Posts in ‘គ្រប់អត្ថបទជាខេមរភាសា’ Category

ហេង លក្ខិណា ត្រូវ​បាន​ចោទ​ប្រកាន់ ពី​បទ​ញុះញង់​ឲ្យ​ប្រព្រឹត្ត​បទ​​ឧក្រិដ្ឋ

ហេង លក្ខិណា ត្រូវ​បាន​ចោទ​ប្រកាន់ ពី​បទ​ញុះញង់​ឲ្យ​ប្រព្រឹត្ត​បទ​​ឧក្រិដ្ឋ

នៅព្រឹកថ្ងៃទី១៣ ខែកក្កដា ឆ្នាំ២០១៧នេះ លោក សៀង សុខ ព្រះរាជអាជ្ញារង នៃអយ្យការអមសាលាដំបូង រាជធានីភ្នំពេញ បានចោទប្រកាន់ស្ត្រី អ្នកប្រើប្រាស់បណ្ដាញសង្គមម្នាក់ ពីបទ«ញុះញង់ឲ្យប្រព្រឹត្តបទឧក្រិដ្ឋជាអាទិ៍» ជុំវិញការលើកឡើង របស់ស្ត្រីវ័យក្មេងរូបនេះ នៅក្នុងវីដេអូផ្សាយផ្ទាល់ លើគណនេយ្យហ្វេសប៊ុករបស់នាងថា ក្រុមគ្រួសារត្រកូល ហ៊ុន ជាអ្នកសម្លាប់ ឬនៅពីក្រោយឃាតកម្ម លោក កែម ឡី អ្នកធ្វើអត្ថាធិប្បាយនយោបាយ ដ៏ល្បីឈ្មោះ។ នេះ បើតាមប្រភពមួយ ពីសាលាដំបូងរាជធានី ដែលបានអះអាងឲ្យដឹង នៅមុននេះបន្តិច។

លោក កែម ឡី ត្រូវបានឃាតករ​បាញ់សម្លាប់ យ៉ាងសាហាវព្រៃផ្សៃ កាលពីថ្ងៃទី១០ ខែកក្កដា ឆ្នាំទៅម៉ិញ នៅខណៈលោកកំពុងទទួលទានកាហ្វេ នៅក្នុងហាងលក់ទំនិញ ស្តាម៉ាត នៃស្ថានីយ​ចាក់ប្រេងឥន្ទនៈ កាល់តិច ស្ថិតនៅស្ដុបបូកគោ។ នៅក្រោយ​ឃាតកម្មនោះ និងរហូតមកដល់ថ្ងៃនេះ ជនសង្ស័យ​តែម្នាក់គត់ ឈ្មោះ អឿង អាង ដាក់រហស្សនាម «ជួប សម្លាប់» ត្រូវបានឃាត់ខ្លួន និងផ្តន្ទាទោស។

ប្រភពពីសាលាដំបូងដដែលនោះ បានអះអាងថា ករណីរបស់ស្ត្រីខាងលើ ត្រូវបានបញ្ជូនជាបន្ត ទៅឲ្យចៅក្រមស៊ើបសួរ ដើម្បីចាត់ការតាមនីតិវិធី។ ប្រភពនោះ បានបញ្ជាក់ទៀតថា ការចោទប្រកាន់ ពីសំណាក់ព្រះរាជអាជ្ញារង បានធ្វើឡើង ដោយយោងតាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។

ស្រ្តី ដែលត្រូវបានគេស្គាល់ នៅលើបណ្ដាញសង្គម ហ្វេសបុក ( Facebook) ដាក់ឈ្មោះ ហេង លក្ខិណា (Heng Leakhena) ត្រូវបានឃាត់ខ្លួននៅចំណុច ចំណត​រថយន្តក្រុង ជិតផ្សារនាគមាស កាលពីព្រឹកម្សិលមិញ ខណៈរូបនាង ត្រៀមឡើងជិះរថយន្ត ទៅកាន់លំនៅដ្ឋានវិញ ក្នុងក្រុងប៉ោយប៉ែត ខេត្តបន្ទាយមានជ័យ។ នេះ បើតាមការអះអាង របស់លោកឧត្តមសេនីយ៍ឯក អ៊ី សុខឃី ប្រធាននាយកដ្ឋាន ប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ។

