ប្រធានអង្គភាពប្រឆាំងអំពើពុករលួយ លោក ឱម យិនទៀង បាន​ថ្លែង​ទៅ​កាន់​អ្នក​សារព័ត៌មាន​បន្ទាប់​ពី​លោក បាន​ដឹកនាំ​ក្រុម​ការងារ​របស់​លោក ទៅ​ជួប​ពិភាក្សា ជា​មួយ​គណៈ​កម្មការ​ទី១០ នៃ​រដ្ឋសភា​ថា «មាន​តែ​អង្គភាព​ប្រឆាំង​អំពើ​ពុករលួយ​តែ​មួយ​គត់ ដែល​មាន​សមត្ថកិច្ច ស៊ើប​អង្គេត​បញ្ហា​អំពើ​ពុក​រលួយ។ ស្ថាប័ន​ផ្សេង​ទៀត ដឹង​ពី​បញ្ហា​អំពើ​ពុក​រលួយ ត្រូវ​ប្តឹង​មក​អង្គភាព​ប្រឆាំង​អំពើ​ពុក​រលួយ មិន​អាច​យក​រឿង​អំពើ​ពុក​រលួយ ទៅ​បើក​ស៊ើប​អង្កេត​ដោយ​ខ្លួន​ឯង​បាន​ទេ។ នេះ​យើង​ច្បាស់​ជា​មួយ​គ្នា។»

ថ្លែងនៅចំពោះ លោក ហូរ វ៉ាន់ ប្រធាន​គណៈកម្មការ​អង្កេត បោស​សំអាត និង​ប្រឆាំង​អំពើ​ពុករលួយ​របស់​រដ្ឋសភា លោក ឱម យិនទៀង បាន​ពន្យល់​បន្ថែម​ទៀត​ថា ស្ថាប័ន​ប្រឆាំង​អំពើ​ពុក​រលួយ​របស់​លោក ត្រូវ​បាន​បង្កើត​ឡើង​តែ​មួយ​គត់​ដោយ​ច្បាប់ ហើយ​មាន​អាជ្ញានុសិទ្ធិ ឲ្យ​ទទួល​ពាក្យ​បណ្ដឹង ឬ​បើក​ការ​ស៊ើប​អង្កេត ទៅ​លើ​សំនុំ​រឿង​ពុក​រលួយ។ លោក​បានថ្លែង​ឲ្យ​ដឹង​ថា៖ «សូម្បី​តែ​ស្ថាប័ន​តុលាការ ក៏​មិន​អាច​ធ្វើការ​ស៊ើប​អង្កេត​រឿង​នេះ​បាន​ដែរ ត្រូវ​តែ​ឃ្វាល​ចេញ និង​ប្តឹង​បក​មក​អង្គភាព​ប្រឆាំង​អំពើ​ពុក​រលួយ»។

ការថ្លែងខាងលើរបស់លោក បានធ្វើឡើងបន្ទាប់ពីជំនួប«ពិភាក្សា»មួយ ក្នុងវិមានរដ្ឋសភា កាលពី​រសៀល​ថ្ងៃទី២៦ ខែវិច្ឆិកា ជាមួយនឹងផ្នែកមួយនៃអង្គការនិតិបញ្ញត្តិ ដែលលោក ឱម យិនទៀង ចាត់ទុកថាជាស្ថាប័ន​«ពៅ»​ជាង​ស្ថាប័ន​របស់​លោក​ទៅ​ទៀត។ ប្រធាន​អង្គភាពប្រឆាំងអំពើពុករលួយរូបនេះ បានលើកឡើងថា នេះជា​ជំនួបលើកដំបូង​​ របស់អង្គភាពរបស់លោក ដែលជាអង្គភាពពៅគេ ទើបបង្កើតបានតែបីឆ្នាំ ជាមួយនឹង​គណៈ​កម្មការអង្កេត បោសសំអាត និងប្រឆាំងអំពើពុករលួយនៃរដ្ឋសភា ដែល«ពៅ»ជាងអង្គភាពរបស់​លោក កើត​មិនទាំងបានបួនខែ ស្រួលបួលផង។

ទំនងជាទទួលស្គាល់នូវការលើកឡើង របស់មន្ត្រីជាន់ខ្ពស់រដ្ឋាភិបាល និងផ្ទុយពីការចោទសួរហូរដូចទឹក ពី​សំណាក់អ្នកសារព័ត៌មាន ទៅលើសំនុំរឿងពុករលួយដ៏រសើបជាច្រើននោះ លោក ហូរ វ៉ាន់ ប្រធាន​គណៈ​កម្មការ​​​ទី១០ បានថ្លែងពន្យល់ថា ជំនួបពិភាក្សាជាមួយគ្នានៅថ្ងៃនេះ គ្រាន់តែដើម្បីចែករំលែក បទ​ពិសោធ​ឲ្យគ្នាទៅវិញទៅមក និងធ្វើសហប្រតិត្តិការជាមួយគ្នា តែពុំមានការសួរដេញដោល លើបញ្ហាណា​មួយ​នោះ​ឡើយ។

តើលោក ហូរ វ៉ាន់ ស្គាល់ពីសំនុំរឿងពុករលួយអ្វីខ្លះ?

