Posts in ‘គ្រប់អត្ថបទជាខេមរភាសា’ Category

អគ្គ​លេខា​ធិការ​បក្ស​កុម្មុយនិស្ត​យួន មក​ធ្វើ​ទស្សនកិច្ច​នៅ​កម្ពុជា

អគ្គ​លេខា​ធិការ​បក្ស​កុម្មុយនិស្ត​យួន មក​ធ្វើ​ទស្សនកិច្ច​នៅ​កម្ពុជា

តបតាមការអញ្ជើញរបស់ព្រះមហាក្សត្រកម្ពុជា លោក ង្វៀង ហ្វូជុង (Nguyen Phu Trong) អគ្គលេខាធិការគណៈកម្មាធិការមជ្ឈឹមបក្សកុម្មុយនិស្ត វៀតណាម នឹងមកធ្វើទស្សនកិច្ចនៅកម្ពុជា សម្រាប់រយៈពេល៣ថ្ងៃ និងគ្រោងចុះហត្ថលេខា នៅលើសេចក្ដីថ្លែងការណ៍រួម វៀតណាម-កម្ពុជា មួយចំនួនផង។ នេះ បើតាមសេចក្ដីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សាយ កាលពីថ្ងៃទី១៦ ខែកក្កដាម្សិលម៉ិញ។

សេចក្ដីប្រកាសព័ត៌មាននោះ បានអះអាងថា ក្រៅពីចូលក្រាបបង្គំគាល់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី នៅក្នុង ប្រាសាទទេវាវិនិច្ឆ័យ និងចូលក្រាបបង្គំគាល់ សម្តេចព្រះមហាក្សត្រី នរោត្តម មុនិនាថ សីហនុ នៅព្រះរាជដំណាក់គន្ធបុប្ផា នៃព្រះ​បរម​រាជវាំងនោះ លោក ង្វៀង ហ្វូជុង នឹងមានគម្រោងចូលថ្វាយបង្គំ មេដឹកនាំព្រះសង្ឃ និងជួបមេដឹកនាំកម្ពុជាកំពូលៗ រួមមាន៖

- ព្រះតេជគុណ ទេព វង្ស សម្តេចព្រះមហាសង្ឃរាជ នៃគណៈមហានិកាយ
- ព្រះតេជគុណ បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ
- លោក សាយ​ ឈុំ ប្រធានព្រឹទ្ធសភា និងជាអនុប្រធានគណបក្សប្រជាជនកម្ពុជា
- លោក ហេង សំរិន ប្រធានរដ្ឋសភា និងជាប្រធានកិត្តិយស​គណបក្សប្រជាជនកម្ពុជា
- និងលោក ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។

នៅក្រោយជំនួប ហ៊ុន សែន - ង្វៀង ហ្វូជុង នឹងមានពិធីចុះហត្ថលេខាមួយ ទៅលើសេចក្ដីថ្លែងការណ៍រួម ស្តីពីការពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងវៀតណាម ដែលធ្វើឡើង​ក្រោមអធិបតី របស់មេដឹកនាំទាំងពីរ។ នៅក្នុងរបៀបវារៈចុងក្រោយ នៃដំណើរទស្សនកិច្ចនោះ លោក ង្វៀង ហ្វូជុង និងលោក សាយ ឈុំ នឹងរួមគ្នា ទៅសម្ពោធស្ដូបអនុស្សាវរីយ៍ ស្ដីពីមិត្តភាពកម្ពុជា-វៀតណាមមួយ នៅក្នុងខេត្តព្រះសីហនុ។

សេចក្ដីប្រកាសរបស់ក្រសួងការបទេសកម្ពុជា បានអះអាងទៀតថា ដំណើរទស្សនកិច្ច«ផ្លូវរដ្ឋ» របស់លោក ង្វៀង ហ្វូជុង នឹងបញ្ជាក់ពីមិត្តភាព និងកិច្ចសហប្រតិបត្តិការ «ដ៏រឹងមាំ និងយូរលង់» រវាងប្រទេសទាំងពីរ ដែលបានប្រារព្ធពិធីរំលឹកខួបទី ៥០ នៃទំនាក់ទំនងការទូតរវាងគ្នា ក្នុងឆ្នាំ២០១៧នេះ៕

សម រង្ស៊ី៖ ហ៊ុន សែន ធ្វើ​ទង្វើ​«ក្បត់​ជាតិ​៤​យ៉ាង»

សម រង្ស៊ី៖ ហ៊ុន សែន ធ្វើ​ទង្វើ​«ក្បត់​ជាតិ​៤​យ៉ាង»

