ប្រធានសម្ព័ន្ធសហជីព ប្រជាធិបតេយ្យកម្មករ កាត់ដេរកម្ពុជា លោក អាត់ ធន់ បានថ្លែងព្រមាន ទៅគ្រប់ភាគី ដែលពាក់ព័ន្ធទាំងអស់ ថាត្រូវធ្វើការកំណត់មួយ​ច្បាស់លាស់ ពីប្រាក់ឈ្នួល(ខែ) «អប្បបរមា» សមរម្យ​ទៅ​តាម​ភាពជាក់ស្តែង នៃសេដ្ឋកិច្ចទីផ្សារសេរី ជូនដល់កម្មករ និយោជិកទាំងអស់នៅកម្ពុជា។ បើមិនដូច្នោះទេ ការ​តវ៉ា បាតុកម្ម និងកូដកម្ម អាចនឹងកើតឡើងគ្រប់ពេល។

លោក អាត់ ធន់ បានថ្លែងដូច្នេះ ក្នុងកិច្ចសម្ភាសជាមួយអ្នកសារព័ត៌មាន បន្ទាប់ពីបញ្ចប់សិក្ខាសាលា​ថ្នាក់​ជាតិ​មួយ ដែលមានត្រីភាគីចូលរួម (តំណាងកម្មករ តំណាងក្រុមហ៊ុន និងក្រសួងការងារ) កាលពីថ្ងៃទី ០៨ ខែកញ្ញា ឆ្នាំ២០១៥ កន្លងមកនេះ។ កន្លងមកក្រុមកម្មករ-និយោជិក បានធ្វើការទាមទារ នូវប្រាក់ខែអប្បបរមា​១៧៧​ដុល្លារ របស់ពួកគេ ដោយបានអះអាងថា ប្រាក់ខែទាបជាងនេះ មិនអាចឆ្លើយតប ទៅនឹងតម្រូវការរស់នៅ​ជាក់​ស្តែង នៃរបបទីផ្សារកម្ពុជាបច្ចុប្បន្នទេ។ រីឯ ក្រសួងការងារបានសម្រេច ដំឡើងប្រាក់ឈ្នួល«គោល» ដល់​កម្មករ​និយោជិត បានត្រឹមតែ ១២៨ដុល្លារអាមេរិកប៉ុណ្ណោះ ចាប់ពីពីថ្ងៃទី១ ខែមករា ដើមឆ្នាំ២០១៥ នេះ​ទៅ។

» សូមទស្សនាការលើកឡើងទាំងស្រុង របស់លោក អាត់ ធន់ ដូចខាងក្រោម៖

ប៉ុន្តែការលើកឡើងខាងលើនេះ ត្រូវបានរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បញ្ជាក់ថា លោកមិនចង់ ឲ្យមានការផ្ទុះឡើង នូវការតវ៉ា ការទាមទារ បាតុកម្ម ឬកូដកម្មណាមួយ កើតចេញពី​កម្មករ និយោជិតនោះឡើយ។ លោកបន្តថា ករណីនេះ ត្រូវមានការខាតបង់ នូវប្រយោជន៍ទាំងសងខាង។ ហើយ​លោកស្នើ ឲ្យយកដំណោះស្រាយមួយ សម្រាប់ការជជែកគ្នា តាមផ្លូវច្បាប់ និងការគោរពច្បាប់ ជាជំនួស​នឹងការតវ៉ាទាំងនោះ។ លោកក៏ស្នើឲ្យមានការអត់ធ្មត់ ដោយរង់ចាំមើលលទ្ធផល នៃប្រាក់ខែអប្បបរមា របស់​កម្មករនិយោជិត សម្រាប់ឆ្នាំ២០១៦ នាពេលខាងមុខនេះ។

លោក អ៊ិត សំហេង បានថ្លែងឲ្យដឹងថា៖ «ឆ្នំានេះ ខ្ញុំគិតថាភាគីទំាងពីរ មានភាពចាស់ទុំ ជុំវិញ បញ្ហាប្រាក់ឈ្នួល​នេះ។ ដូច្នេះភាគីទំាងអស់ត្រូវ ប្រើការវិនិច្ឆ័យ តាមបែបសង្គម លើបញ្ហាប្រាក់ឈ្នួលនេះ ដូចជាស្ថានភាព​គ្រួសារ អត្រាអតិផរណា និងការចំណាយក្នុងការរស់នៅ។ លក្ខណៈវិនិច្ឆ័យ បែបសេដ្ឋកិច្ចមាន ផលិតភាព ភាព​ប្រកួត​ប្រជែង ស្ថានភាពទីផ្សារ ការងារនិងកម្រិតតម្លៃបន្ថែម នៃវិស័យការងារ ក៏ដូចជាបន្ទាត់ក្រីក្រ សម្រាប់​ធ្វើ​ជា​មូលដ្ឋាន ក្នុងការពិភាក្សា ប្រាក់ឈ្នួលផងដែរ។ (...) រង់ចាំមើលការសម្រេចជាថ្មី របស់​អនុគណៈ​កម្មការ​រដ្ឋាភិបាល សម្រាប់ប្រាក់ខែអប្បបរមា ក្នងឆ្នាំ២០១៦ នេះសិន។»