ស្ត្រី «ហេង លក្ខិណា» បានបង្ហោះវីដេអូផ្សាយផ្ទាល់ខ្លីមួយ នៅលើគណនេយ្យរបស់នាង កាលពីថ្ងៃទី៩ ខែកក្កដា ចេញពីពិធីបុណ្យគម្រប់ខួបមួយឆ្នាំ នៃមរណភាពរបស់លោក កែម ឡី ក្នុងភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ។ នៅក្នុងវីដេអូនោះ ស្ត្រីអ្នកប្រើប្រាស់បណ្ដាញសង្គមរូបនេះ បានថ្លែងចោទលោក ហ៊ុន សែន និងក្រុមគ្រួសារថា ជាអ្នកសម្លាប់ (ឬស្ថិតនៅពីក្រោយឃាតកម្ម បាញ់សម្លាប់) លោក កែម ឡី។

បើទោះជាវីដេអូដ៏អាស្រូវ ត្រូវបានលប់ចេញទៅវិញ​ ក្នុងពេលក្រោយមក​ក៏ដោយ តែវីដេអូនេះ ត្រូវបានអ្នកប្រើប្រាស់បណ្ដាញសង្គមផ្សេងទៀត ទាញចម្លង​ទុក និងបន្ទាប់មក យកមកបង្ហោះឡើងវិញ បណ្ដាលឲ្យមានការចែករំលែក យ៉ាងគគ្រឹកគគ្រេង។

បន្ទាប់ពីត្រូវបានឃាត់ខ្លួន និងសាកសួរអស់ជាច្រើនម៉ោង នៅក្នុងនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃរួច ក្រុមអាជ្ញាធរបានបញ្ជូន «ហេង លក្ខិណា» ទៅកាន់សាលាដំបូងរាជធានី នៅវេលាល្ងាចឡើង ថ្ងៃដដែល (ថ្ងៃទី១២ ខែកក្កដា) តែត្រូវមន្ត្រីតុលាការ ប្រាប់ឲ្យបញ្ជូននាង ត្រឡប់ទៅក្រសួងមហាផ្ទៃវិញ។ រហូតមកដល់ព្រឹកនេះ ទើប «ហេង លក្ខិណា» ត្រូវបាននាំខ្លួន មកកាន់សាលាដំបូងជាថ្មី។

ប្រសិនជាតុលាការ រកឃើញថា មានទោសមែននោះ «ហេង លក្ខិណា» អាចនឹងត្រូវប្រឈម នឹងការផ្តន្ទាទោស ដាក់ពន្ធនាគារ ពី៦ខែ ដល់ ២៤ខែ និងពិន័យជាប្រាក់ ពី១លានរៀល ដល់៤លានរៀល។

ស្ត្រីអ្នកលេងហ្វេសប៊ុករូបនេះ ជាជនទីបួនហើយ បន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិ លោក គីម សុខ អ្នកធ្វើអត្ថាធិប្បាយនយោបាយ និងអ្នកស្រី ឡាក់ ថានី សមាជិកព្រឹទ្ធសភា មកពីគណបក្ស សម រង្ស៊ី ដែលត្រូវបានចោទប្រកាន់ ក្នុងសំនុំរឿង​ប្រហាក់ប្រហែលគ្នា ពីសំណាក់ប្រព័ន្ធយុត្តិធម៌ នៅក្នុងប្រទេសកម្ពុជា។ ប្រព័ន្ធយុត្តិធម៌ ដែលរងការរិះគន់ថា មិនឯករាជ្យ និងរងសំពាធនយោបាយ ពីមន្ត្រីមានអំណាច៕

ហ៊ុន សែន តែង​តាំង​កូន​ប្រុស-​ស្រី​លោក ជា​អនុ​ប្រធាន​គណៈ​កម្មការ​«អន្តរ​ក្រសួង»​រៀបចំ​បុណ្យ

ហ៊ុន សែន តែង​តាំង​កូន​ប្រុស-​ស្រី​លោក ជា​អនុ​ប្រធាន​គណៈ​កម្មការ​«អន្តរ​ក្រសួង»​រៀបចំ​បុណ្យ