លោកតំណាងរាស្ត្រ ហូរ វ៉ាន់ មកពីគណបក្សសង្គ្រោះជាតិ បានបន្តបកស្រាយទៀតថា គណកម្មការរបស់​លោក គ្រាន់តែចង់ដឹង ពីសកម្មភាពការងារ របស់អង្គភាពប្រឆាំងអំពើពុករលួយកន្លងមក ទទួលបាន​លទ្ធផល​យ៉ាងណា និងចង់ដឹងពីទិសដៅ អនុវត្តការងារអនាគត របស់អង្គភាពប្រឆាំងអំពើពុករលួយ ពីព្រោះ​ស្ថាប័ន​«និតិបញ្ញត្តិមានតួនាទី តាមឃ្លាំមើលការអនុវត្តច្បាប់នានា របស់ស្ថាប័ននីតិប្រតិបត្តិ»។

ប្រទេសកម្ពុជា មានកេរ្ត៍ឈ្មោះយ៉ាងល្បី និងជាប្រទេសដែលជាប់ចំណាត់ថ្នាក់លេខមួយ នៅភូមិភាគអាស៊ី​អាគ្នេយ៍ ខាងអំពើពុករលួយ។ បើសូម្បីតែប្រទេសភូមា ដែលទើបចាប់ផ្ដើមកំណែទម្រង់ តែក៏នៅមានកេរ្ត៍​ឈ្មោះ​ពិរោះពិសារ ជាងព្រះរាជាណាចក្រអច្ឆរិយៈមួយនេះដែរ។ នេះបើតាមរបាយការណ៍មួយ ចេញផ្សាយ​កាល​ពីចុងឆ្នាំ២០១៣ ដោយអង្គការតម្លាភាពពិភពលោក ដែលមានទីតាំងនៅក្នុងប្រទេសអាល្លឺម៉ង់។

អំពើពុករលួយបានចាក់ឬស ដល់ខួរឆ្អឹងសង្គមកម្ពុជា រាប់តាំងពីថ្នាក់កំពូលដែលខ្ពស់ជាងមេឃ ចុះមកមន្ត្រី​រាជការធម្មតា បើសូម្បីតែគ្រូបង្រៀន។ ទោះអង្គភាពប្រឆាំងអំពើពុករលួយ បានអនុវត្តវិធានការ​ចាប់ចង​មួយ​ចំនួន ទៅលើមន្ត្រីគ្រាក់ៗខ្លះហើយក៏ដោយ តែចំណាត់ការមិនបានធ្វើឲ្យឈើ ដែលពុកស្អុយរលួយទៅហើយ ងើបដុះមកវិញ ដោយងាយៗនោះឡើយ។ ក្រុមអ្នកឃ្លាំមើលមួយចំនួន ថែមទាំងបានរិះគន់រាល់ចំណាត់ការ​ទាំងនោះ ថាគ្រាន់តែជាការ«អេះមិនចំកន្លែងរមាស់» ឬ«អេះថើរៗបង្អើលចាប»ប៉ុណ្ណោះ។

ដូច្នេះ សំនុំរឿង«ពុករលួយ» មានច្រើនកៀរនឹងជើង។ តែបើសួរថា តើលោក ហូរ វ៉ាន់ ស្គាល់សំនុំរឿង​«ពុក​រលួយ»​ បានអ្វីខ្លះនិងប៉ុណ្ណានោះ គ្មាននរណាដឹងចម្លើយជាងលោក ហូរ វ៉ាន់ ខ្លួនលោកទេ។ នៅមុននេះ​ប៉ុន្មាន​សប្ដាហ៍ សំនុំរឿងពុករលួយ និងបក្សពួកនិយមក្នុងរដ្ឋសភា ក៏ទើបនឹងត្រូវបានបើកកកាយដែរ។ ការ​បើក​កកាយនោះ មិនមែនត្រូវបានធ្វើឡើង ដោយគណកម្មការទី១០ ឬដោយលោក ហូរ វ៉ាន់ ទេ តែដោយ​តំណាង​រាស្ត្រមួយរូបផ្សេង ពីគណបក្សសង្គ្រោះជាតិ លោក សុន ឆៃ ទៅវិញ។ សូមបញ្ជាក់ដែរថា លោក ហូរ វ៉ាន់ គឺ​ជា​បេក្ខជនទីបី របស់គណបក្សសង្គ្រោះជាតិ បន្ទាប់ពីបេក្ខជនពីររូបទៀត គឺលោក យឹម សុវណ្ណ និងលោកស្រី មូរ សុខហួ មិន​ត្រូវ​បាន​ក្រុម​តំណាងរាស្ត្រពីគណបក្សប្រជាជនកម្ពុជា បោះឆ្នោតគាំទ្រកាលពីថ្ងៃទី២៧ ខែសីហា ឆ្នាំ២០១៤កន្លងទៅ ឲ្យ​ជាប់ធ្វើជាប្រធានគណកម្មាការ អង្កេត បោសសំអាត និងប្រឆាំងអំពើពុករលួយ​របស់​រដ្ឋសភានេះ៕

ទស្សនាការផ្ដល់កិច្ចសម្ភាសន៍ របស់លោក ហូរ វ៉ាន់ និងលោក ឱម យិនទៀង ទៅឲ្យអ្នកសារព័ត៌មាន៖
(វីដេអូមិនទាន់រួចរាល់)