ខ្សែបម្រើក្រុមមេឃខៀវ ម៉ែនឆេស្ទើ ស៊ីធី (Manchester City) យ៉ាយ៉ា តូរ៉េ (Yaya Toure) បាននិយាយថា ក្រុមរបស់គាត់ (ម៉ែន-ស៊ីធី) នឹងអាចឈ្នះពានរង្វាន់ព្រីមែលីក (Premier League) នៅរដូវកាលក្រោយ ខណៈដែលលោក អាឡិច ហ្វឺកឺសិន (Alex Ferguson) គ្រូបង្វឹកក្រុមម៉ែនញូបានចូលនិវត្តន៏។

យ៉ាយ៉ា តូរ៉េ កីឡាកររបស់ ក្រុមមេឃខៀវ ម៉ែនឆេស្ទើ ស៊ីធី។

បន្ទាប់ពីបរាជ័យក្នុងការការពារដំណែងម្ចាស់ជើងឯកព្រីមែលីក ក្រុមម៉ែនឆេស្ទើ ស៊ីធី នឹងត្រូវប្រកួតពានរង្វាន់អេហ្វអេខាប់ (FA Cup) វគ្គផ្តាច់ព្រ័ត្រ ជាមួយនឹងក្រុមវីកែន (Wigan) នៅក្នុងកីឡាដ្ឋាន វ៊ែមប្លី (Wembley) នាថ្ងៃទី១១ ខែឧសភា ស្អែក​នេះ ដោយពួកគេមានសង្ឃឹមយ៉ាងមុតមាំថា ប្រាកដជាអាចលើកពានរង្វាន់នោះ ដើម្បីជាការលួងចិត្ត​ដល់អ្នកគាំទ្រ​របស់​ខ្លួន។

ប៉ុន្តែយ៉ាយ៉ា តូរ៉េ បានសម្លឹងទៅរដូវកាលថ្មីខាងមុខ ដោយជឿថា ក្រុមរបស់គាត់អាចនឹងមានប្រៀបជាងគេវិញ បន្ទាប់​ពី​រដូវ​កាលនេះ លេងយ៉ាងត្រដាបត្រដួស ដោយប្រកួតបានលទ្ធផលស្មើច្រើនពេក ដែលជាហេតុធ្វើឲ្យបាត់បង់​ឱកាស​លើក​ពានរង្វាន់ព្រីមែលីកជាប់គ្នា២ឆ្នាំ។

គាត់បាននិយាយថា «ម៉ែនញូ ជាក្រុមដ៏អស្ចារ្យ ហើយលោក ហ្វឺកឺសិន ជាបុរសដ៏សំខាន់បំផុតសម្រាប់ពួកគេ។ គាត់បាន​ដឹកនាំ នឹងរៀបចំក្រុមម៉ែនញូ បានយ៉ាងល្អបំផុត ដែលធ្វើឲ្យយើងពិបាកក្នុងការទប់ទល់។»

កីឡាករវ័យ២៩ឆ្នាំរូបនេះ បានបន្តថា «ប៉ុន្តែទោះជាយ៉ាងណា រដូវកាលថ្មីក្រុមខ្លាំងផ្សេងៗ ក៏មានការពង្រឹង​សមត្ថភាព​របស់គេបន្ថែមដែរ ហើយយើងនឹងប្រជែងជាមួយក្រុមខ្លាំងៗទាំងនោះ ដូចជា ក្រុមអាសិណល (Arsenal), ឆែលស៊ី (Chelsea), លីវើភូល (Liverpool), ទតិនហេម (Tottenham) និងក្រុមម៉ែនញូ។ ដូច្នេះខ្ញុំគិតថា ព្រីមែលីកជាលីក ដែល​ពិបាកជាងគេ ព្រោះមានក្រុមខ្លាំងៗជាច្រើន។»

ចំពោះការប្រកួតអេហ្វអេខាប់ វគ្គផ្តាច់ព្រ័ត្តនៅថ្ងៃស្អែកនេះ តូរ៉េបាននិយាយថា «យើងបានបាត់បង់ពានព្រីមែលីក ទៅក្រុម​ម៉ែនញូ ដូច្នេះយើងចង់ឈ្នះពានរង្វាន់នេះ។ សម្រាប់យើង យើងចង់ឲ្យឈ្នះពានរង្វាន់រាល់ឆ្នាំ ជូនដល់ក្លឹប និងអ្នកគាំទ្រ​ទាំងអស់គ្នា។»

គាត់បានបន្តថា «ខ្ញុំចង់ក្លាយជាផ្នែកមួយដ៏សំខាន់ នៃប្រវត្តិសាស្រ្តរបស់ក្លឹប។ យើងកំពុងតែចាប់ផ្តើមធ្វើបានល្អហើយ ដូច្នេះយើងត្រូវធ្វើឲ្យកាន់តែល្អថែមទៀត។ វីកែន នឹងមិនឲ្យយើងយកឈ្នះស្រួលៗនោះឡើយ ពួកគេជាក្រុមល្អដែរ ហើយ​មានគ្រូបង្វឹកដ៏ល្អទៀតផង។ ប៉ុន្តែខ្ញុំជឿជាក់ថា ម្ចាស់ជើងឯកអេហ្វអេខាប់ ប្រាកដជា "ម៉ែនឆេស្ទើ ស៊ីធី"៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១០ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