នៅពេលនេះ ពាក្យថា«អន្តរក្រសួង» បានសេចក្ដីថា ជា«ក្រសួង + ក្រសួង +  ... + ក្រុមហ៊ុនឯកជន»។ នេះ បើតាមបញ្ជីឈ្មោះមន្ត្រី ទាំង២៨នាក់ មកពីស្ថាប័នចម្រុះ ដែលត្រូវបានចាត់តាំងឡើង ដោយលោកនាយករដ្ឋមន្ត្រី ហ៊ុន សែន ដើម្បីបង្កើតគណៈកម្មការ«អន្តរក្រសួង»មួយ សម្រាប់រៀបចំពិធីបុណ្យអបអរសាទរ ការបញ្ជូល តំបន់ប្រាសាទសំបូរព្រៃគុក ក្នុងបញ្ជីបេតិកភណ្ឌពិភពលោក។

គណៈកម្មការអន្តរក្រសួងមួយនេះ ត្រូវបានបង្កើតឡើង នៅយប់ថ្ងៃទី១២ ខែកក្កដានេះ ដោយមានលោក ប៊ិន ឈិន ឧបនាយករដ្ឋមន្ដ្រីប្រចាំការ និងជារដ្ឋមន្ដ្រីស្ដីទី ទទួលបន្ទុក​ទីស្ដីការ​គណៈរដ្ឋមន្ដ្រី ជាប្រធាន ខណៈលោក ឈិន កេតនា អគ្គលេខាធិការ នៃគណៈកម្មាធិការរៀបចំបុណ្យជាតិ និងអន្តរជាតិ ដែលជាសេនាធិការជំនាញរបស់រដ្ឋ ទទួលបន្ទុក ខាងការរៀបចំកម្មវិធីបុណ្យជាតិធំៗនោះ ទទួលថានៈបានត្រឹម តែជាសមាជិកប៉ុណ្ណោះ។

បន្ទាប់មក គេឃើញមានកូនប្រុសរបស់លោក ហ៊ុន សែន គឺលោក ហ៊ុន ម៉ានី មកពីសហភាពសហព័ន្ធយុវជនកម្ពុជា (ស.ស.យ.ក) ត្រូវបានតែងតាំង ឲ្យមានថានៈនៅក្នុងបញ្ជី ជា«អនុប្រធាន»។ ប៉ុន្តែយ៉ាងហោចណាស់ លោក ហ៊ុន ម៉ានី ជាតំណាងរាស្ត្រមួយរូប ដែលអាចត្រូវបានចាត់ទុក ជាមន្ត្រីរបស់រដ្ឋដូចមន្ត្រីដទៃដែរ។

ផ្ទុយទៅវិញ រឿងដែលគួរឲ្យចាប់អារម្មណ៍បំផុត គឺមន្ត្រីពីរនាក់ មកពីស្ថាប័នឯកជន ត្រូវបានលោក ហ៊ុន សែន តែងតាំងឲ្យមានសមសភាព នៅក្នុងគណៈកម្មការ«អន្តរក្រសួង» ដែលជាផ្នែកមួយ នៃរដ្ឋាភិបាលរបស់លោក។ មន្ត្រីទាំងពីររូប មានម្នាក់ជាកូនស្រីលោក ហ៊ុន សែន គឺអ្នកស្រី ហ៊ុន ម៉ាណា មកពីវិទ្យុនិងទូរទស្សន៍បាយ័ន ដែលមានថានៈនៅក្នុងបញ្ជី ជា«អនុប្រធាន» និងម្នាក់ទៀត គឺលោក ទិត្យ ថាវរិទ្ធ មកពី​ទូរទស្សន៍បាយ័ន ដែលមានថានៈ នៅក្នុងបញ្ជី ជា «សមាជិក»។

ដោយឡែក ក្នុងគណៈកម្មការថ្មីនេះ គ្មានសមាសភាពណាម្នាក់ មកពីក្រសួងព័ត៌មាន ឬពីវិទ្យុ និងទូរទស្សន៍ជាតិ ដែលជាសេនាធិការរបស់រដ្ឋ ទទួលបន្ទុកខាងការផ្សព្វផ្សាយនោះទេ៕




ហ៊ុន សែន ទៅ​ព្យាបាល​ជំងឺ ឬ​ទៅ​ដើរ​កំសាន្ដ?

ហ៊ុន សែន ទៅ​ព្យាបាល​ជំងឺ ឬ​ទៅ​ដើរ​កំសាន្ដ?

