បន្ទាប់ពីងងឹតភ្នែក១៤ឆ្នាំ ស្រាប់តែទៅបុកតុតូចមួយ មើលឃើញឡើងវិញ
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី៣១ តុលា ២០១៤
- កែប្រែចុងក្រោយ: November 02, 2014
- ប្រធានបទ: ជីវិត
- អត្ថបទ: មានបញ្ហា?
- មតិ-យោបល់
-
អ្នកស្រី លីហ្សា រ៉ៃដ៍ (Lisa Reid) បានធ្លាក់ខ្លួនពិការភ្នែកទាំងគូរ ងងឹតមើលអ្វីលែងឃើញ តាំងពីអាយុ១១ឆ្នាំ ហើយទើបតែចាប់ផ្ដើមមើលឃើញឡើងវិញ នៅរយៈពេល១៤ឆ្នាំក្រោយមកប៉ុណ្ណោះ បន្ទាប់ពីអ្នកស្រីបានទៅជល់នឹង កូនតុតូចមួយ សម្រាប់ដាក់ទទួលភ្ញៀវ កាលពីឆ្នាំ២០០០កន្លងទៅ ក្នុងផ្ទះអ្នកស្រី។ ថ្លែងប្រាប់ស្ថានីយទូរទស្សន៍អាមេរិក ABC News អ្នកស្រីបាននិយាយទាំងអំណរថា៖ «ខ្ញុំបានមើលឃើញពណ៌ស នៃពិដានផ្ទះរបស់ខ្ញុំ»។
នៅឆ្នាំនេះ អ្នកស្រីមានអាយុ៣៨ឆ្នាំហើយ។ អ្នកស្រីបានរំលឹកពីវេលាដំបូង ដែលអ្នកស្រីបានមើលឃើញម្ដាយ និងបងប្រុសរបស់អ្នកស្រីវិញ យ៉ាងដូច្នេះថា៖ «ខ្ញុំមិនអាចរកពាក្យអ្វីមកនិយាយឲ្យចំ ពីអារម្មណ៍ដែលខ្ញុំមាននោះទេ។ វាមិនអាចឲ្យជឿបាន ហើយចំជាអស្ចារ្យមែនទែន។»
អ្នកស្រីនៅចាំបានថា កាលពីអ្នកស្រីនៅមានអាយុជាកុមារ គ្រោះដ៏អាក្រក់មួយ បានកើតឡើងនៅចំពោះអ្នកស្រី៖ ដុះដុំគ្រួស នៅក្នុងខួរក្បាល ដែលចាំបាច់ឲ្យអ្នកស្រី ត្រូវធ្វើការវះកាត់នៅពេលនោះ។ តែទេវតាមិនបានអនុគ្រោះ ដល់អ្នកស្រីឡើយ។ ការវះកាត់អាចជួយជីវិតអ្នកស្រី តែជាថ្នូរមកវិញ ដោយភាពងងឹតសូន្យសុង មើលអ្វីលែងឃើញ ប្រៀបបាននឹងស្បៃអន្ធកាល ដែលបានចូលមកសណ្ឋិត ក្នុងប្រាណអ្នកស្រីរហូតមក អស់រយៈពេល១៤ឆ្នាំ។
យ៉ាងណាក៏ដោយ អ្នកស្រី លីហ្សា មិនមានវាសនាដូចអ្នកផង ដែលមានភ្នែកល្អទាំងគូរនោះឡើយ ព្រោះថា អ្នកស្រីនៅសល់តែភ្នែកខាងឆ្វេងប៉ុណ្ណោះ ដែលនៅមើលឃើញ ខណៈភ្នែកម្ខាងទៀត បានខូចទៅបាត់ តាំងពីយូរយារកន្លងមក ហើយគេមិនគិតថា វានឹងភ្ញាក់ភ្លឺមកវិញនោះទេ។ សម្រាប់អ្នកស្រី វាជាអភូតហេតុមួយ ដែលអ្នកស្រីមិនចង់បានអ្វីលើសនេះឡើយ។ ផ្ទុយទៅវិញ គឺក្រុមគ្រូពេទ្យ និងអ្នកស្រាវជ្រាវទៅវិញទេ ដែលនៅតែងឿងឆ្ងល់ ចំពោះករណីរបស់អ្នកស្រី។ តើអ្វីទៅ ដែលបាននាំឲ្យអ្នកស្រី បានភ្លឺភ្នែកឡើងវិញ? ជាករណីផ្លូវចិត្ត ឬប្រព័ន្ធសរសៃចក្ខុវិញ្ញាណរបស់អ្នកស្រី មានភាពចម្លែកខុសពីមនុស្សដទៃ?