ក្នុងជំនួបជាមួយកម្មររាប់រយនាក់ កាលពីថ្ងៃទី១២ ខែកុម្ភៈឆ្នាំ២០១៥ នៅក្នុងផ្ទះជួលមួយ ស្ថិតនៅសង្កាត់​ចោម​ចៅ និងសង្កាត់កាកាប ក្នុងខណ្ឌពោធិ៍សែនជ័យ លោក សម រង្ស៊ី ប្រធានគណបក្សសង្គ្រោះជាតិ និងជា​ប្រធាន​តំណាងរាស្រ្ត មតិភាគតិចក្នុងរដ្ឋសភា បានលើកឡើងថា លោកនឹងព្យាយាមជាបន្តទៀត បន្ទាប់ពីបាន​លទ្ធផល​មួយចំនួន ដូចជាការតម្លើងប្រាក់បៀរវត្ស ការបញ្ចុះតម្លៃភ្លើង នឹងទឹក ជូនកម្មករកន្លងមកនេះ។ អ្វីដែលលោក ចង់​និយាយសំដៅដល់នោះ ថ្លៃជួលផ្ទះរបស់កម្មករនេះ និងធ្វើយ៉ាងណាកុំឲ្យប្រាក់ដុល្លាឡើងថ្លៃ។

ប្រធានបក្សប្រឆាំងរូបនេះ ក៏បានអំពាវនាវឲ្យកម្មករទាំងអស់ ចេះធ្វើការតវ៉ា ឬប្រឆាំងនឹងការតម្លើង​ថ្លៃផ្ទះជួល​នោះ។ លោកបានថ្លែងថា៖ «ឲ្យតែប្រាក់ខែយើងឡើង ឈ្នួលផ្ទះក៏ឡើងដែរ។ ដូច្នេះយើងទាំងអស់គ្នា ខ្មែរអ្នក​ស្រឡាញ់ជាតិ ស្រឡាញ់កម្មករ ស្រឡាញ់អ្នកក្រ ស្រឡាញ់យុត្តិធម៌ យើងបានរួបរួមគ្នាទប់ស្កាត់ មិនឱ្យឈ្នួលផ្ទះ​ឡើងទេពេលនេះ។ (…) ល្មមដល់ពេលហើយ ត្រូវតែទប់ស្កាត់ តម្លើងប្រាក់ខែ បើឈ្នួលផ្ទះស៊ីប្រាក់ខែ តើមាន​សល់អ្វី?»។

ការលើកឡើងខាងលើរបស់លោកសម រង្ស៊ី នាពេលនេះ បន្ទាប់ពីរូបលោក និងលោកនាយករដ្ឋមន្រ្តី ហ៊ុន សែន បានព្រមព្រៀងគ្មា ក្នុងការបង្កើតឲ្យមានច្បាប់គ្រប់គ្រងផ្ទះជួល ដើម្បីទប់ស្កាត់ និងការពារការឡើងថ្លៃឈ្នួលផ្ទះ ស្រេចតែនឹងចិត្ត និងតម្លើងថ្លៃ នៅពេលដែរប្រាក់ខែកម្មករ ត្រូវបានតម្លើងដែរនោះ។

លោក សម រង្ស៊ី បានបន្តថា ទាំងប្រាក់ខែ ទាំងប្រាក់ឈ្នួលផ្ទះ មិនអាចត្រូវបានតម្លើង ឬបញ្ចុះដោយងាយៗនោះ​ឡើយ បើគ្មានការតវ៉ា និងទាមទារនោះ។ លោកបានធ្វើការធានាដល់កម្មករដូច្នេះថា កម្មករនឹងទទួលបានប្រាក់​ខែ​១៦០ដុល្លា ចុងឆ្នាំ២០១៥នេះ រួមទាំងការបញ្ចុះតម្លៃទំនិញ លើទីផ្សារ ការបញ្ចុះតម្លៃសេវាធ្វើដំណើរ និងការ​ទម្លាក់​តម្លៃរូបិយវត្ថុអន្តរជាតិជាដើម។ លោកបានថ្លែងទៀតថា៖ «ឈ្នួលផ្ទះ ត្រូវធ្វើការទប់ស្កាត់ មិនឲ្យឡើងថ្លៃ តាមតែអំពើចិត្តរបស់ម្ចាស់ផ្ទះ។ ថ្លៃទឹក ថ្លៃភ្លើងក៏ត្រូវទប់ស្គាត់។ យើងជួយកម្មករឲ្យបានប្រាក់ខែឡើង និងប្រាក់​ដុល្លាធ្លាក់ចុះ។»

ចំពោះការបង្កើតឲ្យមានច្បាប់គ្របគ្រងផ្ទះជួលខាងលើនេះ បានរងប្រតិកម្ម ពីសំណាក់ម្ចាស់ផ្ទះជួលមួយចំនួន ថាវាជារឿងមិនអាចទៅរួច ជាពិសេស ក្នុងការកំណត់តម្លៃជួលផ្ទះ និងការមិនឲ្យឡើងថ្លៃនោះជាដើម។ ពួកគាត់​ទាំងនោះ ចាត់ទុកការលើកឡើងនេះ ជាការនិយាយដើម្បីចំណេញ ផ្នែកនយោបាយប៉ុណ្ណោះ មិនមែនជាការ​យល់​សុខទុក្ខ របស់អ្នកជួល ឬម្ចាស់ផ្ទះជួលនោះឡើយ។

រីឯក្រុមអង្គការសង្គមស៊ីវិលវិញ បានមើលឃើញថា ចំពោះច្បាប់គ្រប់គ្រងលើតម្លៃឈ្នួលផ្ទះ សម្រាប់បរិបទកម្ពុជា​នៅពេលនេះ មិនអាចទៅរួច និងងនុវត្តបានឡើយ។ អង្គការសង្គមស៊ីវិលខ្លះបានលើកឡើងថា ទាំងនេះ ជាការ​ស្រមើរ​ស្រមៃរបស់រដ្ឋាភិបាល ដែលទើបនឹងភ្ញាក់បីដំណេកប៉ុណ្ណោះ ព្រោះបរិបទកម្ពុជាសព្វថ្ងៃ កំពុងអនុវត្តទី​ផ្សារ​បែបសេរី និងការប្រគួតប្រជែង៕