Posts in ‘គ្រប់អត្ថបទជាខេមរភាសា’ Category

ភរិយា កែម ឡី ប្រកាស​មិន​យក​ប្រាក់​៥ម៉ឺន​ដុល្លារ​​ពី ហ៊ុន សែន

ភរិយា កែម ឡី ប្រកាស​មិន​យក​ប្រាក់​៥ម៉ឺន​ដុល្លារ​​ពី ហ៊ុន សែន

«បើសិនជាខ្ញុំវិញ គឺខ្ញុំមិនទទួលថវិកានេះទេ» នេះ ជាការប្រកាសឡើងរបស់អ្នកស្រី ប៊ូ រចនា ភរិយាលោក កែម ឡី តបទៅនឹងការ«ភ្ញាក់រលឹក» របស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា ដែលបានបង្ហាញ ពី«សុទ្ធាជ្រះថ្លា» ក្នុងការ​ផ្ដល់ថវិកាជាបន្តបន្ទាប់ ក្នុងពេលថ្មីៗនេះ ទៅឲ្យប្អូនប្រុសលោក កែម ឡី ម្ដងចំនួន១ម៉ឺនដុល្លារ សម្រាប់ទូទាត់ ការជំពាក់ថ្លៃបបរ ក្នុងពិធីបុណ្យរំលឹកខួបមរណភាព ១ឆ្នាំ និងម្ដងទៀត ដើម្បីជាវិភាគទាន ដល់ការសាងសង់ចេតិយ ជូនសពលោក កែម ឡី។

ការប្រកាស ជាសាធារណៈនេះ ត្រូវបានអ្នកស្រីធ្វើឡើង នាថ្ងៃទី២២ ខែកក្កដា (ត្រូវជាថ្ងៃទី២៣ ខែកក្កដា ម៉ោងនៅកម្ពុជា) នៅក្នុងពិធីបុណ្យខួប១ឆ្នាំ នៃមរណភាពស្វាមីអ្នកស្រី ដែលបានប្រព្រឹត្តទៅ នៅចុងសប្ដាហ៍កន្លងមកនេះ ក្នុងវត្តសាមគ្គីរតនរាម នៃទីក្រុង តាកូម៉ា រដ្ឋវ៉ាស៊ីនតោន ភាគខាងលិច​សហរដ្ឋអាមេរិក។ នៅក្នុងវីដេអូសួរឆ្លើយផ្ទាល់ ជាមួយលោក ជុន ច័ន្ទបុត្រ អ្នកសារព័ត៌មាន ពីវិទ្យុអាស៊ីសេរីដ៏ល្បីល្បាញ អ្នកស្រី ប៊ូ រចនា បានសំដែងការឈឺចាប់ជាទីបំផុត នៅពេលដែលអ្នកស្រី បានដឹងពីការទទួលយកប្រាក់ទាំងអស់នេះ ធ្វើឡើងដោយក្រុមគ្រួសារស្វាមីអ្នកស្រី។

ភរិយាមេម៉ាយ ដែលមានកូន៥នាក់ នៅក្នុងបន្ទុក បានថ្លែងឡើងថា៖ «ខ្ញុំអត់សប្បាយចិត្តទេ។ បើសិនជាខ្ញុំវិញ គឺខ្ញុំអត់ទទួលថវិកានេះទេ ព្រោះយើងដឹង​ហើយ​ អ្នក​ណា​នៅពីក្រោយរឿងហ្នឹង។ អញ្ចឹងខ្ញុំអត់ទទួលទាំងអស់។ ខ្ញុំអត់​បាន​ដឹង ​រឿងអីនោះទំាងអស់ [ពីគ្រួសាររបស់ខ្ញុំ]។ ដល់ពេលខ្ញុំដឹង [ខ្ញុំ]ឈឺចាប់ណាស់ ដែល​ខាងគ្រួសារប្តីខ្ញុំគាត់ធ្វើអញ្ចឹង។»។

កាលពីមួយថ្ងៃមុន (គឺថ្ងៃទី២២ ខែកក្កដា ម៉ោងនៅកម្ពុជា) ប្រាក់៥ម៉ឺនដុល្លារ សម្រាប់ជួយសាងសង់ចេតិយ ត្រូវបានប្រគល់ទៅឲ្យក្រុមគ្រួសារ របស់លោក កែម ឡី តាមរយៈក្រុមការងារ​ របស់សារព័ត៌មានក្នុងស្រុកមួយ ដែលស្និតជាមួយរដ្ឋាភិបាល និងគណបក្សប្រជាជនកម្ពុជា។ នៅក្នុងវីដេអូព័ត៌មាន របស់សារព័ត៌មាននោះ ប្អូនប្រុសលោក កែម ឡី គឺលោក កែម រិទ្ធិសិទ្ធិ បានអះអាងថាបានទទួលថវិកានេះ និងថា​បាន​បញ្ចូល ​ក្នុងធនាគាររួចហើយ។

