ជាបន្តរបន្ទាប់ រាល់ការជួបជុំរបស់ប្រជាពលរដ្ឋនិស្សិត ក្នុងការទាមទានូវអ្វី ដែលពួកគេគិតថាជាការរំលោភច្បាប់ និង​សិទ្ធិមនុស្សតែងតែ​ត្រូវបានរំខាន ដោយក្រុមអាជ្ញាធរមានសមត្ថកិច្ច ជាពិសេសពីសំណាក់ក្រុមសន្តិសុខ ដែល​ត្រូវ​បាន​ជួលដោយសាលារាជធានីភ្នំពេញ។

យុវជនដែលត្រូវបានចាប់ឃាត់ខ្លួនយកទៅ ដោយក្រុមសន្ដិសុខស៊ីឈ្នួល ថ្ងៃទី២០ ខែកុម្ភៈ ឆ្នាំ២០១៤។ (រូបថត ហ្វេសប៊ុក)

សិទ្ធិសេរីភាព - ការរារាំងក្រុមយុវជនមួយចំនួន ពីសំណាក់អាជ្ញាធរមានសមត្ថកិច្ច និងសន្តិសុខខណ្ឌដូនពេញ មិន​ឲ្យ​ប្រមូលផ្គុំគ្នានៅទីលានប្រជាធិបតេយ្យ នាព្រឹកថ្ងៃព្រហស្បតិ៍ ទី២០ ខែកុម្ភៈទេ ។ ក្នុងទិវាយុត្តិធម៌សង្គម​ពិភពលោក (២០ កុម្ភៈ) តំណាងយុវជនមកពីគ្រប់មជ្ឈដ្ឋានប្រាំបួនរូប មានបំណងប្រកាសផ្សព្វផ្សាយ «ស្មារតីនៃយុត្តិធម៌សង្គម» ក្នុងប្រទេសកម្ពុជា តាមរយៈស្នើឲ្យរដ្ឋាភិបាលគោរព និងអនុវត្តច្បាប់រដ្ឋធម្មនុញ្ញ ពិសេសស្នើឲ្យរដ្ឋាភិបាល​ដកបម្រាម​ហាមឃាត់ការជួបជុំ និងប្រមូលផ្ដុំដែលពួកគេតិតថា ជាបម្រាបមួយផ្ទុយនឹងរដ្ឋធម្មនុញ្ញ។

យុវជន ស្រី សំណាង ក្នុងបទសម្ភាសជាមួយទស្សនាវដ្ដីមនោរម្យ.អាំងហ្វូ បានលើកឡើងថា អាជ្ញាធរបានរារាំង​ក្រុម​យុវជនខ្មែរមហានគរ មិនឲ្យប្រមូលផ្គុំគ្នានៅទីលានប្រជាធិបតេយ្យ។ ក្រុមយុវជន ក៏បានធ្វើដំណើរដោយថ្មើជើង ឆ្ពោះ​ទៅកាន់អង្គការសហប្រចាជាតិ ដើម្បីបន្តការអាននូវញត្តិនោះ។ នៅពេលមកដល់មុខក្រុមហ៊ុន ប៊ីឡាញ ក្រុមសន្តិសុខ​សាលាខណ្ឌដូនពេញ មិនបានអនុញាតិឲ្យបន្តដំណើរដោយថ្មើជើងឡើយ ហើយបង្ខំឲ្យក្រុមយុវជននោះ​ធ្វើដំណើរ​ដោយម៉ូតូវិញ។

ឯយុវជន រិន ច័ន្ទរិទ្ធិ ក្នុងកិច្ចសម្ភាសជាមួយអ្នកសារព័ត៌មានថា ការជួបជុំគ្នានេះក្នុងគោលបំណង ចូលរួមនិង​លើក​កំពស់ ថ្ងៃ«ទិវាយុត្តិធម៌សង្គមពិភពលោក» ដែលអង្គការសហប្រជាជាតិ ប្រកាសទទួលស្គាល់ក្នុងឆ្នាំ២០០៧។ យុវជន​រូបនេះបន្តរថា ក្រុមយុវជនចូលរួមលើកស្ទួយទិវានេះនៅកម្ពុជា តាមរយៈការលែងចាប ការបង្ហោះប៉េងប៉ោងជាដើម។

យុវជន ស្រី សំណាង បន្តរថា ជាមួយនឹងការមិនអនុញ្ញាតតាមរយៈការរារាំងនេះ អាជ្ញាធរខណ្ឌដូនពេញ​បានជេរ​ប្រមាថក្រុមយុវជន ជាមួយនឹងការគំរាមប្រើអំពើ«ហិង្សា»ថែមទៀត។ ស្របពេលជាមួយ នឹងការប៉ះពាក្យសម្តីគ្នា​រវាងក្រុមយុវជន និងក្រុមសណ្តាប់ធ្នាប់ខណ្ឌនោះ ក្រុមសន្តិសុខទាំងនោះក៏បានចាប់យុវជន ហេង ស៊ាងលាង បញ្ចូលឡានមិនដឹងថា ដឹកនាំឆ្ពោះទៅណានោះទេ។

