សូមតុលាការជួយផ្តល់នូវយុត្តិធម៌ និងជួយទទួលខុសត្រូវ លើគ្រួសារអ្នកស្រី ដែលត្រូវបានគេប៉ងយាយី ជា​បន្ត​បន្ទាប់នោះផង។ នេះជាការស្រែកតវ៉ា ខ្លាំងៗ នៅមុខតុលាការកំពូល កណ្ដាលរាជធានីភ្នំពេញ កាលពីថ្ងៃទី១៤ ខែកញ្ញា ឆ្នាំ២០១៥ របស់អ្នកស្រី ប៉ោ អឿន (ហៅយាយផាន់) មកពីភូមិថ្មដូន ស្រុកបន្ទាយអំពិល ក្នុងខេត្ត​ឧត្ដរ​មានជ័យ បន្ទាប់ពីអ្នកស្រី ត្រូវបានមន្ត្រីសន្តិសុខ​យាមតុលាការកំពូល មិនអនុញ្ញាតឲ្យចូលតុលាការ ដើម្បី​សួរ​រក​ហេតុផលខុសត្រូវឡើយ។

ជាប់ពន្ធនាគារ ខណៈខ្លួនគ្មានទោស...

ការស្រែកតវ៉ា ដែលមិនទទួលលទ្ធផល បានធ្វើឲ្យអ្នកស្រី ក្នុងវ័យ៤៩ឆ្នាំ ងាកមកផ្ដល់កិច្ចសម្ភាស ឲ្យ​ទស្សនាវដ្តី​មនោរម្យ.អាំងហ្វូ ជាមួយនឹងពាក្យថា «អយុត្តិធម៌ណាស់»។ អ្នកស្រី ប៉ោ អឿន ដែលបានរងការ​ចោទប្រកាន់ ក្នុងសំនុំរឿង«ឃាតកម្ម»មួយ តាំងពីឆ្នាំ២០០៤ មកនោះ បាននិយាយរៀបរាប់ថា ស្ត្រីដើមបណ្តឹង អ្នកស្រី ហេង ឡាយហៀង ដែលមាន«ប្តីខ្លួន លោក គឹម សុខលី ស្លាប់នៅក្នុងព្រៃ» បានប្តឹងអ្នកស្រី មកកាន់សាលាដំបូង​ខេត្ត​សៀមរាប ហើយតុលាការខេត្តមួយនេះ នៅពេលនោះ បានសម្រេចចាប់ និងឃុំខ្លួនអ្នកស្រី អស់រយៈពេលជាង​ប្រាំមួយខែ។

អ្នកស្រីបន្តថា ក្រោយការអង្កេត សាលាដំបូងខេត្តសៀមរាប មិនបានរកឃើញកំហុស ដែលទាក់ទងនឹងការ​សម្លាប់ «ប្ដីដើមបណ្ដឹង»នោះ ក៏សម្រេចដោះលែងអ្នកស្រី ឲ្យទៅរស់នៅជាធម្មតា នៅស្រុកភូមិវិញ។ ក្នុងឆ្នាំ​២០០៨ (បីឆ្នាំក្រោយការដោះលែង) អ្នកស្រីត្រូវបានសាលាឧទ្ធរណ៍ ក្នុងរាជធានីភ្នំពេញ ចេញដីការកោះហៅ ក្នុងរឿងឃាតកម្មដដែលនេះ បន្ទាប់ពីដើមបណ្តឹង ដែលមិនសុខចិត្តនឹងការសម្រេច របស់តុលាការ​ខេត្ត​សៀមរាប បានប្ដឹងឡើងមកតុលាការ ថ្នាក់កណ្ដាលបន្តទៀត។

ក្នុងជីវភាពទីទាល់ក្រ រស់នៅខេត្តឧត្តមានជ័យ ព្រោះតែធ្វើដំណើរឡើងចុះ មកកាន់សាលាឧទ្ធរណ៍ រហូតដល់​តុលាការកំពូលនេះ អ្នកស្រីត្រូវចំណាយអស់ប្រាស់ជាច្រើន ប្រមាណជាងប្រាំលានរៀល ដែលបានមក ពីការ​ខ្ចី​បុលគេ។ អ្នកស្រីបានបន្ថែមថា បញ្ហានេះមិនទាន់ទាំងត្រូវបានបញ្ចប់ផង បញ្ហាថ្មីបានមកដល់ នោះគឺដីស្រែ​ចំការ​របស់​អ្នកស្រី ត្រូវបានគេរឹបអូសយក ដោយេហតុថាអ្នកស្រី មិនមានលទ្ធភាព ក្នុងការសងបំណុល។

បន្ទាប់ពីរងការចោទ ឥឡូវចោទ ដើមចោទវិញ...

