ព្យុងយ៉ាងគម្រាមប្រើ«សកម្មភាពពិត» ប្រឆាំងប្រព័ន្ធការពារកាំជ្រួច
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី១២ កក្កដា ២០១៦
- កែប្រែចុងក្រោយ: July 12, 2016
- ប្រធានបទ: ឧបទ្វីបកូរ៉េ
- អត្ថបទ: មានបញ្ហា?
- មតិ-យោបល់
-
កាលពីថ្ងៃចន្ទម្សិលម៉ិញ ប្រទេសកុម្មុយនីសកូរ៉េខាងជើង បានគម្រាមប្រើ«សកម្មភាពពិត»មួយ ប្រឆាំងនឹងប្រព័ន្ធការពារកាំជ្រួច មានឈ្មោះ «THAAD» របស់អាមេរិក ដែលគ្រោងនឹងត្រូវតម្លើង នៅក្នុងប្រទេសកូរ៉េខាងត្បូង។
«សាធារណរដ្ឋប្រជាមានិត ប្រជាធិបតេយ្យកូរ៉េ (ឈ្មោះផ្លូវការ របស់កូរ៉េខាងជើង) នឹងបើកធ្វើប្រតិបត្តិការ នូវ"សកម្មភាពពិត"មួយ ដើម្បីត្រួតពិនិត្យឲ្យបានពេញលេញ នូវប្រព័ន្ធ"THAAD" ហើយសកម្មភាពនេះ នឹងកើតមាន នៅពេលដែលទីតាំងរបស់ប្រព័ន្ធនេះ ត្រូវបានដឹងច្បាស់រួចហើយ» នេះ ជាការប្រកាសឲ្យដឹង របស់មេបញ្ជាការរបស់កងទ័ពកាំភ្លើងធំ នៃប្រទេសកូរ៉េខាងជើង តាមរយៈទីភ្នាក់ងារព័ត៌មានផ្លូវការ «KCNA» របស់ប្រទេសនេះ។
សេចក្ដីប្រកាសព័ត៌មានដដែលនោះ បានបន្តទៀតថា៖ «កងទ័ពកូរ៉េខាងជើង ដែលមានមធ្យោបាយគ្រប់គ្រាន និងទំនើបសម្បូរបែប ក្នុងការវាយលុកនោះ នឹងអនុវត្តន៍ នូវវិធានការខ្លាំងៗ ដែលមិនដែលធ្លាប់មាន និងមានឥទ្ធិពលជាងគេបំផុត ប្រឆាំងនឹងសហរដ្ឋអាមេរិក ដែលមានបំណងចង់បញ្ឆេះសង្គ្រាម តាមយៈការដាក់ពង្រាយ ប្រព័ន្ធ"THAAD"»។
មិនដឹងពេលណា...
ការប្រកាសនោះ ក៏បានព្រមានប្រទេសកូរ៉េខាងត្បូងដែរថា ការយល់ព្រមការដាក់ពង្រាយ នូវប្រព័ន្ធការពារកាំជ្រួច នៅលើទឹកដៅរបស់ខ្លួន នឹងបង្កើនូវការ«បំផ្លាញខ្លួនឯងមួយ ដ៏វេទនាជាទីបំផុត»។
កាលពីចុងសប្ដាហ៍មុន ប្រទេសអាមេរិក និងសម្ព័ន្ធមិត្ត កូរ៉េខាងត្បូង របស់ខ្លួន បានប្រកាសឲ្យដឹងថា ប្រព័ន្ធការពារកាំជ្រួច «THAAD» ដែលជាអក្សរកាត់ ពីឃ្លាអង់គ្លេស «Terminal High Altitude Area Defence» និងដែលជាប្រព័ន្ធប្រឆាំងមីស៊ីល ដ៏ទំនើបជាងគេមួយនៅក្នុងពិភពលោក នឹងត្រូវតម្លើងនៅលើទឹកដីកូរ៉េខាងត្បូង ដើម្បីទប់ទល់នឹងការគម្រាមទាំងឡាយ ដែលអាចកើតឡើងជាយថាហេតុ ពីសំណាក់ប្រទេសកូរ៉េខាងជើង។ ចំពោះថ្ងៃខែ និងទីកន្លែងវិញ នៅមិនទាន់ប្រាប់ឲ្យដឹងនៅឡើយ។
យ៉ាងណាក៏ដោយ ក៏រាល់ការគម្រាមទាំងឡាយ របស់ប្រទេសកុម្មុយនីស កម្រ ឬមិនដែលត្រូវបានយកមកអនុវត្តន៍ ឲ្យចេញជារូបរាងណាស់៕