សង្គ្រាមវោហាស័ព្ទ ដោយផ្លោងសំដី«ថ្លោសៗ»ដាក់គ្នា រវាងអ្នកនយោបាយខ្មែរ មិនបានថមថយកម្លាំងទេ! នៅចំពោះការចោទប្រកាន់ថា«ទណ្ឌិត» ផ្ដន្ទាទោស​ដោយ​តុលាការកម្ពុជា និងពេលខ្លះ ជា«កូនអាក្បត់ជាតិ» នៅថ្ងៃនេះ លោក សម រង្ស៊ី មេដឹកនាំប្រឆាំង ដែលកំពុងនិរទេសខ្លួន នៅឯបរទេស បានពន្យល់បកស្រាយ​មកវិញ ថាតើនរណាពិតប្រាកដា ជាអ្នកមានទោស «ជាជនក្បត់ជាតិ»។

អតីតប្រធានគណបក្សសង្គ្រោះជាតិ ដែលជាគូបដិបក្ខនយោបាយ ប្រកបដោយសក្ដានុពល ទល់នឹងលោក ហ៊ុន សែន នាយករដ្ឋមន្ត្រី - ប្រធានគណបក្ស​ប្រជាជន​កម្ពុជា បានបង្ហោះការបកស្រាយរបស់លោកដូច្នេះ នៅមុននេះបន្តិច លើបណ្ដាញសង្គម និងបានចង្អុលដោយត្រង់ៗថា គឺលោក ហ៊ុន សែន ដែលនៅកាន់អំណាច​​ចាស់វស្សានេះហើយ ជា«ជនក្បត់ជាតិ» ដែលប្រព្រឹត្តិនូវទង្វើក្បត់ជាតិ ចំនួន៤យ៉ាង។

លោក សម  រង្ស៊ី បានពន្យល់ថា «ជនក្បត់ជាតិ ជាអ្នកដែលបានប្រព្រឹត្តិទង្វើណាមួយ» ក្នុងចំណោមទង្វើទាំងបួន ដែលមេដឹកនាំប្រឆាំងរូបនេះ ពន្យល់រៀបរាប់ ក្នុងសេចក្ដីដើមទាំងស្រុង ដូចតទៅ៖ 

«១- បម្រើផលប្រយោជន៍បរទេស ហើយធ្វើឲ្យប្រទេសរបស់ខ្លួន បាត់បង់ឯករាជ្យភាព និងអធិបតេយ្យភាពជាតិ (ដូចជាចំពោះប្រទេស​កម្ពុជា ក្រោយពីឆ្នាំ ១៩៧៩)»
«២- កាត់ទឹកដីប្រទេសរបស់ខ្លួន ឲ្យទៅប្រទេសជិតខាង (ដូចជាករណីទឹកដីប្រទេសកម្ពុជា ដែលត្រូវបាត់បង់ ដោយសារសន្ធិសញ្ញាព្រំដែន ក្នុងទសវត្សរ៍ឆ្នាំ ១៩៨០)»
«៣- សម្លាប់ប្រជារាស្ត្រខ្លួនឯង ក្នុងទ្រង់ទ្រាយធំ (ដូចជាការអនុវត្តន៍ផែនការ ក៥ ដែលបង្ខំមនុស្សរាប់មុឺននាក់ ឲ្យទៅស្លាប់ ក្នុងទសវត្សរ៍ឆ្នាំ ១៩៨០
«៤- បំផ្លាញទ្រព្យសម្បត្តិជាតិ ដើម្បីបម្រើផលប្រយោជន៍ខ្លួន គ្រួសារខ្លួន និងបក្ខពួកខ្លួន (ដូចជាការកាប់បំផ្លាញព្រៃឈើ ក្នុងរយៈពេល ២០ ឆ្នាំចុងក្រោយនេះ)»។

មេដឹកនាំប្រឆាំង បានសរសេរបញ្ជាក់ថា៖ «លោក ហ៊ុន សែន បានប្រព្រឹត្តទង្វើទាំង ៤ ខាងលើនេះ»។ ហើយលោកបានសន្យាថា លោកនឹងត្រឡប់មក«លាតត្រដាង» ពីប្រវត្តរបស់ «សឺង ង៉ុកមិញ (ឈ្មោះដើម Phạm Văn Hua) ហៅអាចារ្យមៀន (អាចារ្យក្លែងក្លាយ) ដែលជាបិតាគណបក្សប្រជាជនកម្ពុជា ហើយដែលជាជនក្បត់ជាតិ មុនគេបង្អស់ ចាប់ពីឆ្នាំ ១៩៥១ ដែលជាឆ្នាំកំណើតរបស់ គណបក្សប្រជាជនកម្ពុជា»។

