែកមួយដ៏សំខាន់ ដែលជួយឲ្យម៉ែនស៊ីធី លើកពានព្រីមែលីក (Premier League) កាលពីរដូវកាល២០១១-២០១២ផងដែរ។ ប៉ុន្តែនៅរដូវកាល ២០១២-២០១៣ គាត់បានចូលលេងតែចំនួន ១៨ប្រកួត​ប៉ុណ្ណោះ។

លីវើភូល បានលេងក្នុងក្របខ័ណ្ឌឆែមពានលីកលើកចុងក្រោយនៅឆ្នាំ២០០៩។ ប៉ុន្តែទោះបីជារដូវកាលមុនក្រុមមួយនេះ បានបញ្ចប់ចំណាត់ថ្នាក់ត្រឹមលេខ៧ក៏ដោយ ក៏តូរ៉េ បាននិយាយយ៉ាងជឿជាក់ថា រដូវកាលថ្មីនេះត្រូវតែបញ្ចប់​ក្នុង​ដំណែង​កំពូលទាំង៤ (Top 4) ឲ្យបាន។

តូរ៉េ បាននិយាយថា៖ «ប្រាកដណាស់ យើងចង់បានដំណែងនោះ។ ខ្ញុំគិតថា ជាមួយនឹងកីឡាករល្អៗ ដែលយើងមាន​សព្វ​ថ្ងៃ យើងជឿជាក់ថា នឹងទទួលបានលទ្ធផលល្អនៅរដូវកាលនេះ។ លីវើភូល ធ្លាប់មានប្រវត្តិសាស្ត្រល្អ មានកីឡាករ​ល្អៗ ដែលពោរពេញដោយសមត្ថភាព និងទឹកចិត្ត។»

កីឡាករវ័យចំណាស់រូបនេះ បានបន្តថា៖ «យើងគ្រាន់តែចង់ជួយក្រុមឲ្យទទួលបានភាពជោគជ័យឡើងវិញ ដូចពី​អតីតកាល ដើម្បីឲ្យប្រជែងយកដំណែងកំពូលទាំង៤មកវិញ ឬប្រជែងយកឈ្នះពានរង្វាន់។ ជួយក្លិបឲ្យត្រឡប់ទៅកាន់​ក្របខ័ណ្ឌឆែមពានលីកវិញ ជារឿងដ៏អស្ចារ្យមួយសម្រាប់រូបខ្ញុំ ដែលខ្ញុំចង់ធ្វើឲ្យបាន៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១១ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