ប្រាក់៥ម៉ឺនដុល្លារ ក្នុងរយៈពេល ៥១នាទី

ការដង្ហោយស្វែងរកប្រាក់ និងការទទួលប្រាក់ បានធ្វើឡើងយ៉ាងរហ័ស នៅក្នុងព្រឹកថ្ងៃទី២២ ខែកក្កដា ឆ្នាំ២០១៧ ដោយប្រើពេលវេលា មិនដល់មួយម៉ោងផងទេ ហើយអ្វីៗបានឆ្លងកាត់ តាមការផ្សាយ របស់សារព័ត៌មានក្នុងស្រុកខាងលើនេះ តែមួយប៉ុណ្ណោះ។

សារព័ត៌មាន ដែលល្បីថាជាអ្នកនាំពាក្យ ឲ្យលោក ហ៊ុន សែន បានផ្សាយអត្ថបទរបស់ខ្លួន ដែលមានចំណងជើងថា «ប្អូនប្រុសលោកបណ្ឌិត កែម ឡី អំពាវនាវរកការឧបត្ថម្ភ ពីសប្បុរសជន​ជួយ​សាងសង់​ចេតិយ ជូនបងប្រុស បន្ទាប់ពីដំណើរការសាងសង់ខកខាន ជាងមួយឆ្នាំ ព្រោះគ្មានប្រាក់» នៅវេលាម៉ោង ១០ និង ៤១នាទី។ ស្រាប់តែនៅ៥១នាទីក្រោយមក គឺនៅវេលាម៉ោង ១១ និង៣២នាទី ថ្ងៃខែឆ្នាំតែមួយ សារព័ត៌មានដដែល បានផ្សាយការសម្រេចចិត្ត«បែបផ្លេកបន្ទោរ» របស់លោក ហ៊ុន សែន ក្នុងការបញ្ជូនប្រាក់ ៥ម៉ឺនដុល្លារ ទៅឲ្យលោក កែម រិទ្ធិសិទ្ធិ តាមរយៈអត្ថបទថ្មីមួយទៀត ដែលមានចំណងជើង «សូមចូលរួមត្រេកអរ ! សម្តេចតេជោ ហ៊ុន សែន ឧបត្ថម្ភថវិកា ៥ម៉ឺនដុល្លារ សម្រាប់សាងសង់ចេតិយលោកបណ្ឌិត កែម ឡី ក្រោយពីប្រកាសអំពាវនាវ ស្វែងរកថវិកា»។

» សូមសង្កេតមើលពេលវេលានេះ ដែលត្រូវបានថតផ្តិតទុក ជា«ShotScreen» (ម៉ោងដែលបង្ហាញក្នុងរូបភាព ជាម៉ោងនៅក្នុងប្រទេសបារាំង ដែលយឺតជាង​នៅ​កម្ពុជា ៥ម៉ោង)៖

លោក កែម ឡី ត្រូវបានឃាតករ​ឈាមត្រជាក់​បាញ់សម្លាប់ កាលពីថ្ងៃទី១០ ខែកក្កដា ឆ្នាំទៅម៉ិញ នៅខណៈលោកកំពុងទទួលទានកាហ្វេ នៅក្នុងហាងលក់ទំនិញ ស្តាម៉ាត នៃស្ថានីយចាក់ប្រេងឥន្ទនៈ កាល់តិច ស្ថិតនៅស្ដុបបូកគោ។ នៅក្រោយឃាតកម្មនោះ និងរហូតមកដល់ថ្ងៃនេះ ជនសង្ស័យតែម្នាក់គត់ ឈ្មោះ អឿង អាង ដាក់រហស្សនាម «ជួប សម្លាប់» ត្រូវបានឃាត់ខ្លួន និងផ្តន្ទាទោស។

កាលពីដើមខែកក្កដានេះ អង្គការសង្គមស៊ីវិល​ជាតិ-អន្តជាតិ ​រាប់​រយ​ស្ថាប័ន បានចេញសេចក្ដីថ្លែងការណ៍រួម សំដែងការមិន​ជឿជាក់ ទៅលើការស្វែងរកយុត្តិធម៌ ជូនលោក កែម ឡី និងគ្រួសារ តាមរយៈប្រព័ន្ធយុត្តិធម៌កម្ពុជា ហើយបានទាមទារ​ ឲ្យ​មាន​ការ​ស៊ើប​អង្កេត​ដោយ​ឯករាជ្យ និង​តម្លាភាព​ ក្នុង​សំណុំ​រឿង​​ឃាតកម្ម​នេះឡើងវិញ។ 

កែម ឡី ត្រូវការលុយ?