កាលពីចុងខែកន្លងទៅ លោក ហ៊ុន សែន ដែលនៅអង្គុយក្នុងតំណែង ជានាយករដ្ឋមន្ត្រី តាំងពីជាង៣ទសវត្សន៍មកនោះ បានប្រតិកម្មទៅនឹង​ការបកស្រាយ​ទាំង​ឡាយណា របស់លោក សម រង្ស៊ី ពីប្រវត្តិសាស្ត្រ«ទំនើប» របស់ប្រទេសកម្ពុជា ជាពិសេសប្រវត្តិ​ របស់គណបក្សប្រជាជនកម្ពុជា​របស់លោក ដោយបានអះអាងថា អ្នកសរសេរប្រវត្តិសាស្ត្រ គឺជាអ្នកឈ្នះ ដែលសំដៅដល់រូបលោក គណបក្សរបស់លោក។ លោក ហ៊ុន សែន បានអះអាងថា រូបលោក និងគណបក្សប្រជាជនកម្ពុជា ចាំបាច់ត្រូវ«ឈ្នះ»​ជានិរន្តរ ដើម្បីសរសេរប្រវត្តិសាស្ត្ររបស់ប្រទេស​កម្ពុជា ទៅតាមអ្វី ដែលលោកហៅថា ដើម្បីការពារគណបក្សរបស់លោក ការពាររបបរាជានិយម និងព្រះមហាក្សត្រ។

«អាជនក្បត់ជាតិ...»

លោកនាយករដ្ឋមន្ត្រី​បានយកឧទាហរណ៍ ក្នុងសម័យសង្គមរាស្ត្រនិយម មកពន្យល់ថា៖ «រយៈពេលពីឆ្នាំ១៩៥៣ ដល់ឆ្នាំ១៩៧០ អ្នកសរសេរប្រវត្តិសាស្ត្រ គឺសង្គមរាស្ត្រនិយម។ ពេលនោះ សម្ដេចព្រះ នរោត្ដម សីហនុ ព្រះអង្គគឺជាព្រះបីតាជាតិ។ ប៉ុន្តែខុសត្រូវ តែមួយថ្ងៃប៉ុណ្ណោះ ថ្ងៃ១៨ ខែមីនា ឆ្នាំ១៩៧០ លុន ណុល ធ្វើរដ្ឋប្រហារបានសម្រេច គេក្លាយជាអ្នកឈ្នះ។ គេក៏ចាប់ផ្ដើមសរសេរប្រវត្តិសាស្ត្រភ្លាម ថាសម្ដេចព្រះ នរោត្ដម សីហនុ គឺជាជនក្បត់ជាតិ ហើយ លុន ណុល គឺជាអ្នកស្នេហាជាតិ។»។

» អត្ថបទទាក់ទង៖ ហ៊ុន សែន ថាប្រវត្តិសាស្ត្រ​មិន​មែន​«អា​ជន​ក្បត់​ជាតិ សម សារី»​ជា​អ្នក​សរសេរ!

លោក ហ៊ុន សែន បានមានប្រសាសន៍​ថា៖ «ចំណុចទាំងនេះ ចង្អុលបង្ហាញឲ្យឃើញថា មានតែអ្នកឈ្នះទេ ទើបមានសិទ្ធិសរសេរប្រវត្តិសាស្ត្រ បើសិនទុកឲ្យអ្នកដទៃ ទទួលជោគជ័យនេះ ច្បាស់ជាអាជនក្បត់ជាតិ សម សារី ស៊ឺង ងុកថាញ់ សឹម វ៉ា វានឹងក្លាយជារដ្ឋបុរស ជាវីរបុរសជាតិ ហើយសម្ដេចព្រះ នរោត្ដម សីហនុ ដែលជាព្រះបីតាជាតិរបស់យើងទាំងអស់គ្នា នឹងក្លាយទៅជាជនក្បត់ជាតិសារជាថ្មីម្ដងទៀត»៕

ហ៊ុន សែន ថា«ទេ» ចំពោះច្បាប់ការពារអតីតនាយករដ្ឋមន្ត្រី

ហ៊ុន សែន ថា«ទេ» ចំពោះច្បាប់ការពារអតីតនាយករដ្ឋមន្ត្រី

«លឺ ឡាយស្រេង កុំមកតាំងខ្លួនឯង ជាព្រឹទ្ធាចារ្យ និងជាអ្នកនយោបាយជើងចាស់ស្អី !» នេះ ជាប្រតិកម្មខ្លាំងៗ របស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា តបទៅនឹងលិខិតចំហរមួយ របស់អតីតឧបនាយករដ្ឋមន្ត្រី មកពីគណបក្សហ្វុនស៊ីនប៉ិច ដែលបានចេញផ្សាយនៅថ្ងៃសៅរិ៍ ទី១៥ ខែកក្កដានេះ ទៅកាន់ប្រធានគណបក្ស ដែលមានអសនៈក្នុងរដ្ឋសភាទាំងពីរ ស្នើឲ្យមានច្បាប់មួយឡើង ដើម្បីការពារនាយករដ្ឋមន្ត្រី ដែលអស់តំណែង។

