ក្រុមម្ចាស់ផ្ទះ បាសឺឡូន (Barcelona FC) មិនបានទុកមុខឲ្យក្រុម ហ្សេតាហ្វ (Getafe) ដែលជាភ្ញៀវ ខំស្កាត់​ពី​ចំងាយ មកទាត់នៅកីឡាដ្ឋាន កំព្នូ (Camp Nou) របស់ក្រុមអ្នកមានបុណ្យនោះឡើយ។ នៅក្នុងការប្រកួត សន្សំ​ពិន្ទុដើម្បីក្លាយជាជើងឯក នៃការប្រកួតជុំ (Liga) នៅក្នុងប្រទេសអេស្ប៉ាញ កាលពីល្ងាចថ្ងៃសៅរ៍ ក្រុមបាសា (បាសឺឡូន) បានលុតក្រុមហ្សេតាហ្វ ក្នុងពិន្ទុ ៦ ទល់នឹងសូន្យ។

ជាការប្រកួតមួយ ដែលបានអនុញ្ញាត ឲ្យតារាបាល់ទាត់ល្បីៗ នៅក្នុងក្រុមបាសា រកគ្រាប់បាល់ បាន​សឹង​តែ​គ្រប់​គ្នាៗ ក្នុងនោះគេមិនត្រូវភ្លេច ម៉េស៊ី (Neymar) ឬ ណីម៉ា (Messi) ដែលសុទ្ធសឹងជាកំពូលកីឡាករ របស់​ពិភពលោក​នោះឡើយ។ បើនិយាយរំលឹកឡើងវិញ ក្រុមបាសឺឡូនបានរកបានគ្រាប់បាល់ ដល់ទៅ១៥គ្រាប់ នៅ​ក្នុង​តែ​ការប្រកួត បីលើកចុងក្រោយ​គេបំផុត​ប៉ុណ្ណោះ។

គម្រាមដល់ក្រុមអាសឺណល់ របស់អង់គ្លេស...

មិនព្រឺព្រួចមិនបាន ព្រោះនៅក្នុងការជួបជាមួយក្រុម អាសឺណល់ (Arsenal) នាប្រទេសអង់គ្លេស កាល​ពីថ្ងៃ​ទី​២៣ ខែកុម្ភៈ ប៉ុន្មានសប្ដាហ៍មុន សម្រាប់ការប្រកួត«ទៅ» ដើម្បីដណ្ដើមពានជើងឯក នៃ«Champions League» ក្រុមបាសឺឡូន បានបំបាក់ក្រុមអង់គ្លេស ក្នុងពិន្ទុ២ទល់នឹងសូន្យរួចហើយ។ រីឯនៅថ្ងៃពុធខាង​មុខ​នេះ ក្រុម​កាំភ្លើងធំ អាសឺណល់ នឹងត្រឡប់មកជួបក្រុមបាសាវិញ នៅក្នុងប្រទេសអេស្ប៉ាញ ដើម្បីទូទាត់​បញ្ជី​វិញ​ដែរ។ តែក្ដីសង្ឃឹម នៃការទូទាត់បញ្ជី ទំនងមានកាន់តែស្ដើងឡើង ខណៈក្រុមអ្នកមានបុណ្យ បាន​បង្ហាញ​មហិទ្ធិរិទ្ធិ ទុក​ជា​មុន​ហើយនេះ។

ចំពោះចំណាត់ថ្នាក់ នៃការប្រកួតជុំយកពិន្ទុជាជើងឯង (Liga) វិញ ក្រុមបាសឺឡូន ដែលស្ថិតនៅលំដាប់ទីមួយ បាននាំមុខក្រុម អាត្លង់ទីកូ (ចំណាត់ថ្នាក់លេខពីរ) ដល់ទៅ៨ពិន្ទុ និងនាំមុខក្រុមរៀល (ចំណាត់ថ្នាក់លេខ៣) ដល់ទៅ១៥ពិន្ទុ៕