ការបរិច្ចាកប្រាក់ ៥ម៉ឺន ក្នុងរយៈពេល៥១នាទី របស់លោក ហ៊ុន សែន ទទួលបានការស្វាគមន៍ជាទូទៅ ប្រសិនជាបុរសខ្លាំងកម្ពុជា ធ្វើឡើងក្នុងនាមជាសប្បុរសជន និងជាពលរដ្ឋម្នាក់។ តែក្នុងតួនាទីជានាយករដ្ឋមន្ត្រី និងជាប្រធានគណបក្សមួយ ដែលបានឈ្នះឆ្នោត ឡើងមកកាន់អំណាច លោក ហ៊ុន សែន គួរប្រើពេលវេលា និងថវិការទាំងនេះ ដើម្បីស្វែងរកយុត្តិធម៌ជូនលោក កែម ឡី និងក្រុមគ្រួសារ។ នេះ បើតាមការអះអាង របស់អ្នកជិតដិតច្រើននាក់ របស់លោក កែម ឡី។

លោក ប៉ា ងួនទៀង នាយកមជ្ឈមណ្ឌល ដើម្បីការផ្សព្វផ្សាយឯករាជ្យ និងជាមិត្តភ័ក្ររបស់លោក កែម ឡី កាលពីពេលលោកនៅមានជីវិត បានសរសេរនៅលើបណ្ដាញសង្គមថា៖ «កែម ឡី មិនត្រូវការលុយទេ តែត្រូវការយុត្តិធម៌ និង ការផ្លាស់ប្តូរ»។

នៅក្នុងវីដេអូ របស់សារព័ត៌មានខាងលើ លោក កែម រិទ្ធិសិទ្ធិ ក៏បានអំពាវនាវ ទៅកាន់លោក ហ៊ុន សែន ដែរ ដោយស្នើនាយករដ្ឋមន្ត្រី បីទសវត្សន៍ជាង របស់កម្ពុជា ឲ្យរកយុត្តិធម៌ ជូនបងប្រុសរបស់លោក។ លោកបានថ្លែងឡើងថា៖ «សូមឲ្យសម្ដេច ជួយរកយុត្តិធម៌ ការពិត។ ខ្ញុំជាក្រុមគ្រួសារ សូមច្រានចោល នូវឃាតករ"ជួប សម្លាប់" ដែលចោទប្រកាន់បងខ្ញុំ គឺបង ឡី ដែលថាជំពាក់លុយ ៣ពាន់ដុល្លារ។»។

ដោយឡែក លោក ហុង លីម តំណាងរាស្រ្តប្រចាំរដ្ឋ វីកតូរីយ៉ា របស់ប្រទេសអូស្រ្តាលី ដែលមានដើមកំណើតខ្មែរ បានចាត់ទុកការទទួលយកថវិកា ពីលោក ហ៊ុន សែន ថាជាការប្រមាថ ដល់វិញ្ញាណក្ខន្ធលោក កែម ឡី និងអ្នកស្រឡាញ់លោក ជាច្រើនលាននាក់។ តំណាងរាស្ត្ររូបនេះ បានពន្យល់ថា កាលពីពេលធ្វើបុណ្យសព អាជ្ញាធរបានប្រើគ្រប់រូបភាព ដើម្បីធ្វើការកៀបសង្កត់ និងកុំឲ្យពិធីបុណ្យនេះ ដំណើរការទៅបានល្អ។ លោកថា អាជ្ញាធរខ្មែរ ថែមទាំងបានបិទស្ថានីយចាក់សាំង ស្ទើរគ្រប់តាមដងផ្លូវ ដែលត្រូវដង្ហែសពលោក កែម ឡី ចេញពីរាជធានីភ្នំពេញ ឆ្ពោះទៅកាន់ខេត្តតាកែវ ដើម្បីបញ្ចុះសពលោកបណ្ឌិត នោះទៀត៕

ង្វៀង ហ៊្វូជុង មក​កម្ពុជា​​ជជែក​​រឿង​​«ព្រំដែន​និង​និគម​ជន​យួន»

ង្វៀង ហ៊្វូជុង មក​កម្ពុជា​​ជជែក​​រឿង​​«ព្រំដែន​និង​និគម​ជន​យួន»

របៀបវារៈផ្លូវការ ទាក់ទងនឹងបញ្ហាព្រំដែន ឬបញ្ហា«និគមជនវៀតណាម នៅកម្ពុជា» មិនត្រូវបាន​ប្រទេសកម្ពុជា​ប្រកាស តាំងពីដំបូងមកទេ។ ផ្ទុយទៅវិញ ជារៀងរាល់ ការចេញផ្សាយ របស់ទីភ្នាក់ងារព័ត៌មានផ្លូវការ របស់វៀតណាម ហៅកាត់ថា «VNA» តាំងពីមុនដំណើរទស្សនកិច្ចផ្លូវរដ្ឋ របស់លោក ង្វៀង ហ៊្វូជុង (Nguyen Phu Trong) អគ្គលេខាធិការ គណៈកម្មាធិការមជ្ឈឹមបក្សកុម្មុយនិស្ត វៀតណាម មកកាន់ប្រទេសកម្ពុជា មិនបានភ្លេចរំលឹក លើកមកសរសេរ នូវបញ្ហាព្រំដែន និងការបោះបង្គោលព្រំដែន ដែលប្រទេសទាំងពីរ​សម្រេចធ្វើបាន ៨៤ភាគរយនោះឡើយ។