លិខិតចំហរនោះ ដែលត្រូវបានលោក លី ឡាយស្រេង ធ្វើដាច់ដោយឡែកពីគ្នា ទៅកាន់លោក ហ៊ុន សែន ក្នុងនាមជាប្រធានគណបក្សកាន់អំណាច និងលោក កឹម សុខា ក្នងនាមជាប្រធានគណបក្សប្រឆាំង នៅក្នុងរដ្ឋសភា បានពន្យល់ថា ភាពចាំបាច់នៃច្បាប់ការពារនាយករដ្ឋមន្ត្រី ដែលចាកចេញពីអំណាច គឺដើម្បីបញ្ចៀស​ សង្គ្រាមបង្ហូរឈាមគ្នា រវាងខ្មែរគ្នាឯង។ មន្ត្រីនយោបាយចាស់វស្សា បានសរសេររំលឹកឡើងវិញ ពីសង្គ្រាម ដែល​កើត​ឡើង​ជាច្រើន​ជំនាន់​ នៅ​ក្នុង​ប្រវត្តិសាស្ត្រ​កម្ពុជា ចាប់​តាំង​ពី​ប្រទេស​មហា​អំណាច ​ដ៏ធំ​នៅ​ក្នុង​តំបន់ រហូត​ដល់​ក្លាយ​ ជា​ប្រទេស​តូច​មួយ។

សំណើរច្បាប់ ដែល​លោក លឺ ឡាយស្រេង ចង់​បាន​នោះ ក្រៅ​ពី​ធានា​ការពារ​នាយករដ្ឋ​មន្ត្រី​ ក្រោយ​ចាក​ចេញ ​ពី​តំណែង​ហើយ​នោះ ក៏​បាន​ផ្ដល់​ងារ​ទៅឲ្យអតីតនាយករដ្ឋមន្ត្រីរូបនោះ ជា “វីរៈ​បុរស​ជាតិ”​ផង​ដែរ។

តបទៅនឹងលិខិត«ចំហរ»នេះ លោក ហ៊ុន សែន បានចេញមុខ​មកពីប្រតិកម្ម មុនលោក កឹម សុខា ដោយហៅសំណើរ របស់លោក លី ឡាយស្រេង ថា«ការស្រមើស្រមៃរបស់ មនុស្សចាស់វង្វេងសតិ» និង«គ្មានបានការ»។ ផ្ដល់កិច្ចសម្ភាស ទៅឲ្យសារព័ត៌មានក្នុងស្រុកមួយ បុរសខ្លាំងកម្ពុជា ដែលកាន់អំណាចចាស់វស្សា បានរំលឹកពីប្រវត្តិ ធ្វើនយោបាយ របស់អ្នកនយោបាយ​ចាស់វស្សា​ខាងលើ ថាបានធ្វើនយោបាយ តាំងពីមានកៅអីក្នុងសភា រហូតដល់អស់កៅអី«រលីង» ហើយមកតាំងខ្លួន ជាអ្នកចេះដឹង រឿងនយោបាយអីទៀត។

ដោយភ្ជាប់លោក លី ឡាយស្រេង ទៅនឹងទំនាក់ទំនង ជាមួយគណបក្សប្រឆាំង «រហូតមក»នោះ លោក ហ៊ុន សែន បានបញ្ជាក់ឡើងថា៖ «សំណើរចង់ឲ្យមានច្បាប់ការពារនាយករដ្ឋមន្រ្តី ដ៏ស្មោកគ្រោកបែបនេះ ខ្ញុំធ្លាប់បានទទួលរួចហើយ កាលពីប៉ុន្មានឆ្នាំមុន។ វាជាការប្រមាថដ៏ធ្ងន់ធ្ងរ ដល់គណបក្សប្រជាជនកម្ពុជា ដែលវាជាការបង្ហាញថា បក្សប្រជាជនកម្ពុជា កំពុងត្រៀមចាញ់ និងបក្សប្រឆាំង កំពុងត្រៀមត្របាក់យកជ័យជំនះ ដូចក្រពើខ្លាត្រៀមត្របាក់ចំណី ខណៈបក្សរបស់ខ្លួន កំពុងចាញ់យ៉ាងពិតប្រាកដ ក្រោមស្នាដៃរបស់របស់បក្សប្រជាជន។»។