ជាការចម្លែកមួយ ដែលលោក ហ៊ុន សែន នាយករដ្ឋមន្ត្រីរបស់ប្រទេសកម្ពុជា បានបង្ហាញពីរូបភាពដើរកំសាន្ដ ជួបជុំស៊ីផឹក ជាមួយក្រុមគ្រួសារ និងមន្ត្រីជិតស្និតរបស់ខ្លួន ខណៈកិច្ចប្រជុំគណៈរដ្ឋមន្ត្រី ដែលទាក់ទងនឹងការដឹកនាំជាតិ ត្រូវបានលើកពេល ពីរសប្ដាហ៍ជាប់ៗគ្នា។ មិនត្រឹមតែប៉ុណ្ណឹង សម័យប្រជុំរដ្ឋសភាកាលពីថ្ងៃចន្ទ ដើម្បីធ្វើវិសោធនកម្ម​លើកទីពីរ ទៅលើច្បាប់ស្ដីពីគណបក្សនយោបាយ ដែលធ្វើឡើងក្រោមបញ្ជា របស់លោកនោះ ក៏គេមិនឃើញវត្តមាន របស់លោក​ចូលរួម​ដែរ។

បើនិយាយទៅ លោក ហ៊ុន សែន មិនបានបង្ហាញមុខជាសាធារណៈ តាំងពីក្រោយថ្ងៃដែលលោកបញ្ជា ឲ្យធ្វើវិសោធនកម្មច្បាប់នេះ និងឲ្យចាត់​វិធានការ លើ «បន្ទប់ស្ថានការណ៍» ពោល គឺលោកបានបាត់មុខ ក្រោយពេលលោកចូលរួមរំលឹកខួប នៃការ​បង្កើត​គណបក្សប្រជាជនកម្ពុជា កាលពីថ្ងៃទី២៨ ខែមិថុនា នៅកោះពេជ្រ។

តើលោកទៅណា? តើការដើរកំសាន្ដ ជួបជុំស៊ីផឹក របស់លោក ហ៊ុន សែន ដែលមានរយៈពេល២សប្ដាហ៍ (រាប់មកដល់ថ្ងៃ ទី១២ ខែកក្កដានេះ) ឬក្នុងរយៈពេលនេះ អាចបញ្ជាក់ពីមូលហេតុ ដែលត្រូវឲ្យលើកកិច្ចប្រជុំ របស់គណៈរដ្ឋមន្ត្រី ដោយគ្មាននាយករដ្ឋមន្ត្រី«ស្ដីទី» ដូច្នេះឬ?

មិនមានចម្លើយជាក់លាក់ទេ។ ផ្ទុយទៅវិញ លោកនាយករដ្ឋមន្ត្រី បានប្រតិកម្មតបមកវិញ កាលពីថ្ងៃទី១០ ខែកក្កដានេះ ហៅអ្នកដែលចង់ដឹងចង់ឮ ពីវត្តមានរបស់លោកនៅឯណា កំពុងធ្វើអ្វី និងអ្នកដែលថាលោក មិនផ្ទេរសិទ្ធ​ជានាយករដ្ឋមន្ត្រីស្ដីទី ឲ្យអ្នកដទៃនោះ ថាជា«ជនពាល»។ លោកបានសរសេរ នៅលើទំព័រហ្វេសប៊ុករបស់លោកថា៖ «តើខ្ញុំមានសិទ្ធិសប្បាយរីករាយ ជួបជុំកូនចៅ ដូចក្នុងរូបថតនេះដែរឬទេ? តើខ្ញុំត្រូវតែប្រាប់មនុស្សគ្រប់គ្នា ពិសេសពួកជនពាលថា ខ្ញុំកំពុងស្ថិតនៅទីនេះ ឬទីនោះដែរឬទេ?»។

ហាក់មិនខ្វល់ នឹងការលើកពេល នៃកិច្ចប្រជុំគណៈរដ្ឋមន្ត្រី ម្ដងជាពីរដងនេះ លោក ហ៊ុន សែន បានអះអាងថា លោកអាចបញ្ជា ឬដឹកនាំកិច្ចការប្រទេសជាតិ បានពីគ្រប់ទីកន្លែង ដែលលោកកំពុងស្ថិតនៅ។ លោកថា៖ «ទោះខ្ញុំផ្ទេរសិទ្ធិ ឬមិនផ្ទេរសិទ្ធិ ទោះខ្ញុំស្ថិតនៅទីណា ក៏នៅតែមានលទ្ធភាព ដឹកនាំកិច្ចការប្រទេសជាតិ ពិសេសបង្រ្កាប​ លើការបង្កចលាចល របស់ក្រុមជនពាល ក្រុមជ្រុលនិយម ក្រុមពួកកូនអាក្បត់ជាតិ បានដែរ»។