ដោយឡែក សម្រាប់ប្រទេសកម្ពុជាវិញ គេត្រូវរង់ចាំរហូតដល់ សេចក្ដីថ្លែងការណ៍​រួម ស្ដីពី«ការពង្រឹងមិត្តភាព និងកិច្ចសហប្រតិបត្តិការ កម្ពុជា-វៀតណាម» ត្រូវបានភាគី​ទាំងសងខាង ចុះហត្ថលេខារួចជាស្ថាពរ នៅថ្ងៃទី២០ ខែកក្កដា ឆ្នាំ២០១៧ ទើបគេអាចដឹងថា តើខ្លឹមសារនៃការជួបជជែក រវាងមេដឹកនាំកុម្មុយនីស និងមេដឹកនាំកម្ពុជា ត្រូវបានធ្វើឡើងតាមរបៀបណា ជាពិសេសបញ្ហា ដែលទាក់ទងនឹង«ព្រំដែន» និង«និគមជនវៀតណាម នៅកម្ពុជា» ។

នៅក្នុងចំណុច ទី៨ នៃសេចក្ដីថ្លែងការណ៍រួមនោះ មានសរសេរ តាមការដកស្រង់​សេចក្ដីដើមទាំងស្រុង ដូចតទៅ៖

រីឯនៅក្នុងចំណុច ទី៩ នៃសេចក្ដីថ្លែងការណ៍រួមដដែល មានសរសេរ តាមការដកស្រង់សេចក្ដីដើមទាំងស្រុង បន្តទៀតថា៖

នៅក្នុងរយៈពេល៣ថ្ងៃ នៃដំណើរទស្សនកិច្ច នៅកម្ពុជា ចាប់ពីថ្ងៃទី២០ ដល់ថ្ងៃទី២២ ខែកក្កដា ឆ្នាំ២០១៧ លោក ង្វៀង ហ៊្វូជុង បានចួលក្រាបបង្គំ និងជួបមេដឹកនាំកម្ពុជាជាច្រើនអង្គ និងនាក់។ ការចុះហត្ថលេខា ទៅលើ​សេចក្ដីប្រកាសរួមខាងលើ រួមជាមួយនឹងឯកសារផ្លូវការ ជាច្រើនទៀត ត្រូវបានធ្វើឡើង ដោយមន្ត្រីរដ្ឋាភិបាល មកពីប្រទេសទាំងពីរ ក្រោមវត្តមានជាសក្ខីភាព របស់លោក ង្វៀង ហ៊្វូជុង និងលោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា នៅថ្ងៃទី២០ ខែកក្កដា ឆ្នាំ២០១៧។

នៅសឹងគ្រប់អត្ថបទ របស់ទីភ្នាក់ងារព័ត៌មានវៀតណាម «VNA» វិញ ដែលចេញផ្សាយ តាំងពីមុនដំណើរមកដល់ របស់លោក ង្វៀង ហ៊្វូជុង បានសរសេរនូវឃ្លាឃ្លោង ប្រហាក់ប្រហែលគ្នា (អាចជាឃ្លាឃ្លោងតែមួយ) ដូចទៅនឹង សេចក្ដីថ្លែងការណ៍ខាងលើដែរ។ អត្ថបទ ដែលសរសេរជាភាសាបារាំងនោះ មានសេចក្ដីជាអាទិ៍ថា៖ «ប្រទេសវៀតណាម និងកម្ពុជា សម្រេចបាន ៨៤ភាគរយ នូវការកំណត់ និងការបោះ(ដាំ)បង្គោល ព្រំដែនគោករួម។ ភាគីទាំងពីរ បានបង្ហាញ​ពីការប្ដេជ្ញាចិត្ត ក្នុងការដោះស្រាយបញ្ចប់ នូវបញ្ហាព្រំដែន ដែលនៅសេសសល់ ដើម្បីបញ្ចប់ការងារ និងកិច្ចការចុងក្រោយ ក្នុងសំនុំរឿង នៃការកំណត់ខ័ណ្ឌសីមាព្រំដែន និងការបោះបង្គោលព្រំដែន ឲ្យបានឆាប់រហ័ស សំដៅធ្វើឲ្យព្រំដែនរួម វៀតណាម-កម្ពុជា ក្លាយជាព្រំដែនសន្តិភាព ស្ថិរភាព មិត្តភាព និងកិច្ចសហប្រតិបត្តិការ និងការអភិវឌ្ឍ ប្រកបដោយចិរភាព។»

អត្ថបទ «VNA» ជាភាសាបារាំង មានសេចក្ដីដូចតទៅ៖ «Les deux pays ont achevé plus de 84% du volume des travaux de délimitation et de bornage de la frontière terrestre commune. Ils sont déterminés à régler définitivement les sections frontalières restantes pour achever ces travaux et mettre la dernière main aux dossiers de délimitation et de bornage frontaliers dans le meilleur délai en vue de faire de la frontalière vietnamo-cambodgienne une frontière de paix, de stabilité, d’amitié, de coopération et de développement durable.»៕

