ជាការសំដែងមហិទ្ធិរិទ្ធិ របស់ហង្សក្រហមអង់គ្លេស នៅក្នុងកីឡដ្ឋានរបស់ខ្លួន ក្នុងយប់នេះ ដើម្បីបំបាក់ក្រុម រមាសស្ពាន់ របស់ប្រទេសអ៊ីតាលី។

ជាមួយនឹងបច្ចេកទេស ដាក់ក្រឡាទាត់ ដោយគ្រូបង្វឹក លោក «Jürgen Klopp» និងថ្វីជើងដ៏កំពូល របស់ខ្សែប្រយុទ្ធជាតិ អេហ្សីព កីឡាករ មហាមេដ សាឡា (Mohamed Salah) ក្រុមលីវើភូល (Liverpool - អង់គ្លេស) ហៅ ហង្សក្រហម សឹងតែធ្វើឲ្យក្រុម រ៉ូម៉ា (AS Roma- អ៊ីតាលី) ផុតដង្ហើមងើបលែងរួច ក្នុងការប្រកួត «ទៅ» វគ្គ១ភាគ២ផ្ដាច់ព្រ័ត្រ ក្របខណ្ឌដណ្ដើមជើងឯកអ៊ឺរ៉ុប «Champions League» ប្រចាំឆ្នាំ២០១៧-២០១៨ កាលពីយប់ថ្ងៃអង្គារ ទី២៤ ខែមេសានេះ។

ក្រុម ហង្សក្រហម បានរកគ្រាប់បាល់ បានជាបន្តបន្ទាប់ ចំនួន ៥-០ នៅក្នុង៨០នាទីដំបូង ឈ្នះពីលើក្រុម រ៉ូម៉ា ស្រេចទៅហើយ។ ប៉ុន្តែនៅក្នុងរយៈពេលចុងក្រោយ គ្រូបង្វឹករបស់ក្រុម លីវើភូល លោក «Jürgen Klopp» បានធ្វើការប្ដូរកីឡាករ ដើម្បីសន្សំជើង និងចៀសវាងការរងរបួស មានជាអាទិ៍ កីឡាករ មហាមេដ សាឡា ដែលជាកីឡាករ ដឹកនាំខ្សែប្រយុទ្ធ ក្នុងការរកគ្រាប់បាល់ បានដល់ទៅ២គ្រាប់តែឯង និងបញ្ជូនបាល់ ដើម្បីរកគ្រាប់បាលបាន ពីរគ្រាប់ផ្សេងទៀត។

ការផ្លាស់ប្ដូរ បានធ្វើឲ្យក្រុម ហង្សក្រហម ធ្លាក់ក្រឡាបាល់ ធ្លាក់ជើង បណ្ដាលឲ្យក្រុម រមាសស្ពាន់ របស់រដ្ឋធានី រ៉ូម ដែលនៅតែចិញ្ចឹមចិត្ត ជាកីឡាករ ក្នុងការប្រយុទ្ធ ដល់ដង្ហើមចុងក្រោយនោះ រកគ្រាប់បាល់បាន២ គ្រាប់មកវិញ (នៅនាទីទី ៨១ និងនាទីទី៨៥)។

ប៉ុន្តែពិន្ទុប៉ុណ្ណេះ ក្រុម លីវើភូល ពិតជាមានប្រៀបជាងក្រុម រ៉ូម៉ា ខ្លាំងសម្បើមណាស់ ក្នុងការយកឈ្នះ ការប្រកួត «ត្រឡប់» នាសប្ដាហ៍ក្រោយ ដើម្បីឡើងទៅប្រកួតផ្ដាច់ព្រ័ត្រ ទល់នឹងក្រុមមួយ ពីចំណោម​ក្រុមពីរ​ផ្សេងទៀត គឺក្រុម រៀលម៉ាឌ្រីត (Real Madrid- អេស្ប៉ាញ) និងក្រុម បាយ៉ឺនមូនិឆ (Bayern Munich- អាល្លឺម៉ង់) ដែលត្រូវជួបគ្នា ស្អែកនេះ។

ប៉ុន្តែ គ្មាននរណាហ៊ានទាយមុនទេ ថាក្រុម រ៉ូម៉ា ប្រាកដជាប្រកួតចាញ់ក្រុម លីវើភូល នៅលើទឹកដីរបស់ខ្លួននោះ ព្រោះក្រុម រមាសស្ពាន់ ធ្លាប់បានកម្ចាត់ក្រុម បាសឺឡូន (Barcelone FC- អេស្ប៉ាញ) ឲ្យចេញពីការដណ្ដើម ជាជើងឯកអ៊ឺរ៉ុបឆ្នាំនេះរួចហើយ នៅក្នុងវគ្គមុន (១ភាគ៤ផ្ដាច់ព្រ័ត្រ ដោយបានចាញ់ ១-៤ ក្នុងការប្រកួតទៅ តែបានឈ្នះ ៣-០ ក្នុងប្រកួតត្រឡប់)៕

» ទស្សនាការសង្ខេប នៃការប្រកួតនេះឡើងវិញ៖