ប្រភពមន្ត្រីក្នុងស្រុក ដែលសុំមិនបញ្ចេញឈ្មោះ និងដែលត្រូវបានស្រង់សំដី ដោយក្រុមអ្នកប្រើប្រាស់បណ្ដាញសង្គម ដែលមានទីតាំង នៅក្រៅប្រទេស បានអះអាងថា អវត្តមានច្រើនសប្ដាហ៍ របស់លោក ហ៊ុន សែន បណ្ដាលមកពី​លោកនាយករដ្ឋមន្ត្រី ចេញទៅព្យាបាលជំងឺ នៅក្នុងប្រទេសសិង្ហបូរី។ ប្រភពទាំងនោះ ថែមទាំងរៀបរាប់ទៀតថា លោក ហ៊ុន សែន មានជំងឺធ្ងន់ធ្ងរ ទាក់ទងនឹងឆ្អឹងខ្នង។

ប្រភព​​ច្បាស់​ការ​ផ្សេងទៀត គួរ​ឲ្យ​ទុក​ចិត្ត​បាន ក៏បានអះអាងប្រាប់​​វិទ្យុអាស៊ីសេរី​ (RFA) ដែរថា លោក ហ៊ុន សែន កំពុង​សម្រាក​ព្យាបាល​របួស​ នៅ​ក្រៅ​ប្រទេស តែមិនបានបញ្ជាក់ថា ជាប្រទេសណាមួយទេ។ ប្រភព​នោះ​បាននិយាយថា ក្នុង​ពេល​លេង​វាយ​កូន​ហ្គោល​ កាល​ពី​ពេល​ថ្មីៗ​នេះ លោក ហ៊ុន សែន បាន​ដួល​បាក់​ឆ្អឹង​ត្រគាក រួច​បាន​ចេញ​ ទៅ​សម្រាក​ព្យាបាល​របួស​ នៅ​មន្ទីរពេទ្យ​នៅ​ក្រៅ​ប្រទេស និងត្រូវសម្រាក​ព្យាបាល​របួសនោះ ​រហូត​ដល់​រយៈពេល ១​ខែ។

តែបើទោះជាលោក ហ៊ុន សែន ទទួល ឬមិនទទួលស្គាល់ ថាខ្លួនលោកមានជំងឺក៏ដោយ តែរូបថតដែលបង្ហោះ ដោយលោក ហ៊ុន សែន ខ្លួនឯង នៅលើទំព័រហ្វេសប៊ុករបស់លោក បានបង្ហាញពីភាពមិនប្រក្រតី ខុសពីរាប់សិបដង។ នោះគឺប្រដាប់អបឆ្អឹង ដែលលោកកំពុងពាក់ ព័ទ្ធនៅជុំវិញចង្កេះ ទាំងពេលលោកចេញដើរ ពាក់អាវធំ (ដែលហាក់ទប់ខ្លួនជានិច្ច) និងទាំងពេលលោក​នៅក្នុងបន្ទប់ ពាក់អាវនៅផ្ទះ។ សូមបញ្ជាក់ជូន ពីទិដ្ឋភាពក្នុងរូបថតទាំងនោះ ដូចខាងក្រោម (បន្ថែមពីរូបខាងលើ ដែលដាក់បង្ហាញរួច)៖

យ៉ាងណា សម្រាប់លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា អវត្តមានរបស់នាយករដ្ឋមន្ត្រី បណ្ដាលមកពី​«ហេតុផល​ផ្ទាល់ខ្លួន»។ រីឯលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីវិញ បានប្រកែកថា លោក ហ៊ុន សែន មិន​មាន​ឈឺ​អ្វី​ឡើយ ហើយ​​កំពុង​ស្ថិត​នៅ​ក្នុង ​ប្រទេស​កម្ពុជា។ រីឯ​ការ​លើក​ពេល​ប្រជុំគណៈរដ្ឋមន្ត្រី ២​សប្ដាហ៍ ​ទៅ​ពេល​ក្រោយនោះ ត្រូវបានមន្ត្រីរដ្ឋាភិបាលរូប​នេះ ពន្យល់​ថា ​វា​ជា​ការ​ចាត់ចែង ​របស់​អគ្គលេខាធិការ​រដ្ឋាភិបាល។ លោកថា លោកមិនបានដឹង ថាតើ​របៀបវារៈ ​រវល់​យ៉ាង​ណា រហូតដល់មានការលើកពេល ដូច្នេះទេ៕