ចៅ​​សង្កាត់​អូរចា​អញ្ជើញ ឈាង វុន ចូល​ធ្វើ​«ទស្សន​កិច្ច»​ក្នុង​សង្កាត់

ចៅ​​សង្កាត់​អូរចា​អញ្ជើញ ឈាង វុន ចូល​ធ្វើ​«ទស្សន​កិច្ច»​ក្នុង​សង្កាត់

ជារូបភាពដ៏ល្អ ហើយក៏ជារូបភាព ដ៏កម្រមួយដែរ រាប់ចាប់តាំងពីកម្ពុជា បានក្លាយជាព្រះរាជណាចក្រទីពីរ ដែលប្រកាន់យក នូវរបបប្រជាធិបតេយ្យពហុបក្ស ! កញ្ញា ស៊ីន រ៉ូហ្សែត ចៅសង្កាត់មកពីគណបក្សប្រឆាំង ដែលទើបជាប់ឆ្នោត និងចូលកាន់តំណែងថ្មីថ្មោង បានអញ្ជើញលោក ឈាង វុន អ្នកតំណាងរាស្ត្រប្រចាំមណ្ឌលខេត្តបាត់ដំបង និងជាអ្នកនាំពាក្យរដ្ឋសភា មកពីគណបក្សកាន់អំណាច ឲ្យចូលធ្វើ«ទស្សនកិច្ច» និងធ្វើ«ការសំណេះសំណាល» នៅក្នុងសង្កាត់ ដែលជាទីដែនអំណាច របស់ខ្លួន។

តាមពិតទៅ រវាងកញ្ញា ស៊ីន រ៉ូហ្សែត និងលោក ឈាង វុន ពិតជាមានប្រវត្តិ​«ដ៏​សែនល្អូកល្អើន» រាប់ចាប់តាំងពីលោក ឈាង វុន បានប្រកាសក្នុងសន្និសីទសារព័ត៌មានមួយ កាលពីប៉ុន្មានសប្ដាហ៍មុន រិះគន់ការទិញដីចាក់ធ្វើផ្លូវ នៅក្នុងទឹកដីសង្កាត់របស់កញ្ញា។ នៅពេលនោះ ចៅសង្កាត់រូបស្រស់ បានឆ្លើយតបទៅលោក ឈាង វុន វិញ យ៉ាងសុភាពរម្យទមជាទីបំផុត ដោយឃ្លាថា នាងគ្រាន់តែជាចៅសង្កាត់ ដែលចង់អភិវឌ្ឍក្នុងសង្កាត់នាង ទៅតាមលទ្ធភាពដែលនាងមានប៉ុណ្ណោះ។

តែនៅថ្ងៃទី២១ ខែកក្កដានេះ ចៅសង្កាត់ក្រមុំ បានស្វាគមន៍​យ៉ាង​កក់ក្តៅ​ ចំពោះ​វត្តមាន​របស់​លោក ឈាង វុន ឲ្យ​ចូល​ក្នុងសាលាសង្កាត់​អូរ​ចារ បន្ទាប់​ពី​អ្នកតំណាងរាស្ត្រ មក​ពី​គណបក្ស​ប្រជាជន​កម្ពុជារូបនេះ បាន​ចូលរួម​រៀបចំ​កម្ម​វី​ធី​ប្រគេន​ទានវស្សា នៅ​សាលា​ឧបោសថ ក្នុងភូមិ​អណ្តូង​ចេញ សង្កាត់​អូរ​ចារ ក្រុង​បាត់ដំបង ​កាលពីរសៀល ថ្ងៃ​ដដែល។

ក្នុងឱកាសនោះ ចៅសង្កាត់ ស៊ីន រ៉ូហ្សែត ​បានលើកឡើងពីបញ្ហាមួយចំនួន នៅក្នុងសង្កាត់របស់នាង ជាពិសេសបញ្ហា នៅក្នុងបញ្ជីសារពើភណ្ឌ នៃទ្រព្យ​សម្បត្តិសាធារណៈ ដែលកញ្ញា ក្នុងនាមជាចៅសង្កាត់ បានទទួលយកមកគ្រប់គ្រង។ សូមទស្សនាវីដេអូ ដែលចៅសង្កាត់ខ្លួនឯងបានបង្ហោះផ្សាយផ្ទាល់ នៅលើគណនេយ្យហ្វេសប៊ុករបស់នាង ដូចខាងក្រោម។