ម្យ៉ាងទៀត ក្នុងអំឡុងពេល ដែលអ្នកស្រីឡើងមកតុលាការ នៅឯភ្នំពេញម្តងៗ សម្ភារៈប្រើប្រាស់បន្តិចបន្តួច លើដី និងនៅក្នុងផ្ទះ ត្រូវបានគេបំផ្លាញចោល ដូចជា អំបិល ប៊ីចេង និងផលដំណាំបន្តិចបន្តួច ហើយមិនដែល​រកមុខឃើញឡើយ។ មិនត្រឹមតែប៉ុណ្ណឹង សមាជិកគ្រួសាររបស់អ្នកស្រី ចំនួន៣នាក់ ប្ដី កូន និងចៅ បានស្លាប់​ជាបន្តបន្ទាប់។ អ្នកស្រីបានដាក់ការទទួលខុសត្រូវ ទៅលើមរណភាពរបស់អ្នកទាំងបីនេះ ទៅលើដើមចោទ ថា​ជាអ្នកដៃដល់។

អ្នកស្រីបានថ្លែងប្រាប់ទស្សនាវដ្តីទៀតថា ដើមបណ្តឹងអ្នកស្រី ហេង ឡាយហៀង បញ្ជាក់ប្រាប់អ្នកស្រីថា គេ​នឹងមិនបញ្ឈប់ការប្តឹងនេះឡើយ ព្រោះតែមិនទាន់រកឃើញឃាតករពិត ដែលសម្លាប់ប្តីរបស់ខ្លួន។ តែបើតាម​ការអះអាង របស់អ្នកស្រី ប៉ោ អឿន អតីតស្ត្រីចុងចោទរូបនេះ បានដាក់ការសង្ស័យថា គឺស្រ្តីឈ្មោះ ហេង ឡាយហៀង នេះទៅវិញទេ ដែលជាអ្នកសម្លាប់ប្តីរបស់ខ្លួនឯងនោះ ហើយរកអ្នកមកទទួលទោសជំនួស ដោយ​បានសម្រេចជ្រើសរើស យកអ្នកស្រីតែម្តង ព្រោះតែអ្នកស្រីល្ងិតល្ងង់។

ការដាក់ការសង្ស័យនេះ ព្រោះតាំងពីការតតាំងក្តីនេះ កើតឡើងនៅសាលាដំបូងខេត្ត រហូតមកដល់​តុលាការ​កំពូល អ្នកស្រី ប៉ោ អឿន បានអះអាងថា មិនដែលឃើញមុខ អ្នកស្រី ហេង ឡាយហៀង នេះ ចេញមកធ្វើការ​ដោះស្រាយ ជាមួយអ្នកស្រីម្ដងណាឡើយ។ អ្នកស្រី ប៉ោ អឿន បានបន្តថា អ្នកដែលដឹងថាលោក គឹម សុខលី (ប្ដីរបស់ដើមបណ្ដឹង) ស្លាប់ និងកន្លែងកើតហេតុ ក៏ជាអ្នកស្រី ហេង ឡាយហៀង ខ្លួន​ឯងនេះដែរ។ អ្នកស្រី​វ័យ​ជិត៥០ឆ្នាំ បានថ្លែងឲ្យដឹងថា៖ «គាត់ហៅអ្នកស្រុកឲ្យជួយរក ថាប្តីគាត់ស្លាប់នៅកន្លែងនេះៗ។ បើគាត់មិន​សម្លាប់ គាត់មិនអាចដឹងថា ប្តីគាត់ស្លាប់ នៅកន្លែងនេះទេ។ (...) ឡេង ឡាយហៀង ហ្នឹងហើយ ជាអ្នក​សម្លាប់។ បើមិនបានសម្លាប់ទេ ចូលមកចរចា (ជជែកទល់មុខគ្នា) ជាមួយនឹងខ្ញុំមក ដែលចោទខ្ញុំថា ខ្ញុំប្រព្រឹត្តិ។ ខ្ញុំចាំតែ​ទទួល (ជជែកទេ) តើ!»

ទស្សនាវដ្ដីនឹងស្វែងរកការបកស្រាយ ពីខាងដើមបណ្ដឹង អ្នកស្រី ហេង ឡាយហៀង ជុំវិញករណីនេះ ហើយ​នឹង​ធ្វើការចុះផ្សាយ នៅក្នុងអត្ថបទលើកក្រោយរបស់ខ្លួន។

សូមបញ្ជាក់ថា ករណីខាងលើនេះ មានកិច្ចអន្តរាគន៍ជាបន្តបន្ទាប់ ឲ្យជួយអ្នកស្រី ពីសំណាក់គណកម្មការ​សិទ្ធិ​មនុស្ស ទទួលពាក្យបណ្តឹង អង្កេតនៃរដ្ឋសភា ដែលមានហត្ថលេខាលោក ញ៉ែម ថ្ថាវី ជាប្រធាន និងចំណារ​អន្តរាគមន៍បន្ថែម ដោយប្រធានរដ្ឋសភា លោក ហេងសំរិន ក្នុងឆ្នាំ២០១២។ តាមសំរង់សាលដីកា របស់សាលា​ឧទ្ធរណ៍ ដែលមានសុពលភាពអនុវត្ត តាមផ្លូវច្បាប់ ចាប់ពីថ្ងៃទី២៧ ខែកញ្ញា ឆ្នាំ២០១២ ជនដែលរួចពីការចោទ​ប្រកាន់ ពីបទ«ឃាតកម្មគិតទុកជាមុន» រួមមានឈ្មោះ ប៉ោ អឿន (អ្នកស្រីផ្ទាល់) អឿ រ៉ូ (ប្ដីរបស់អ្នកស្រី ប៉ោ អឿន) និងបុរសម្នាក់ទៀតដែលពាក់ព័ន្ធដែរ ឈ្មោះ យឹម សេន៕