សមាជិក​សភា​អ៊ឺរ៉ុប​សួរ​ពី​ការ​ធានា​ឲ្យ សម រង្ស៊ី វិល​ចូល​ប្រទេស​វិញ

សមាជិក​សភា​អ៊ឺរ៉ុប​សួរ​ពី​ការ​ធានា​ឲ្យ សម រង្ស៊ី វិល​ចូល​ប្រទេស​វិញ

សំនួរជាលាយលក្ខណអក្សរ​ទាំងបី ត្រូវបានសមាជិកសភាអ៊ឺរ៉ុប យ៉ាងហោចចំនួន៧រូប ដាក់ចូលទៅកាន់ស្ថាប័នកំពូលៗ របស់អ៊ឺរ៉ុប ទាក់ទងនឹងស្ថានការណ៍​នយោបាយ នៅក្នុង​ប្រទេស​កម្ពុជា ហើយត្រូវបាន​ធ្វើឡើង ជាផ្លូវការ តាំងពីថ្ងៃទី២០ ខែមិថុនា ឆ្នាំ២០១៧កន្លងទៅ តែសំនួរទាំងនេះ នៅតែជាបច្ចុប្បន្នភាព រហូតមកដល់ថ្ងៃនេះ ខណៈគេហទំព័ររបស់សភាអ៊ឺរ៉ុប បានដាក់បង្ហោះសំនួរខាងលើ ជាសាធារណៈ នៅថ្ងៃទី៦ ខែកក្កដា ឆ្នាំ២០១៧។

ស្ថាប័នកំពូលៗទាំងបី របស់សហភាពអ៊ឺរ៉ុបនោះ មាន (១) ប្រមុខការទូតអ៊ឺរ៉ុប អ្នកស្រី ហ្វេដើរីកា ម៉ូហ្គេរីនី (Federica Mogherini) ដែលជាតំណាងជាន់ខ្ពស់នៃសហភាពអ៊ឺរ៉ុប ទទួល​បន្ទុក​កិច្ចការ​បរទេស និងនយោបាយសន្តិសុខ (២) ឯកអគ្គអង្គទូត នៃសហភាពអ៊ឺរ៉ុប ប្រចាំនៅកម្ពុជា លោក ហ្សក អេហ្គា (George Edgar) និងការិយាល័យអ៊ឹរ៉ុប ដើម្បីកិច្ចការខាងក្រៅ (The European External Action Service ហៅកាត់ EEAS - ហៅកាត់ជា​ភាសាបារាំង SEAE)។

សមាជិកសភាទាំង៧រូប ដែលរួមមាន លោក Ramon Tremosa i Balcells (ALDE) លោក Petras Auštrevičius (ALDE) អ្នកស្រី Marisa Matias (GUE / NGL) អ្នកស្រី Norica Nicolai (ADLE) លោក Javier Nart (ADLE) អ្នកស្រី Cecilia Wikström (ALDE) និងលោក Jasenko Selimovic (ALDE) បានផ្ដើមសំនួររបស់ពួកគេ ដោយការវាយតម្លៃ លើការបោះឆ្នោត ជ្រើសតាំងក្រុមប្រឹក្សា ឃុំ-សង្កាត់ ក្នុងប្រទេសកម្ពុជា កាលពីថ្ងៃទី៤ ខែមិថុនា ឆ្នាំនេះ ថាមានលក្ខណៈ«ឆ្ងាយ» ពីការបោះឆ្នោតទាំងឡាយ ដែលមានលក្ខណៈ​«សេរី និងយុត្តិធម៌»។ ការវាយតម្លៃនេះ ធ្វើឡើង​ដោយយោង ទៅលើបរិយាកាសដ៏អាក្រក់ បណ្ដាលមកពីកង្វះ ការប្រកួតប្រជែង ផ្នែកនយោបាយ​​ដ៏ពិតប្រាកដ និងគ្មានសេរីភាព នៃការបញ្ចេញមតិ។

