ក្រុមហ៊ុនណៃ (Nike) និង វ៉ារៀស្ពត (Warrior Sports) កំពុងតែធ្វើសង្គ្រាមដេញថ្លៃគ្នា ខណៈពេលដែលក្រុមហ៊ុន ផលិត​សំលៀកបំពាក់កីឡា របស់អាមេរិកទាំង២នេះ ចង់បានសិទ្ធក្លាយជាអ្នកផលិតសំលៀកបំពាក់ ឲ្យម្ចាស់ជើងឯកព្រីមែលីក (Premier League) ម៉ែនឆេស្ទើ យូណៃធីត (Manchester United) ឬហៅកាត់ថា «ម៉ែនញូ»។

បច្ចុប្បន្ន ម៉ែនឆេស្ទើ យូណៃធីត កំពុងជាប់កិច្ចសន្យាជាមួយក្រុមហ៊ុនណៃ ក្នុងកិច្ចព្រមព្រៀងគ្នាក្នុងតម្លៃ ២៣,៥លាន​ផោនក្នុងមួយឆ្នាំ ហើយកិច្ចសន្យានឹងត្រូវបញ្ចប់ នៅរដូវកាល ២០១៤ -២០១៥។

ឌៀលីមែល (Daily Mail) បានរាយការណ៏ថា ក្រុមបីសាចក្រហម មិនចង់បោះបង់ដៃគូចាស់ (ណៃ) ដែលធ្លាប់សហការ​គ្នាចាប់តាំងពីឆ្នាំ២០០២ មកនោះទេ ប៉ុន្តែបច្ចុប្បន្នពួកគេកំពុងតែត្រូវការចំនួនទឹកប្រាក់ឲ្យបានច្រើនប្រចាំឆ្នាំ ដូច្នេះ​ទើប​ពួកគេត្រូវការក្រុមហ៊ុនមួយណា ដែលហ៊ានឲ្យថ្លៃខ្ពស់ជាងគេ។

វ៉ារៀស្ពត ដែលធ្លាប់បានដេញថ្លៃឈ្នះក្រុមហ៊ុន អាឌីដាស (ADIDAS) ក្នុងការឧបត្ថមក្រុមព្រីមែលីកហង្សក្រហម លីវើភូល (Liverpool) កាលពីរដូវកាលមុនរួចហើយនោះ ពេលនេះកំពុងតែធ្វើការនាំមុខក្រុមហ៊ុនណៃទៀត ជាមួយនឹង​ក្រុមម៉ែនញូ។ ហើយវាត្រូវបានគេជឿថា កិច្ចព្រមព្រៀងថ្មីមួយ នឹងអាចកើតមានឡើង។

ក្រុមហង្សក្រហម លីវើភូល បានព្រមព្រៀងគ្នាជាមួយនឹងក្រុមហ៊ុន វ៉ារៀស្ពត ក្នុងតម្លៃ២៥លានផោន ក្នុងមួយឆ្នាំ ដែល​ជាតម្លៃខ្ពស់ជាងគេបង្អស់ នៅក្នុងប្រវត្តិសាស្រ្តបាល់ទាត់អង់គ្លេស។ ហើយកំណត់ត្រាថ្មីមួយទៀត នឹងកើតឡើង បើសិន​ជាក្រុមហ៊ុនមួយនេះ អាចធ្វើជាដៃគូជាមួយនឹងក្រុម ម៉ែនឆេស្ទើ យូណៃធីត ទៀតនោះ។

ក្រុមហ៊ុន វ៉ារៀស្ពត បានបង្ហាញប្រាប់ដល់ក្លឹបបាល់ទាត់ ម៉ែនឆេស្ទើ យូណៃធីត ថា ពួកគេបានរៀបចំកញ្ចប់​ថវិការមួយ​ដ៏ធំ ដែលគួរឲ្យចាប់អារម្មណ៏ នៅពេលដែលកិច្ចសន្យារបស់ក្រុមហ៊ុនណៃ ត្រូវបានផុតកំណត់។ ហើយពួកគេ ហ៊ានឲ្យ​តម្លៃដល់ក្លឹប អូលត្រាហ្វដ (Old Trafford) មួយនេះ រហូតដល់ ៣០លានផោន ក្នុងមួយឆ្នាំ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៤ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