 
ហ៊ុន សែន ​ឲ្យ ធី សុវណ្ណថា ក្លាយ​ជា​សមាជិក​បក្ស​ មុនការសម្រេច​របស់ CPP រាជធានី

ហ៊ុន សែន ​ឲ្យ ធី សុវណ្ណថា ក្លាយ​ជា​សមាជិក​បក្ស​ មុនការសម្រេច​របស់ CPP រាជធានី

ការសម្រេចជាផ្លូវការ ឲ្យកញ្ញា ធី សុវណ្ណថា អតីតអ្នកគាំទ្រគណបក្សប្រឆាំង ក្លាយជាសមាជិកពេញសិទ្ធិ របស់គណបក្សប្រជាជនកម្ពុជា ត្រូវបានឲ្យដឹង នៅក្នុងលិខិតមួយ ដែលចុះថ្ងៃទី២៥ ខែមិថុនា ឆ្នាំ២០១៧ និងមានហត្ថលេខារបស់លោក នុត ជា ប្រធានគណបក្សប្រចាំរាជធានីភ្នំពេញ។ ផ្ទុយទៅវិញ បណ្ណសម្គាល់សមាជិកគណបក្ស ដែលមានហត្ថលេខារបស់លោក ហ៊ុន សែន នាយករដ្ឋមន្ត្រី - ប្រធានគណបក្ស បែរជាត្រូវបានធ្វើឡើង តាំងពីថ្ងៃទី២២ ខែមិថុនា ឆ្នាំ២០១៧ និយាយរួមគឺ៣ថ្ងៃ មុនការសម្រេចរបស់លោក នុត ជា។

ក្នុងលិខិត ដែលត្រូវបានផ្សព្វផ្សាយ កាលពីថ្ងៃទី១៩ ខែកក្កដា​ម្សិលម៉ិញ លោក នុត ជា ប្រធានគណបក្សប្រជាជនកម្ពុជា ប្រចាំរាជធានីភ្នំពេញ បានសម្រេចបញ្ចូលកញ្ញា ធី សុវណ្ណថា ឲ្យក្លាយជាសមាជិកគណបក្ស ដោយយោងតាមសំនើរ ចុះលេខ០៣/ ១៧លស ចុះថ្ងៃទី២១ ខែមិថុនា ឆ្នាំ២០១៧ របស់គណៈកម្មាធិការសាខាគណបក្ស គណៈចាត់តាំងគណបក្សរាជធានីភ្នំពេញ និងតាមពាក្យស្នើសុំ ចូលជាសមាជិក របស់សាមីខ្លួន (កញ្ញា ធីសុវណ្ណថា) ដែលត្រូវបានធ្វើឡើង នៅដើមខែឧសភា នៅពីរថ្ងៃ មុនថ្ងៃដែលលោក ហ៊ុន សែន ចេញឃោសនាបោះឆ្នោតដោយផ្ទាល់។

ប៉ុន្តែបណ្ណសម្គាល់សមាជិកគណបក្ស របស់កញ្ញា ធី សុវណ្ណថា បានបង្ហាញថា លោក ហ៊ុន សែន ប្រធានគណបក្ស បានទទួលស្គាល់កញ្ញា «ចៅតា» ឲ្យក្លាយជាសមាជិក តាំងពីថ្ងៃទី ២២ ខែមិថុនា ឆ្នាំ២០១៧ មកម្លេះ។

» អត្ថបទទាក់ទង៖ ធី សុវណ្ណថា សុំ​​ចូល​​ធ្វើ​​នយោបាយ​​ជាមួយ CPP

ការសម្រេចខាងលើ ដែលហាក់មានលក្ខណៈ ជា«ការកាត់ក្បាលតម្រូវមួក» រមែងអីបង្កចំងល់ សម្រាប់អ្នកគាំទ្រគណបក្សប្រជាជនកម្ពុជាមួយភាគ និងមតិសាធារណជនទូទៅ។ អ្នកខ្លះថែមទាំងចោទសួរថា ហេតុតែ «តានិងចៅគេ» ទើបបង្កឲ្យមនុស្សនៅក្រោមបង្គាប់ផ្សេងទៀត ត្រូវរត់ខ្វែងដៃខ្វែងជើង ដើម្បីធ្វើការសម្រេច «តាមក្រោយ»ដូច្នេះ។

ដូចការបំភ្លឺរបស់លោក ជុំ កុសល ទីប្រឹក្សានាយករដ្ឋមន្ត្រី និងជាអ្នកធ្វើអត្ថាធិប្បាយនយោបាយ នៅតាមកញ្ចក់ទូរទស្សន៍ថា ការសម្រេចខាងលើ ត្រូវបានធ្វើឡើង តាមនីតិវិធី និងលក្ខន្តិកៈរបស់គណបក្សទាំងស្រុង។ លោក ជុំ កុសល បានសរសេរនៅលើបណ្ដាញសង្គម ពន្យល់ថា៖ «នេះគឺជានីតិវិធីត្រូវបំពេញ តាមលក្ខន្តិក:គណបក្សប្រជាជនកម្ពុជា មាត្រា៥ និងមាត្រា៦ ជំពូកបី យោងតាមសំនើរូបវន្តបុគ្គល ដើម្បីអោយក្លាយជាសមាជិកពេញសិទ្ធិរបស់គណបក្ស»។

