នាយករដ្ឋមន្ត្រីអ៊ុយក្រែន ប្រកាសលាលែងពីតំណែង
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១១ មេសា ២០១៦
- កែប្រែចុងក្រោយ: April 12, 2016
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
«ក្រោយពីបានធ្វើ នូវអ្វីដែលខ្ញុំអាចធ្វើបាន ដើម្បីធានានូវស្ថិរភាព របស់ប្រទេស និងបង្កបង្កើតនូវការផ្លាស់ប្ដូរមួយ ដ៏ស្ងប់ស្ងៀមដូចនេះមក ខ្ញុំសម្រេចចិត្ត ធ្វើការលាឈប់ ពីតួនាទីជានាយករដ្ឋមន្ត្រី នៃប្រទេសអ៊ុយក្រែន»។ នេះជាការថ្លែងប្រកាស របស់នាយករដ្ឋមន្ត្រីអ៊ុយក្រែន លោក អារសឺនី អៀតសឺនីអ៊ុក (Arseni Iatseniouk) នៅតាមកញ្ចក់ទូរទស្សន៍ក្នុងស្រុក ដើម្បីដាក់បញ្ចប់នូវតំណែងរបស់លោក ដែលរូបលោកបានអង្គុយ តាំងពីឆ្នាំ២០១៤មក។
ការលាលែងពីតំណែង របស់លោក អារសឺនី អៀតសឺនីអ៊ុក បានធ្វើឡើងនៅពីរខែ ក្រោយការប៉ុនប៉ងមិនបានសម្រេច ដើម្បីទម្លាក់រដ្ឋាភិបាលរបស់លោក ពីសំណាក់រដ្ឋសភាអ៊ុយក្រែន ដោយមកពីមិនមានសម្លេងគ្រប់គ្រាន់។ នៅពេលនោះ បើសូម្បីលោកប្រធានាធិបតី ប៉េត្រូ ប៉ូរ៉ូឆេនកូ (Petro Porochenko) ក៏បានអំពាវនាវឲ្យលោក អារសឺនី ធ្វើការលាលែងពីតំណែងដែរ នៅបន្ទាប់ពីរឿងអាស្រូវពុករលួយជាច្រើន បានផ្ទុះឡើងជាបន្តបន្ទាប់គ្នា។
លោក អារសឺនី មានការគាំទ្រយ៉ាងច្រើន ពីសំណាក់ប្រទេសធំៗ នៅលោកខាងលិច។ ប៉ុន្តែនៅប៉ុន្មានខែចុងក្រោយនេះ លោកបានរងការរិះគន់យ៉ាងធ្ងន់ធ្ងរ ពីភាពយឺតយ៉ាវក្នុងដំណើរការ នៃការធ្វើកំណែទម្រង់ទាំងឡាយ ដែលរដ្ឋាភិបាលរបស់លោក បានសន្យា។ លោកបានបន្តថ្លែងការពារខ្លួនថា៖ «វិបត្តិនយោបាយ នៅក្នុងប្រទេសអ៊ុយក្រែន មានលក្ខណៈជាការរៀបចំប្រឌិតឡើង។ មហិច្ឆតាដែលចេះតែចង់ប្ដូរមនុស្សចេញ បានធ្វើឲ្យអ្នកនយោបាយងងឹតភ្នែក និងបានរំខានដល់កំណែទម្រង់ពិតប្រាកដ សម្រាប់ប្រទេសនេះ។»។
លោកនាយករដ្ឋមន្ត្រីរូបនេះដដែល បានអះអាងថា ការលាលែងរបស់លោក នឹងត្រូវចូលជាផ្លូវការ នៅថ្ងៃអង្គារនេះ នៅចំពោះរដ្ឋសភា របស់ប្រទេសអ៊ុយក្រែន ហើយលោកប្រធានាធិបតី ប៉េត្រូ ប៉ូរ៉ូឆេនកូ បានតែងតាំងលោក វ៉ូឡូឌីមៀរ គ្រ័អ៊ីស្មាន (Volodymyr Groïssman) ប្រធានរដ្ឋសភាបច្ចុប្បន្ន ឲ្យឡើងស្នងតំណែង និងរៀបចំរដ្ឋាភិបាលថ្មី។ លោកបាននិយាយឲ្យដឹងទៀតថា៖ «ចាប់ពីថ្ងៃនេះតទៅ ខ្ញុំសម្លឹងឃើញបេសកកម្មរបស់ខ្ញុំ មានទំហំធំជាងអំណាច ដែលខ្ញុំនៅជាប្រមុខរដ្ឋាភិបាល»៕