លោកនាយករដ្ឋមន្ត្រី បានថ្លែងការច្រានចោលរបស់លោកទៀតថា៖ «ការស្នើចង់បង្កើតច្បាប់នេះ ជាឧបាយកលទុច្ចរិត ឲ្យប្រជាជនមើលឃើញ ដោយច្រឡំថា នាយករដ្ឋមន្ត្រី ដែលកំពុងស្ថិត ក្នុងតំណែងបច្ចុប្បន្ន បាននិងកំពុង ធ្វើខុសអ្វីមួយយ៉ាងធ្ងន់ធ្ងរ ទើបបានជាចង់ឲ្យមានច្បាប់​បែបនេះ ក្នុងពេលដែលគណបក្សប្រជាជនកម្ពុជា បាននិងកំពុងកសាង ស្នាដៃធំៗជាច្រើន ជាប្រវត្តិសាស្ត្រ សម្រាប់មាតុភូមិ ប៉ុន្តែពួកគេរីករាយ នឹងបំផ្លិចបំផ្លាញ កេរ្តិ៍ឈ្មោះជាតិ បង្កការចលាចល ញុះញង់ បំផ្លិចបំផ្លាញសមិទ្ធផលជាតិ ព្យាយាមនាំកម្ពុជា ចូលក្នុងភ្នក់ភ្លើងសង្គ្រាម និងបំផ្លាញការអភិវឌ្ឍប្រទេស»។

លោក ហ៊ុន សែន បានដាក់ការសង្ស័យ ថាមិនមែនជាសកម្មភាព នៃការបង្រួបបង្រួមជាតិឡើយ នូវទង្វើទាំងឡាយ របស់ក្រុមប្រឆាំង ក្នុងពេលកន្លងមក។ ទង្វើទាំងនោះ ត្រូវបានលោករៀបរាប់ថា ដូចជាជាការប៉ុនប៉ង កម្ទេចចោល នូវត្រកូល ហ៊ុន - ការបំផុសឲ្យមានការជេរប្រមាថ ដល់អាយុជីវិតមេដឹកនាំប្រទេស នៅលើបណ្ដាញសង្គម - ការចោទប្រកាន់ទាំងខុស ចំពោះមរណភាព​របស់លោក កែម ឡី ឬការមិនចូលរួម អបអរសាទរ ការឈ្នះមេដាយមាសរបស់កម្ពុជា និងការដាក់តំបន់ប្រាសទសំបូរព្រៃគុក ចូលក្នុងបញ្ជីបេតិកភណ្ឌពិភពលោក​ជាដើម។

នាយករដ្ឋមន្ត្រីបីទសវត្សន៍ របស់កម្ពុជាបានឆ្លើយតប ទៅនឹងទង្វើខាងលើនេះថា៖ «នេះបង្ហាញ ពីការខ្វះមនសិការស្នេហាជាតិ និងស្រឡាញ់វប្បធម៌ របស់គណបក្សប្រឆាំង ផ្ទុយពីអ្វីដែលបក្សរបស់ខ្លួន លើកឡើងថា ជាអ្នកសេ្នហាជាតិ។ ការចង់ឲ្យមានច្បាប់ ការពារនាយករដ្ឋមន្ត្រី អស់ពីតំណែង ចាត់ទុកថា ជាការស្រមើស្រមៃរបស់ មនុស្សចាស់វង្វេងសតិ តែប៉ុណ្ណោះ គ្មានបានការនោះឡើយ។»៕

អ្វី​ទៅ​ ជាតួនាទី ភារកិច្ច និង​សិទ្ធិ របស់​ស្មៀន​ឃុំ-​សង្កាត់?

អ្វី​ទៅ​ ជាតួនាទី ភារកិច្ច និង​សិទ្ធិ របស់​ស្មៀន​ឃុំ-​សង្កាត់?

មានប្រិយមិត្តអ្នកអានជាច្រើន បានសាកសួរពីតួនាទី ភារកិច្ច និងសិទ្ធិ របស់ស្មៀនឃុំ-សង្កាត ថាមន្ត្រីថ្នាក់មូលដ្ឋានទាំងនេះ ត្រូវធ្វើអ្វីខ្លះ និងត្រូវមានសិទ្ធិអំណាច នៅត្រឹមកម្រិតណា នៅក្នុងឃុំ-សង្កាត់? តើមន្ត្រីស្មៀន មានសិទ្ធិ«ចង្អុលមុខ» និងប្រើសំដី«ថ្លោសៗ» ដាក់មេឃុំ ឬចៅសង្កាត់ឬទេ?