» សូមស្តាប់ការបកស្រាយទាំងស្រុងដូចខាងក្រោម​ របស់លោក អ៊ិត សំហេង៖

ទាមទារប្រាក់ខែ តាមបែបនយោបាយ...

ដោយឡែកប្រធានសហព័ន្ធនិយោជក លោក វ៉ាន់ ស៊ូអៀង បានលើកឡើងថា ការទាបទារប្រាក់ខែ របស់​តំណាងកម្មករនិយោជិតនេះ ត្រូវបានលោកមើលឃើញថា ធ្វើឡើងតាមបែបនយោបាយ។ លោកទទួល​ស្គាល់​ថា ការទាមទារ ឬការតម្លើងប្រាក់ឈ្នួលជាបន្តបន្ទាប់នោះ ត្រូវតែស្របទៅតាមកំណើននៃសេដ្ឋកិច្ច និងក៏​ស្រប​ទៅតាមលទ្ធភាព របស់និយោជកដែរ។ លោក ស៊ូអៀង បានលើកឡើងទៀតថា៖ «ប្រាក់ឈ្នួលអប្បបរមា កម្មករ​និយោជិតត្រូវតែឆ្លុះបញ្ចំាង នូវតថភាពសេដ្ឋកិច្ចទីផ្សារ និងត្រូវតែសមស្រប ទៅនឹងកម្មករនិយោជក ឲ្យ​ដំណើរការ​ល្អ ក្នុងការមានលទ្ធភាព ផ្តល់ប្រាក់ឈ្នួលជួនកម្មករនិយោជិកដែរ។ (...) តថភាពនេះ ត្រូវឡើងតាម​សេដ្ឋកិច្ច​ទីផ្សារ ជាជាងធ្វើសកម្មភាពចំណេញ “នយោបាយ”។ ព្រោះថា ដោយសារតែបញ្ហានយោបាយ ធ្វើ​ឲ្យ​រោងចក្រ​មួយចំនួន នៅកម្ពុជាត្រូវបិទទ្វាបន្តបន្ទាប់។»

«ប្រាក់ឈ្នួលឆ្នាំ២០១៦» នេះ បើទោះជាត្រីភាគីបានជួបគ្នា បីលើករួចមកហើយក្តី តែលទ្ធផលនៃតម្លៃប្រាក់​ឈ្នួលពិតប្រាកដ មិនទាន់ចេញជាផ្លូវការនៅឡើយទេ។ ឯតំណាងកម្មករ នៅតែប្រកាស និងដាក់តម្លៃប្រាក់​ឈ្នួលនេះ ពី១៥៧ ទៅ១៧៧ដុល្លា។ ការសម្រេច និងប្រកាសពីលទ្ធផលនេះជាផ្លូវការ និងត្រូវធ្វើឡើង​នាថ្ងៃ​ទី១ ខែមករា ឆ្នាំ២០១៦ ខាងមុខនេះ។

ក្នុងសន្និសិទថ្នាក់ជាតិមួយ ស្តីពីទំនាក់ទំនងវិជ្ជាជីវៈលើកទី៦ កាលពីថ្មីៗនេះ បានលើកយកបញ្ហាចំនួន«បី» មក​ដាក់ជជែក និងពិភាក្សា ស្វែងរកដំណោះស្រាយ សម្រាប់គ្រប់ភាគីពាក់ព័ន្ធទាំងអស់។ករណីទាំងបីរួមមាន «ការកំណត់ប្រាក់ឈ្នួលអប្បរិមា, ការទាមទារអត្ថប្រយោជន៍ផ្សេងៗ និងការសិក្សាអំពីកូដកម្ម បាតុកម្ម»។ តាម​សិក្ខាសាលានេះ បានបង្ហាញថា វិស័យកាត់ដេរនៅកម្ពុជា ក្នុងឆ្នាំ២០១៤ កន្លងមកនេះ មានប្រមាណជាង​៦០០​រោងចក្រ ដោយបានផ្ដល់ការងារ សម្រាប់កម្មករ-និយោជិក ប្រមាណជាង៦សែននាក់ និងអាចឲ្យប្រទេស​កម្ពុជា ទទួលចំណូលបានប្រហែល៥កោដិ ដុល្លាអាមេរិក៕