បន្ទាប់ពីចាប់យុវជនបានម្នាក់ ក្រុមយុវជនដែលមិនត្រូវបានចាប់ខ្លួន បានបន្តដំណើរឆ្ពោះទៅ ទីស្នាក់ការអង្គការ​សហប្រជាជាតិ ទទួលបន្ទុកសិទ្ធិមនុស្សនៅកម្ពុជា។ ក្នុងសន្និសីទសារព័ត៌មាន នៅមុខការិយាល័យឧត្តមស្នងការ​អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ក្រុមយុវជនបានអាននូវសាររបស់ខ្លួន និងក៏ស្នើដល់​តំណាងអង្គការសហប្រជាជាតិ ជួយធ្វើអន្តរាគមន៍ករណីចាប់ខ្លួនយុវជនខាងលើ។

យោងតាមខ្លឹមសារួម នៃសារដែលអានដោយតំណាងក្រុមយុវជនមហានគរ នៅមុខស្នាក់ការអង្គការ​សហប្រជាជាតិ​នោះ បានឲ្យដឹងថា  «យុត្តិធម៌ជាអ្វីដែលមនុស្សជាតិចង់បាន។ ខ្មែរគ្មានយុត្តិធម៌ គ្មានសន្តិភាព។ ២០ កុម្ភៈ ជាថ្ងៃ​យុត្តិធម៌​សង្គមអន្តរជាតិ។ យុត្តិធម៌សង្គមស្មើភាពគ្នា ក្នុងនាមមនុស្សជាតិ។ (…) កម្ពុជាមានការធ្លាក់ចុះ នៃការគោរព​សិទ្ធិមនុស្ស តាមរយៈការបង្ក្រាបដោយហិង្សា ធ្វើឡើងដោយអាជ្ញាធរលើបាតុករអហិង្សា។ »

ជាមួយគ្នានេះដែរ ពលរដ្ឋម្នាក់ដែលបានគាំទ្រសកម្មភាពក្រុមយុវជន នៅតាមផ្លូវសាធារណៈឈ្មោះ ភក្ដី ក៏ត្រូវបាន​ឃាត់ខ្លួន យកទៅអធិការដ្ឋាននគរបាលខណ្ឌដូនពេញដែរ។ ការចាប់ខ្លួននេះ ព្រោះតែក្រុមអាជ្ញាធរតាមដាន តាំង​ស្ពាននាគ រហូតដល់ទីលានឃើញថា បានដឹកព្រះសង្ឃមួយអង្គចុះឡើងៗ ហាក់ដូចជាមិនដឹង​នូវគោលដៅ​ច្បាស់​លាស់ ទើបសម្រេចឃាត់ខ្លួនមកសាកសួរតែម្តងទៅ។ លោកបន្តថា ក្រោយការសាកសួរបុរសរូបនោះ បានបដិសេធ​ថា មិនមានជាប់ពាក់ព័ន្ធ នឹងការចូលរួមរបស់ក្រុមយុវជននោះឡើយ។

ឯព្រះសង្ឃដែលមានវត្តមាន ក្នុងដំណើរជាមួយគ្នានោះ ក៏បានលើកឡើងថា លោកស្គាល់គ្នាជាមួយនិង​អ្នកម៉ូតូ​ឌុប​នោះ មិនមានការចូលរួមជាមួយយុវជននោះឡើយ។ ក្រោយការសាកសួរក្រុមសមត្ថកិច្ចក៏ធ្វើការដោះលែងវិញ ដោយគ្មានការវាយតប់ ឬដកហូតនូវសម្ភារៈអ្វីឡើយ។ នេះបើយោងតាមការបញ្ជាក់ របស់ភ្នាក់ងារពិសេស​នៃកង​កម្លាំងទាំងនោះ ដោយសុំមិនបញ្ចេញឈ្មោះ។

សម្មភាព«ហាមឃាត់»ការចូលរួមប្រជុំ ឬការជួបជុំរបស់ប្រជាពលរដ្ឋនោះ មតិសាធារណៈជនបានលើកឡើងថា កម្ពុជាកំពុងបង្ហាញនូវ«ចរិយា»ពិតរបស់ខ្លួន ក្នុងការគំរាមកំហែងដល់ការតស៊ូមតិ ការទាមទានូវសិទ្ធិសេរីភាព​របស់​ប្រជាពលរដ្ឋយ៉ាងធ្ងង់ធ្ងរ។ តែទោះជាយ៉ាងណាក៏ដោយ ក៏នៅក្នុងអំឡុងពេលដ៏ស្រួចស្រាវនេះ រដ្ឋាភិបាលនៅតែ​បាន​ប្រកាសយ៉ាង«ជាប់»មាត់ថា កម្ពុជាកំពុងគោរព និងអនុវត្តន៍ច្បាប់ សិទ្ធិមនុស្ស ជាប្រទេសនីតិរដ្ឋប្រកាន់គោល​ការណ៍​លិទ្ធិប្រជាធិបបតេយ្យ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២០ ខែកុម្ភៈ ឆ្នាំ២០១៤