ក្រៅពីសំនួរទាក់ទងនឹងសីលធម៌ អ្នកច្បាប់មួយរូបបានឲ្យទស្សនាវដ្ដី​មនោរម្យ.អាំងហ្វូដឹងថា មន្ត្រីស្មៀនជាមន្ត្រីចាត់តាំង ក្រោមរចនាសម្ព័ន្ធ របស់ក្រសួងមហាផ្ទៃ និងខុសឆ្ងាយពីមេឃុំ ឬចៅសង្កាត់ ដែលជាមន្ត្រី ដែលត្រូវបានរាស្ត្របោះឆ្នោតជូន។ អ្នកច្បាប់រូបនោះ បានរៀបរាប់ទៀតថា នៅក្នុងប្រទេសប្រជាធិបតេយ្យ មន្ត្រីដែលទទួលបាន​សន្លឹកឆ្នោត​ពីរាស្ត្រ មានសិទ្ធិអំណាច ធំជាងឆ្ងាយ ពីមន្ត្រីដែលទទួល​បានការ​ចាត់តាំង។

អ្នកច្បាប់ដដែល បានអះអាងបន្តថា តួនាទី ភារកិច្ច និងសិទ្ធិ របស់ស្មៀន មានបញ្ជាក់លំអិត នៅក្នុងសេចក្ដីប្រកាសលំអិត ឆ្នាំ២០០១ របស់ក្រសួងមហាផ្ទៃ ប៉ុន្តែសេចក្ដីប្រកាសនោះ ក៏ត្រូវបានសរសេរ ស្ថិតក្រោមអំណាចច្បាប់ ស្ដីពីការគ្រប់គ្រងរដ្ឋបាល ឃុំ-សង្កាត់ នោះដែរ។ ប្រសិនជាស្មៀន បានប្រព្រឹត្តកំហុស ឬមេឃុំ-ចៅសង្កាត់ ពិបាកធ្វើការជាមួយស្មៀន នៅក្នុងមូលហេតុស្របច្បាប់ណាមួយ មេឃុំ-ចៅសង្កាត់ អាចកោះប្រជុំក្រុមប្រឹក្សាឃុំសង្កាត់ និងលើកពីករណីនេះឡើង ហើយសម្រេចស្នើទៅក្រសួងមហាផ្ទៃ ឲ្យធ្វើការផ្លាស់ស្មៀនរូបនោះចេញ។ ត្រង់ចំណុចនេះ លោកបានបញ្ជាក់ថា ក្នុងច្បាប់បានសរសេរថា «ត្រូវផ្លាស់» និងមិនមែន«អាចត្រូវផ្លាស់»ទេ ដូច្នេះតោងរដ្ឋមន្ត្រី ចាំបាច់ត្រូវធ្វើតាមការស្នើសុំ របស់មេឃុំ-ចៅសង្កាត់។

មាត្រា២៧ នៃច្បាប់នោះ ចែងថា «ស្មៀនឃុំ-សង្កាត់ តែងតាំងឡើង ដោយរដ្ឋមន្ត្រីក្រសួងមហាផ្ទៃ ដែលមានភារកិច្ច ជួយកិច្ចការឃុំ-សង្កាត់ និងធានានិរន្តភាព កិច្ចការរដ្ឋបាល នៅក្នុងឃុំ-សង្កាត់។ ស្មៀនឃុំ-សង្កាត់ ត្រូវផ្លាស់ប្ដូរ ក្នុងករណីមានសំណើរ របស់មេឃុំ ចៅសង្កាត់ អនុលោមតាមការសំរេច របស់ក្រុមប្រឹក្សាឃុំ-សង្កាត់។»

អ្នកច្បាប់បានពន្យល់បន្តថា ក្រៅពីភារកិច្ច ធ្វើរបាយការណ៍កិច្ចការ នៅក្នុងឃុំ-សង្កាត់ ជូនទៅក្រសួងមហាផ្ទៃ ស្មៀនឃុំ-សង្កាត់ មានភារកិច្ច និងត្រូវធ្វើកិច្ចការ ជា«សេនាធិការ» របស់ក្រុមប្រឹក្សាឃុំ-សង្កាត់ និងថែរក្សា ការពារសម្ភារៈសាធារណៈ-ឯកជន នៅក្នុងឃុំ-សង្កាត់នោះ រួមទាំងត្រាឃុំ-សង្កាត់។ តែការរក្សាការពារ«ត្រា» មិនមែនមានន័យថា ការសម្រេចវាយត្រា ទៅលើលិខិតស្នាមណាមួយ របស់ឃុំ-សង្កាត់នោះ ជាសិទ្ធិរបស់ស្មៀនឡើយ។