 បើតាមអត្ថបទសួរ-ឆ្លើយនោះដដែល បានបន្តរៀបរាប់ ពីលទ្ធផលដែលចេញពីការបោះឆ្នោត ឃុំ-សង្កាត់ ខាងលើនេះ ជុំវិញ​ការកើនឡើងនូវសម្លេងគាំទ្រ របស់គណបក្សសង្គ្រោះជាតិ (CNRP) ដែលទទួលបានតំណែង មេឃុំ-ចៅសង្កាត់ ចំនួន៤៨៧ ជាមួយនឹងសម្លេងឆ្នោត៤៦ភាគរយ ខណៈការគាំទ្ររបស់គណបក្សប្រជាជនកម្ពុជា (CPP) ដែលកាន់អំណាច ដ៏ចាស់វស្សានៅកម្ពុជា បានថយចុះពីតំណែង មេឃុំ-ចៅសង្កាត់ ចំនួន១៥៩២ ទទួលបានក្នុងឆ្នាំ២០១២ មកត្រឹមចំនួន១១៥៨ ទទួលបានក្នុងឆ្នាំនេះ ជាមួយនឹងសម្លេងឆ្នោត តែ៥១ភាគរយប៉ុណ្ណោះ។

សមាជិកសភាទាំង៧រូប បានលើកឡើងទៀតថា សហភាពអ៊ឺរ៉ុបបានផ្ដល់ជំនួយ ប្រមាណជា១០លានអ៊ឺរ៉ូ (ត្រូវជា១១លានដុល្លារ) ដើម្បីរៀបចំការចុះឈ្មោះ នៃពលរដ្ឋកម្ពុជា ដែលមានសិទ្ធិបោះឆ្នោត។ អត្ថបទបានសរសេរថា៖ «ប៉ុន្តែ វាជារឿងដ៏សំខាន់ ដែលការបោះឆ្នោតសកល ក្នុងខែកក្កដា ឆ្នាំ២០១៨ ត្រូវមានលក្ខណៈ សេរី និងយុត្តិធម៌។ សហភាពអ៊ឺរ៉ុប មិនគ្រាន់តែមានសិទ្ធិ ក្នុងការបញ្ជូនអ្នកសង្កេតការណ៍ សម្រាប់ព្រឹត្តិការណ៍នេះទេ តែវាជាកាតព្វកិច្ច របស់សហភាពអ៊ឺរ៉ុប ដែលត្រូវធ្វើកិច្ចការនេះ។»។

ខាងក្រោមនេះ ជាសំណួរទាំងបី៖

១) តើសហភាពអ៊ឺរ៉ុប អាចបញ្ជាក់បានឬទេ ថាខ្លួននឹងបញ្ជូនបេសកកម្មឃ្លាំមើលមួយ សម្រាប់ការបោះឆ្នោតនៅកម្ពុជា ក្នុងឆ្នាំ២០១៨?

២) តើសហភាពអ៊ឺរ៉ុប បានអំពាវនាវ​ឲ្យមានការដោះលែង អ្នកទោសនយោបាយទាំងអស់ រាប់ទាំងមន្ត្រីសង្គមស៊ីវិល និងសកម្មជនស្និតនឹងគណបក្សប្រឆាំង ហើយឬនៅ?

៣) តើសហភាពអ៊ឺរ៉ុប ទទួលបានការធានាបែបណា ពីសំណាក់រដ្ឋាភិបាលកម្ពុជា ដើម្បីអនុញ្ញាតឲ្យលោក សម រង្ស៊ី អាចត្រឡប់ចូលក្នុងប្រទេសកម្ពុជាវិញ ប្រកបដោយសុវត្ថិភាព និងទទួលបានភាពស្របច្បាប់ ក្នុងការធ្វើដំណើរដោយសេរី នៅមុនការបោះឆ្នោតជាតិ ក្នុងឆ្នាំក្រោយនេះ?