ទីប្រឹក្សានាយករដ្ឋមន្ត្រី បានបន្តទៀតថា៖ «កញ្ញា ធី សុវណ្ណថា អតីតកាលគាត់ គឺជាសកម្មជនរបស់គណបក្សសង្គ្រោះជាតិ តែក្រោយមក គាត់បានចាកចេញ ហើយក៏បានស្នើសុំចូលរួម ជាមួយគណបក្សប្រជាជនកម្ពុជា។ ដូច្នេះសេចក្តីសម្រេច ស្តីពីការយល់ព្រមបញ្ចូលកញ្ញា ធី សុវណ្ណាថា សមាជិកគណបក្សប្រជាជនកម្ពុជានេះ គឺផ្អែកលើលក្ខន្តិក:គណបក្សត្រឹមត្រូវ ។ អាស្រ័យហេតុនេះសូមបងប្អូន ដែលជាសមាជិកគណបក្សប្រជាជនកម្ពុជាតាំងពីដើមមក មេត្តាកុំយល់ច្រឡំថា តាមរយ:សេចក្តីសម្រេចនេះ គណបក្សលើកតម្កើង ឬមើលឃើញតែអ្នកថ្មី រំលងអ្នកចាស់អោយសោះ។»។

លោក ជុំ កុសល បញ្ជាក់ថា៖ «គណបក្សប្រជាជនកម្ពុជា គ្មានគោលការណ៏រើសអើងនិន្នាការ អតីតកាល ឬបែងចែងអ្នកថ្មីអ្នកចាស់នោះទេ។»៕

សហភាព​អឺរ៉ុប​ព្រួយ​បារម្ភ​ចំពោះ​ច្បាប់​ថ្មី ស្ដី​ពី​គណបក្ស​នយោបាយ

សហភាព​អឺរ៉ុប​ព្រួយ​បារម្ភ​ចំពោះ​ច្បាប់​ថ្មី ស្ដី​ពី​គណបក្ស​នយោបាយ

ការធ្វើវិសោធនកម្មជាថ្មី ទៅលើច្បាប់ស្ដីពីគណបក្សនយោបាយ ត្រូវបានសហភាពអ៊ឺរ៉ុបសំដែងក្ដីព្រួយបារម្ភ របស់ផងខ្លួន និងហៅការបន្ថែមពាក្យពេជន៍ថ្មីៗ នៅក្នុងការធ្វើវិសោធនកម្មនោះ ថាបាន«បើកចំហ ឲ្យមានការបកស្រាយទូលំទូលាយ និងតាមតែអំពើចិត្ត»។ នេះ បើតាមការលើកឡើង របស់អ្នកស្រី «Genoveva Hernandez Uriz» ភារធារីទទួលបន្ទុកខាងនយោបាយ និងជាតំណាងគណៈប្រតិភូសហភាពអ៊ឺរ៉ុប ប្រចាំប្រទេសកម្ពុជា។

ការលើកឡើង របស់អ្នកស្រី តំណាងគណៈប្រតិភូសហភាពអ៊ឺរ៉ុបខាងលើ ត្រូវបានស្រង់សំដីដោយសារព័ត៌មាន ចេញផ្សាយប្រចាំថ្ងៃ «The Cambodia Daily» ស្របពេលនឹងការរិះគន់ របស់គណបក្សនយោបាយ ដែលគ្មានអសនៈនៅក្នុងរដ្ឋសភា និងអង្គការសង្គមស៊ីវិលមួយចំនួន នៅចំពោះការកែច្បាប់ថ្មី ដែលជាបទបញ្ជារបស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា កាលពីចុងខែកន្លងមក។

បញ្ជានោះ ត្រូវបានលោក ហ៊ុន សែន ធ្វើឡើងនៅចំពោះសមាជិក និងអ្នកគាំទ្ររាប់ពាន់នាក់ ក្នុងពិធីរំលឹកខួបអនុស្សាវរីយ៍ លើកទី ៦៦ ថ្ងៃបង្កើតគណបក្សប្រជាជនកម្ពុជា ថ្ងៃទី២៨ ខែមិថុនានេះ នៅលើមជ្ឈមណ្ឌលកោះពេជ្រ បន្ទាប់ពីលោក ហ៊ុន សែន បានលើកឡើង ដោយមិនចេញឈ្មោះ សំដៅទៅលោក សម រង្ស៊ី ថាមេដឹកនាំ​ប្រឆាំង ដ៏មានសក្ដានុពល​រូបនេះ នៅតែមានសកម្មភាព«ផ្សារភ្ជាប់»ជាមួយ ជាមួយគណបក្សសង្គ្រោះជាតិដដែល។

លោក សុខ ឥសាន អ្នកនាំពាក្យគណបក្សប្រជាជនកម្ពុជា ក៏បានប្រកាសប្រាប់សារព័ត៌មាន «The Cambodia Daily» កាលពីដើមខែកក្កដាដែរថា ការធ្វើវិសោធនកម្មជាលើកទី២ ទៅលើច្បាប់ដ៏ចម្រូងចម្រាស់ ជាការប៉ុនប៉ង«សម្លាប់ជីវិតនយោបាយ សម រង្ស៊ី»។