ទស្សនាវដ្ដីមនោរម្យ.អាំងហ្វូ សូមជម្រាបជូនពីច្បាប់ ស្ដីពីការគ្រប់គ្រងឃុំ-សង្កាត់ ត្រង់ចំណុចដែលមានចែង ពីស្មៀន និងសេចក្ដីប្រកាស របស់ក្រសួងមហាផ្ទៃ ស្ដីពីស្មៀនឃុំ សង្កាត់ ដូចខាងក្រោម៖

(សូមចុចលើទំព័របន្ទាប់ ដើម្បីអានឯកសារទាំងនេះ)

ហ៊ុន សែន បង្ហោះ​វីដេអូ​ថា​លោក​កំពុង​ស្ថិត​ក្នុង​ភ្នំពេញ

ហ៊ុន សែន បង្ហោះ​វីដេអូ​ថា​លោក​កំពុង​ស្ថិត​ក្នុង​ភ្នំពេញ

ប្រតិកម្មទៅនឹងការលើកឡើង ថាលោកមានជំងឺជាទម្ងន់ ត្រូវបញ្ជូនទៅកាន់មន្ទីរពេទ្យនោះ លោកនាយករដ្ឋមន្ត្រី និងជាប្រធានគណបក្សប្រជាជនកម្ពុជា បានចេញមុខ មកអះអាងថា លោកកំពុងមានវត្តមាន នៅក្នុងរាជធានីភ្នំពេញ និងជិះរថយន្ដជាប់ក្នុងការស្ទះចរាចរណ៍ ដូចគេឯង។

ការថ្លែងអះអាងនេះ ត្រូវបានធ្វើឡើង នៅក្នុងវីដេអូមួយ ដែលលោក ហ៊ុន សែន បង្ហោះនៅលើទំព័រហ្វេសប៊ុក របស់លោក នៅមុននេះបន្តិច។ ប៉ុន្តែវីដេអូ ដែលមានរយៈពេល​ជាង១នាទី មិនមែនជាវីដេអូផ្សាយផ្ទាល់ ដូចដែលក្រុមការងាររបស់លោក ធ្លាប់ធ្វើរាល់ដងនោះទេ ហើយនៅក្នុងវីដេអូ លោកក៏មិនបង្ហាញឲ្យច្បាស់ ថាតើរូបភាពខាងក្រៅ ទាក់ទងននឹង​ការអះអាងរបស់លោក មានលក្ខណៈយ៉ាងដូចម្ដេចឡើយ។

យ៉ាងណាក៏ពាក្យលេចឮ ថាលោកធ្លាក់ខ្លួនឈឺនោះ មិនមែនគ្រាន់តែ ជាការលើកឡើង ដោយក្រុមមនុស្សដទៃ ឬក្រុមមាននិន្នាការមិនស្របលោកប៉ុណ្ណោះទេ តែបើសូម្បីក្មួយបង្កើតរបស់លោក ក៏បានយល់ដែរថា លោក ហ៊ុន សែន ត្រូវបានបញ្ជូនទៅកាន់មន្ទីរពេទ្យ នៅក្នុងប្រទេសបារាំង។ លោក ហ៊ុន សែន បានមានប្រសាសន៍អះអាង ដោយខ្លួនលោកថា៖ «ហើយក្មួយបង្កើតរបស់ខ្ញុំ ក៏បែរជាយល់ថា ខ្ញុំកំពុងត្រូវបញ្ជូន ទៅប្រទេសបារាំង។ មួយចំនួនទៀត ថាខ្ញុំកំពុងបញ្ជូនពីសាំងហ្គាពួរ (ប្រទេសសិង្ហបូរី) ទៅហុងកុង។»។

បុរសខ្លាំងកម្ពុជា ដែលមិនបានបង្ហាញខ្លួន ជាសាធារណៈ តាំងពីចុងខែមិថុនាមក បានបន្តរៀបរាប់ នៅក្នុងវីដេអូនោះទៀតថា៖ «ឥឡូវនេះ ខ្ញុំកំពុងនៅមុខសណ្ឋាគារភ្នំពេញ បានសេចក្ដីថា ខ្ញុំកំពុងជិះសង្កេតមើលទីក្រុងភ្នំពេញតែម្ដង។»។