AirAsia៖ បុរស​ម្នាក់​ព្យាយាម​បើក​ទ្វា​យន្ដហោះ ពេល​កំពុង​ហោះ​ហើរ

AirAsia៖ បុរស​ម្នាក់​ព្យាយាម​បើក​ទ្វា​យន្ដហោះ ពេល​កំពុង​ហោះ​ហើរ

អ្នកដំណើរ ជិះក្នុងយន្ដហោះ របស់ក្រុមហ៊ុនអាកាសចរណ៍ «AirAsia» នៃជើងហោះហើរក្នុងប្រទេសឥណ្ឌា ដែលភ្ជាប់រដ្ឋធានី ញូដេលី (New Delhi) ទៅកាន់ក្រុង រ៉ុងឈី (Ranchi - ភាគខាងកើត) បានទទួលការភ័យភិតយ៉ាងខ្លាំង បន្ទាប់ពីការប៉ុនប៉ងរបស់បុរសម្នាក់ ចង់ស្ទុះទៅបើកទ្វាយន្ដហោះ ក្នុងពេលដែលយន្ដហោះ កំពុងហោះហើរ កណ្ដាលវេហាស៍នៅឡើយ។ នេះ បើតាមរបាយការណ៍មួយ ចេញផ្សាយកាលពីម្សិលម៉ិញ របស់សារព័ត៌មាន «Times of India» ក្នុងប្រទេសឥណ្ឌា។

សារព័ត៌មានបានរៀបរាប់ថា ហេតុការណ៍បានកើតឡើង នៅយប់ថ្ងៃចន្ទ វេលាម៉ោងប្រមាណជា ២១ និង៥០នាទី នៅមុនពេលយន្ដហោះអ៊ែរប៊ូស (AirBus A320) ចាប់ផ្ដើមបន្ទាបខ្លួន ដើម្បីចុះចតនៅព្រលានយន្ដហោះ ក្រុង រ៉ង់ឈី។ នៅពេលនោះ បុរសអ្នកដំណើរម្នាក់ ដែលគេស្គាល់ឈ្មោះ «Aftab Ahmed» បានងើបចេញពីកៅអីខ្លួន ហើយស្ទុះទៅកាន់ទ្វាយន្ដហោះ ដែលបង្កា​ទុកសម្រាប់បើក តែពេល​មានគ្រោះអាសន្ន។

នៅចំពោះការប៉ុនប៉ងបើកទ្វាយន្ដហោះ ពីសំណាក់បុរសខាងលើ អ្នកដំណើរនៅជិតនោះ រួមនឹងបុគ្គលិកបម្រើការ លើយន្ដហោះផង បានស្ទុះព្រមគ្នា ដើម្បីឃាត់សកម្មភាពរបស់បុរស។ នេះ បើតាមការអះអាងរបស់អ្នកទទួលខុសត្រូវ របស់អាជ្ញាធរនគរបាលតំបន់ ដែលត្រូវបានស្រង់សំដី ដោយសារព័ត៌មានដដែល។ អ្នកទទួលខុសត្រូវរូបនោះ បានអះអាងថា ការប្រទាញប្រទង់គ្នា ក្នុងយន្ដហោះ បានបង្កឲ្យពួកគេមួយចំនួន រងរបួស។ 

យ៉ាងណាក៏ដោយ ក៏យន្ដហោះបានចុះចត នៅឯព្រលានយន្ដហោះក្រុង រ៉ង់ឈី ដោយគ្មានហេតុភេទអ្វីផ្សេង កើតឡើងឡើយ។ បុរសខាងលើ ដែលមានអាយុ៣២ឆ្នាំ ត្រូវបាននគរបាលឃាត់ខ្លួន នៅពេលចុះចេញពីយន្ដហោះ។ ក្រុមហ៊ុនអាកាសចរណ៍ «AirAsia» ដែលផ្ដល់សេវាកម្ម លក់សំបុត្រថោក មិនបានសំដែងប្រតិកម្មអ្វីទេ មកដល់ម៉ោងនេះ។

សារព័ត៌មាន «Times of India» បានបញ្ជាក់បន្ថែមថា ក្រសួងអាកាសចរណ៍ស៊ីវិលឥណ្ឌា នឹងផ្សាយឲ្យដឹង នៅក្នុងខែកក្កដានេះ នូវបញ្ជីឈ្មោះ នៃអ្នកដំណើរមួយចំនួន ដែលគ្មានវិន័យ ហើយត្រូវបានហាមឃាត់ មិនឲ្យជាន់ជើង ចូលក្នុងយន្ដហោះ៕