Cambodia’s Got Talent៖ ខ្លួន១សម្លេងច្រើន ធ្វើឲ្យបេក្ខជន២រូប ទទួលប៉ូតុងមាស
- ដោយ: ប្រាថ្នា អត្ថបទ និងយកការណ៍៖ ប្រាថ្នា ([email protected]) - ភ្នំពេញ ថ្ងៃទី២២ ធ្នូ ២០១៤
- កែប្រែចុងក្រោយ: December 23, 2014
- ប្រធានបទ: ទេពកោសល្យ
- អត្ថបទ: មានបញ្ហា?
- មតិ-យោបល់
-
សប្តាហ៍ចុងក្រោយ នៃវគ្គ Judge Audition ថ្ងៃអាទិត្យទី២១ ខែធ្នូ នៃកម្មវិធីប្រលងសមត្ថភាពប្លែកៗ Cambodia’s Got Talent បេក្ខជនពីររូប ដែលបញ្ចេញសមត្ថភាពបញ្ចូលសម្លេង បានជម្រុញចិត្តឱ្យតារាចម្រុះជំនាញ អ្នកនាង ខាត់ សុឃីម ចុចប៊ូតុងពណ៌មាស។ បេក្ខជនទាំងពីរ ដែលទទួលបានការចុច ប៉ូតុងមាស នាសប្តាហ៍ចុងក្រោយ នៃវគ្គ Judge Audition នេះ មានឈ្មោះថាបេក្ខជន អេ ឋានរិទ្ធ និងបេក្ខនារី ឈុន ម៉ារីណែត ដែលបានបញ្ចេញសមត្ថភាព លើការបញ្ចូលសំឡេង ក្នុងឈុតនៃរឿងដ៏កំសត់មួយ។
ក្នុងរយៈពេលពីរនាទី អ្នកទាំងពីរបានធ្វើឱ្យទស្សនិកជន ជិត៦០០នាក់ ក្នុងឆាករបស់ Cambodia’s Got Talent ស្លុតអារម្មណ៍ និងទោរទន់ ទៅតាមសាច់រឿង ដែលអ្នកទាំងពីរបានបញ្ចូល ជាពិសេសមានអារម្មណ៍រំភើប ជាមួយនឹងសមត្ថភាពប្លែក នៃការបញ្ចូលសម្លេងនេះ។
ការចញ្ចូលសម្លេងរឿងកំសត់មួយនេះ ធ្វើឱ្យគេស្រមៃឃើញរូបភាពពិត ដូចមានមនុស្សជាច្រើន កំពុងនិយាយ ប្រពន្ធ ប្តី ដែលកំពុងជិតស្លាប់ និងតួអង្គដ៏ទៃទៀត ដូចជាឪពុកម្តាយ ជីដូនជីតា អ្នកបម្រើប្រុសស្រី រួមទាំងសំនៀងខ្មែរ-ចិនប៉ៃឡាំ និងលាយឡំដោយសម្តីកំប្លុកកំប្លែង របស់អ្នកបម្រើនៅវិនាទីចុងក្រោយផងដែរ។
អេ ឋានរិទ្ធ និង ឈុន ម៉ារីណែត គឺជាមិត្តភក្ត្ររួមការងារផ្នែកពិធីករ-ពិធីការិនី គឺជាអ្នកបញ្ចូលសម្លេងដ៏ល្បីដែលបម្រើការនៅវិទ្យុមួយ ក្នុងរាជធានីភ្នំពេញ។ ទស្សនិកជនមួយចំនួន ដែលបានស្តាប់រឿងភាគជាច្រើន របស់ស្ថានីវិទ្យុ ដែលមានកម្លាំងផ្សាយ១០៦.៥ ប្រាកដជាស្គាល់ច្បាស់ នូវទេពកោសល្យរបស់អ្នកទាំងពីរ ព្រោះថារាល់រឿងភាគទាំងអស់ ដែលផ្សាយចេញពីវិទ្យុនោះ គឺសុទ្ធតែអ្នកទាំងពីរជាអ្នកបញ្ចូលសម្លេង។ ល្ខោននិយាយទាំងអស់ ដែលមានគ្រប់តួទាំងវ័យចាស់ ក្មេង អ្នកស្រែ ចំការ អ្នកមានសំនៀងរដឺន ដែលផ្សាយនៅក្នុងមួយនោះ គឺសុទ្ធតែអ្នកទាំងពីរជាអ្នកបញ្ចូលសម្លេង។
កញ្ញា ម៉ារីណែត ពិធីការិនីសម្លេងផ្អែម រូបមួយសម្លេងច្រើន បាននិយាយថា ពួកគាត់មិនដែលធ្លាប់បានទទួលការបណ្តុះបណ្តាល ផ្នែកបញ្ចូលសំឡេងឡើយ ប៉ុន្តែជំនាញដែលនេះ កើតឡើងតាមរយៈការងារដែលខ្លួនបំពេញជារៀងរាល់ថ្ងៃ។
ទស្សនាការបញ្ចូលសម្លេង របស់បេក្ខជនសម្លេងច្រើនទាំងពីនាក់ តើគាត់មានសមត្ថភាពកម្រិតណា?