នៅក្នុងប្រទេសមួយ ដែលមិនដែលលេងសើច សូម្បីបន្តិច ជាមួយនឹងការគោរព​ ដល់ព្រះមហាក្សត្រខ្លួននោះ រូបថតនៃរាជទាយាទ (ឬព្រះអង្គម្ចាស់ស្នងរាជ្យ) របស់រាជាណាចក្រថៃ ដែលត្រូវបានថត និងផ្សាយ​ព្រោង​ព្រាត នៅក្នុងប្រទេសអាល្លឺម៉ង់ អាចនឹងបិតបញ្ចប់ជាស្ថាពរ ការឡើងស្នងរាជ្យសម្បត្តិ របស់​ព្រះអង្គ​ម្ចាស់​អង្គ​នេះ បន្ត​ពី​ព្រះរាជា​សព្វថ្ងៃ ដែលជាបិតារបស់ព្រះអង្គ។

រូបថតនេះ បង្ហាញពីការយាងចុះ របស់ព្រះអង្គម្ចាស់ ម៉ាហា វ៉ាជីរ៉ាឡុងកន (Maha Vajiralongkorn) ពី​យន្ដហោះ​​នៅ​ព្រលាន​យន្ដហោះ​ក្រុង ម៉ូនិក (Munich) ភាគខាងត្បូងនៃប្រទេសអាល្លឺម៉ង់ ដោយ​មាន​ក្រាល​ទ្រនាប់​ព្រះបាត ដោយ​​កម្រាលព្រំ និងហែហមដោយមន្ត្រីអ្នកមុខអ្នកការ កងអង្គរក្ស ពាក់ដោយឯក​សណ្ឋាន​របស់​ជាតិ ជា​ច្រើន​នាក់។

LOL. The guy on the left with that sexy outfit is the Thai Prince Vajiralongkorn pic.twitter.com/mBVW8ImgGl

— Amos Yee Kuan Yew (@amosyee) 21 juillet 2016

បន្ថែមពីលើនេះ រូបថតបានបង្ហាញទៀតថា នៅចំពោះកាយវិការ«គំនាប់» របស់មន្ត្រីយោធាថៃ ព្រះរាជ​បុត្រ​ស្នង​រាជ្យ បានទ្រង់គ្រឿងដោយខោខូវប៊យ ពាក់អាវខ្លីបង្ហាញសាច់ ដែលមានរូបសាក់ពាសពេញ ព្រមទាំង​មាន​សត្វ​ឆ្កែ​មួយ​ក្បាល ឈ្មោះ «Foo-Foo» នៅនឹងព្រះហស្ថនោះផង។

សារព័ត៌មានអាល្លឺម៉ង់ «Bild» បានបញ្ជាក់ថា រាជទាយាទព្រះជន ៦៣ព្រះវស្សាអង្គនេះ នឹងយាងក្រសាល នៅក្នុងកម្មវិធីសប្បាយជាច្រើន ព្រមទាំងគ្រោង​ធ្វើការចាយវាយ ទិញសម្ភារៈគ្រឿងលំអខ្លួន ជាមួយនឹង «អ្នក​ម្នាង​កំណាន់» អាយុ​៣២ឆ្នាំ ឈ្មោះ ស៊ូធីតា (Suthida) នៅក្នុង​ប្រទេស​អាល្លឺម៉ង់។ សារព័ត៌មានបាន​បង្ហើប​ទៀត​​ថា ព្រះអង្គ​​ម្ចាស់​​​ទំនង​​ជា​បាន​ទិញ ភូមិ​គ្រឹះ​មួយ​នៅ​ក្នុង​​តំបន់​​ជុំវិញ​ក្រុង ម៉ូនិក ដែលមានតម្លៃ ប្រមាណ​ជា១០​លាន​​​អ៊ឺរ៉ូ (ប្រមាណ​ជា១២​លាន​​ដុល្លារ) សម្រាប់​ទុក​ក្រសាល​ម្ដងម្កាល នៅទីនោះ។

រូបថតទាំងនេះ ជៀសមិនផុត ពីការយកទៅបង្ហោះ នៅពាសពេញ​លើបណ្ដាញសង្គម ជាពិសេស​បណ្ដាញ​សង្គម នៅក្នុងប្រទេសថៃ ដោយបង្ក​ឲ្យមានការរិះគន់ តាមបែប​បញ្ឆិត​បញ្ឆៀង​នោះឡើយ។ ហើយការរិះគន់ នៅ​តែ​​កើត​​មាន បើ​ទោះ​ជា​ច្បាប់ «លិតព្រះបាតទា» របស់ថៃ កំពុងត្រូវ​បាន​អនុវត្ត​ជាធរមាន​​យ៉ាងខ្លាំងក្លា ពី​សំណាក់​​រដ្ឋាភិបាល​យោធាសព្វថ្ងៃ យ៉ាងណាក៏ដោយ។ បើតាមច្បាប់នេះ នរណាក៏ដោយដែលហ៊ានចំអក ឬ​រិះគន់​​ដល់​​សមាជិក នៃ​ព្រះ​ញាតិ​វង្ស (រួមទាំងឆ្កែរបស់ទ្រង់ផង) អាចនឹងរងការផ្ដន្ទាទោស ឲ្យជាប់ពន្ធនាគារ​ជា​ច្រើន​ឆ្នាំ។

ព្រះអង្គម្ចាស់ ម៉ាហា វ៉ាជីរ៉ាឡុងកន មិនមានប្រជាប្រិយភាពប៉ុន្មានទេ នៅក្នុងប្រទេសរបស់ទ្រង់។ ក្រុមអ្នក​ធ្វើ​អត្ថាធិប្បាយ ដែលមានដើមកំណើតថៃ នៅឯបរទេស បានរំពឹងថា រូបថតទាំងប៉ុន្មានខាងលើនេះ អាចនឹង​បិត​បញ្ចប់ នូវ​ឱកាស​របស់ទ្រង់ ក្នុងការឡើងស្នងរាជ្យ បន្តពីព្រះបិតា (ព្រះមហាក្សត្រសព្វថ្ងៃ) ដែលបានធ្លាក់​ព្រះ​កាយ​​ប្រឈួន តាំង​ពីច្រើន​ឆ្នាំ​មក​ហើយ៕