គ្មាន​មន្ត្រី​អាមេរិក​ផ្លូវការ​ណា​ម្នាក់ ចូលរួម​សង្កេត​ការបោះឆ្នោត​ជាតិ​នេះ​ទេ

ស្ថានទូតអាមេរិក ទើបនឹងប្រកាសឲ្យដឹង នៅក្នុងសេចក្ដីថ្លែងការណ៍របស់ខ្លួន ដែលចេញផ្សាយនៅមុននេះថា នៅចំពោះការវិវត្តន៍ ផ្នែកនយោបាយកម្ពុជា ដែលពោរពេញដោយកង្វល់ រដ្ឋាភិបាលអាមេរិក មិនបញ្ជូនភ្ញៀវ ឬអ្នកសង្កេតការណ៍ផ្លូវការ របស់ខ្លួនណាម្នាក់ មកចូលរួមសង្កេតការបោះឆ្នោតជាតិ នៅកម្ពុជា ដែលនឹងប្រព្រឹត្តិទៅ នៅប៉ុន្មានថ្ងៃខាងមុខនេះឡើយ។
គ្មាន​មន្ត្រី​អាមេរិក​ផ្លូវការ​ណា​ម្នាក់ ចូលរួម​សង្កេត​ការបោះឆ្នោត​ជាតិ​នេះ​ទេ
លោក វីល្លៀម ហេត ឯកអគ្គរដ្ឋទូតអាមេរិក ប្រចាំនៅកម្ពុជា នៅក្នុងសន្និសីទសារព័ត៌មាន កាលពីរសៀលថ្ងៃទី១២ ខែកញ្ញា ឆ្នាំ២០១៧។ (រូបថត MONOROOM.info/ Dara)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី២៥ កក្កដា ២០១៨
  • កែប្រែចុងក្រោយ: July 25, 2018
  • ប្រធានបទ: បោះឆ្នោតជាតិ
  • អត្ថបទ: មានបញ្ហា?
  • មតិ-យោបល់

«គ្មានភ្ញៀវ ឬអ្នកសង្កេតការណ៍ផ្លូវការណាម្នាក់ មកពីរដ្ឋាភិបាលសហរដ្ឋអាមេរិក នឹងចូលរួមសង្កេតការបោះឆ្នោតជាតិ នៅកម្ពុជា នៅថ្ងៃទី ២៩ ខែកក្កដា ឆ្នាំ ២០១៨ ទេ» នេះ ជាការបញ្ជាក់ឡើង របស់ស្ថានទូតសហរដ្ឋអាមេរិក ប្រចាំនៅកម្ពុជា តាមរយៈសេចក្ដីថ្លែងការណ៍មួយ ដែលទើបនឹងចេញផ្សាយ នៅថ្ងៃទី២៥ ខែកក្កដា ឆ្នាំ២០១៨ ប៉ុន្មានម៉ោងមុននេះ។

សេចក្ដីថ្លែងការណ៍ បានបន្តថា៖ «ការសម្រេចចិត្តនេះ គឺស្របតាមសេចក្តីថ្លែងការណ៍ របស់សហរដ្ឋអាមេរិក តាំងពីខែវិច្ឆិកា ឆ្នាំ២០១៧ មក ដែលបានសម្ដែងកង្វល់យ៉ាងជ្រាលជ្រៅ ចំពោះការវិវត្តផ្នែកនយោបាយ នៅប្រទេសកម្ពុជា»។

ម្ដងហើយម្ដងទៀត សហរដ្ឋអាមេរិកតាមរយៈក្រសួងការបរទេស និងតំណាងអចិន្ត្រៃយ៍ នៃរដ្ឋាភិបាលអាមេរិក (ទាំងនៅក្នុងកម្ពុជា និងអាស៊ាន) បានចេញសេចក្ដីថ្លែងការណ៍ ជាបន្តបន្ទាប់ អះអាងពីកង្វល់​ជ្រាលជ្រៅ​របស់ខ្លួន នៅចំពោះការវិវត្ត ផ្នែកនយោបាយ នៅកម្ពុជា ដែលត្រូវបានចាត់ទុកថា ជាការងាកចេញ ពីវិថីប្រជាធិបតេយ្យ និងការគោរពនីតិរដ្ឋ។

អាមេរិក រួមនឹងបណ្ដាប្រទេសធំៗ ផ្សេងទៀត នៅបស្ចឹមលោក ថែមទាំងព្រមានថា ការបោះឆ្នោតជាតិ នៅប៉ុន្មានថ្ងៃខាងមុខ នឹងគ្មានភាពស្របច្បាប់ទេ បន្ទាប់ពីគណបក្សប្រឆាំងដ៏ធំមួយ ដែលមានការគាំទ្រពីពលរដ្ឋខ្មែរ ប្រមាណជិតពាក់កណ្ដាលប្រទេស ត្រូវបានរំលាយចោល ប្រធានគណបក្សត្រូវបានចាប់ឃុំ និងមន្ត្រីមកពីគណបក្សនេះ ជាង១០០នាក់ ត្រូវបានហាមឃាត់ មិនឲ្យធ្វើនយោបាយនោះ។

ប៉ុន្តែលោក ហ៊ុន សែន នាយករដ្ឋមន្ត្រីបីទសវត្សន៍ជាង របស់កម្ពុជា ដែលគ្រោងបន្តអំណាច ឲ្យបានយ៉ាងហោច ១០ឆ្នាំទៅមុខទៀត បានអះអាងថា ការបោះឆ្នោត​នៅកម្ពុជា មិនចាំបាច់មានការទទួលស្គាល់ ពីប្រទេសណាផ្សេង ឬក៏អង្គការសហប្រជាជាតិនោះឡើយ។

គណៈកម្មាធិការជាតិ រៀបចំការបោះឆ្នោត (គ.ជ.ប) បានបិទបញ្ជីចុះឈ្មោះ អ្នកសង្កេតការបោះឆ្នោត តាំងពីថ្ងៃទី១៨ ខែកក្កដា ដោយបានជូនដំណឹងថា អ្នកសង្កេតការបោះឆ្នោត ដែលជាជនជាតិបរទេស មានប្រមាណជាង២០០នាក់ រួមទាំងអ្នកសង្កេតការណ៍ មកពីប្រទេសចិន កុម្មុយនីស្ដិ៍។ ក្រៅពីនេះ គ.ជ.ប បានទទួលចុះបញ្ជី នូវអ្នកសង្កេតការណ៍ជាតិ ជាច្រើនម៉ឺននាក់ ដែលក្នុងនោះ មានមួយចំនួនធំ ត្រូវបានគេមើលឃើញថា មាននិន្នាការលំអៀង និងដឹកនាំដោយក្រុមស្និត នឹងគណបក្សប្រជាជនកម្ពុជា ដែលកំពុងកាន់អំណាច៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...