នៅក្នុងការអះអាងមួយ របស់លោក ថោង ខុន រដ្ឋមន្ត្រីក្រសួងទេសចរណ៍ ក៏បានឲ្យដឹងដែរថា ពិធីអបអរសាទរ នៃការបញ្ចូលតំបន់ប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោក ដែលនឹងប្រព្រឹត្តិនៅក្នុងថ្ងៃទី១៧ ខែកក្កដាខាងមុខ នៅរាជធានីភ្នំពេញ ក៏នឹងមានវត្តមានចូលរួម ជាអធិបតី នៃលោកនាយករដ្ឋមន្ត្រី ហ៊ុន សែន ដែរ។ នេះ បើតាមការរបាយការណ៍មួយ របស់សារព័ត៌មានក្នុងស្រុក។

លោក ហ៊ុន សែន បានហៅការលេចឭថា លោកមានជំងឺជាទម្ងន់នោះ គឺជាពាក្យចចាមអារាមដ៏អាក្រក់ និងគួរតែបំបាត់ចោល តាមរយៈការបកស្រាយ នៃឃ្លីបវីដេអូ ដែលលោកបានបង្ហោះនេះ។ លោកបានពន្យល់បន្តថា៖ «សូមបងប្អូនពិនិត្យមើល ថាអ្នកដែលបំផុសហ្នឹង គេមានចេតនាអ្វីឲ្យពិតប្រាកដ ព្រោះថា នាយករដ្ឋមន្ត្រីដែលបាត់ខ្លួន (...) ដូចដែលគេបានលើកឡើងនោះ ប្រាកដណាស់ថា ប្រទេសនេះនឹងច្របូកច្របល់»។

តាំងពីច្រើនថ្ងៃមកហើយ មានប្រភពមន្ត្រីក្នុងស្រុកជាច្រើន ដែលសុំមិនបញ្ចេញឈ្មោះ និងដែលត្រូវបានស្រង់សំដី ដោយក្រុមអ្នកប្រើប្រាស់បណ្ដាញសង្គម ដែលមានទីតាំង នៅក្រៅប្រទេស បានអះអាងថា អវត្តមានច្រើនសប្ដាហ៍ របស់លោក ហ៊ុន សែន បណ្ដាលមកពី​លោកនាយករដ្ឋមន្ត្រី ចេញទៅព្យាបាលជំងឺ នៅក្នុងប្រទេសសិង្ហបូរី។ ប្រភពទាំងនោះ ថែមទាំងរៀបរាប់ទៀតថា លោក ហ៊ុន សែន មានជំងឺធ្ងន់ធ្ងរ ទាក់ទងនឹងឆ្អឹងខ្នង។

ប្រភព​​ច្បាស់​ការ​ផ្សេងទៀត គួរ​ឲ្យ​ទុក​ចិត្ត​បាន ក៏បានអះអាងប្រាប់​​វិទ្យុអាស៊ីសេរី​ (RFA) ដែរថា លោក ហ៊ុន សែន កំពុង​សម្រាក​ព្យាបាល​របួស​ នៅ​ក្រៅ​ប្រទេស តែមិនបានបញ្ជាក់ថា ជាប្រទេសណាមួយទេ។ ប្រភព​នោះ​បាននិយាយថា ក្នុង​ពេល​លេង​វាយ​កូន​ហ្គោល​ កាល​ពី​ពេល​ថ្មីៗ​នេះ លោក ហ៊ុន សែន បាន​ដួល​បាក់​ឆ្អឹង​ត្រគាក រួច​បាន​ចេញ​ ទៅ​សម្រាក​ព្យាបាល​របួស​ នៅ​មន្ទីរពេទ្យ​នៅ​ក្រៅ​ប្រទេស និងត្រូវសម្រាក​ព្យាបាល​របួសនោះ ​រហូត​ដល់​រយៈពេល ១​ខែ។

តែបើទោះជាលោក ហ៊ុន សែន ទទួល ឬមិនទទួលស្គាល់ ថាខ្លួនលោកមានជំងឺក៏ដោយ តែរូបថតដែលបង្ហោះ ដោយលោក ហ៊ុន សែន ខ្លួនឯង នៅលើទំព័រហ្វេសប៊ុករបស់លោក កាលពីប៉ុន្មានថ្ងៃមុន បានបង្ហាញពីភាពមិនប្រក្រតី ខុសពីរាប់សិបដង។ នោះគឺប្រដាប់អបឆ្អឹង ដែលលោកកំពុងពាក់ ព័ទ្ធនៅជុំវិញចង្កេះ ទាំងពេលលោកចេញដើរ ពាក់អាវធំ (ដែលហាក់ទប់ខ្លួនជានិច្ច) និងទាំងពេលលោក​ នៅក្នុងបន្ទប់គេង ពាក់អាវនៅផ្ទះ ដូចរូបខាងក្រោម៖