នៅក្នុងវេទិកា​តុ​មូល ​ស្ដីពី​វិសោធនកម្ម​ច្បាប់​ ស្ដីពី​គណបក្ស​នយោបាយ ​ដែល​រៀបចំ​ឡើង​ដោយ​រាជបណ្ឌិត្យសភា​កម្ពុជា កាល​ពី​ព្រឹក​ថ្ងៃ​ទី​១៩ ខែកក្កដាម្សិលម៉ិញ អ្នក​នយោបាយ​មក​ពី​គណបក្ស ​ដែល​ពុំ​មាន​សំឡេង​ក្នុង​រដ្ឋសភា បានយល់​ឃើញប្រហាក់ប្រហែលគ្នា​ថា ច្បាប់ថ្មី​នេះ​ ហាក់​ធ្វើ​ទៅ​តាម​ការ​ចង់​បាន ​របស់​លោក​នាយក​រដ្ឋមន្ត្រី ហ៊ុន សែន សុទ្ធសាធ និងមានបំណងដាក់កំហិត ទៅលើតែ«បុគ្គល សម រង្ស៊ី»ម្នាក់។

ប្រធាន​គណបក្ស​អំណាច​ខ្មែរ លោក សួន សេរីរដ្ឋា ចាត់​ទុក​ច្បាប់​នេះ​ ថាត្រូវបានតាក់តែង​ឡើង​ មិន​ឆ្លុះ​បញ្ចាំង​ពី​ឆន្ទៈ​របស់​ពលរដ្ឋ​ ជា​ម្ចាស់​ឆ្នោត​នោះ​ទេ តែហាក់ដូចជាច្បាប់ ​ដើម្បីការ​ឈ្នះ​ចាញ់ ​រៀងៗ​ខ្លួន របស់អ្នកនយោបាយ។ ចំពោះតំណាង​ ពី​គណបក្ស​ប្រជាធិបតេយ្យ​មូលដ្ឋាន លោក សាម ស៊ុនឌឿន បានបង្ហាញ​ការ​សោកស្ដាយ​ ចំពោះអ្នក​នយោបាយ ដែលមិនធ្វើកិច្ចការ​ដែល​ត្រូវ​ធ្វើ ដូចជា​ជួយ​រក​ទីផ្សារ​កសិផល​ឲ្យ​កសិករ​ បែរ​ជា​មក​ប្រកួត​ប្រជែង ​តាមរយៈការកែច្បាប់នេះ​ទៅ​វិញ។

ការធ្វើវិសោធនច្បាប់ថ្មី ត្រូវបានអនុម័តជាឯកច្ឆន្ទ កាលពីថ្ងៃទី១០ ខែកក្កដា ដោយរដ្ឋសភាជាតិ និងបន្ទាប់មក ត្រូវបានបន្តអនុម័តជាឯកច្ឆន្ទ​ កាលពីថ្ងៃទី១៨ ខែកក្កដានេះ ដោយព្រឹទ្ធសភា ដែលមានការចូលរួមប្រជុំ តែពីសមាជិកសភា និងសមាជិកព្រឹទ្ធសភា មកពីគណបក្សប្រជាជនកម្ពុជាប៉ុណ្ណោះ។ សមាជិកសភាព មកពីគណបក្សសង្គ្រោះជាតិ និងសមាជិកព្រឹទ្ធសភា មកពីគណបក្សសមរង្ស៊ី បានប្រកាសធ្វើពហិការ មិនចូលរួមប្រជុំ ដើម្បីអនុម័តច្បាប់ថ្មីនេះទេ ទាំងនៅក្នុងរដ្ឋសភា និងព្រឹទ្ធសភា។

លោក ឌុច ពិសិដ្ឋ នាយក​ផ្នែក​តស៊ូ​មតិ​ នៃ​មជ្ឈមណ្ឌល​សិទ្ធិ​មនុស្ស​កម្ពុជា (CCRH) បានថ្លែងនៅក្នុងវេទិកា​តុ​មូល រៀបចំ​ឡើង​ដោយ​រាជបណ្ឌិត្យសភា​កម្ពុជា ​ថាការកែច្បាប់​ថ្មីនេះ អាចជាបំណង ចង់ឲ្យ​គណបក្ស​នយោបាយ និង​អ្នក​នយោបាយ​ មាន​ភាព​ស្អាតស្អំ ក៏ប៉ុន្តែ​មាត្រា​ថ្មី​ៗនៃ​ច្បាប់នេះ នៅ​តែ​ជា​ការ​បារម្ភ​នៅ​ឡើយ ​ចំពោះ​សង្គម​ស៊ីវិល។ លោក​បានចោទសួរថា ការ​កែប្រែច្បាប់​​ញឹកញាប់​ពេក និង​ម្យ៉ាង​ទៀត ស្របពេលនឹងពេលវេលា ដែលកៀក​នឹង​ការ​បោះឆ្នោត​ផង តើ​វាជា​ភាព​ចាំបាច់ឬ​ទេ ដែល​ត្រូវ​ធ្វើ​វិសោធនកម្មច្បាប់បែបនេះ?