ប្រធានក្រុមម៉ែនឆេស្ទើ យូណៃធីត (Manchester United) ណិម័នចា វីឌិក (Nemanja Vidic) មានជំនឿចិត្តយ៉ាងមុតមាំថា ក្លិបបីសាចក្រហមរបស់គាត់ នឹងអាចឈ្នះពានរង្វាន់កំពូល យូហ្វាឆែមពានលីក (UEFA Champions League) នៅក្នុង​រដូវកាលនេះ។

កីឡាករប្រធានក្រុម ណិម័នចា វីឌិក របស់ក្រុម ម៉ែនឆេស្ទើ យូណៃធីត។ (រូបថត football365.com)

ក្រុមជើងឯកបាឃ្លេព្រីមែលីក (Barclays Premier League) ជឿថាពួកគេនឹងអាចឆ្លងទៅវគ្គ១៦ក្រុមបាន ខណៈដែល​ស្ថិតនៅក្នុងពូលជាមួយក្រុមពុំសូវខ្លាំងដូចជា៖ ស្សាកតាដូណែស (Shakhtar Donetsk), បាយឺ ឡេវើកូសិន (Bayer Leverkusen) និងក្រុម រៀលសូស៊ីដេត (Real Sociedad) នៅក្នុងវគ្គចែកពូល (group stage)។

ម៉ែនញូ ធ្លាប់ធ្វើបានល្អបំផុតក្រោមការដឹកនាំរបស់អតីតគ្រូបង្វឹកលោក សឺអាឡិច ហ្វឺហ្គឺសិន (Sir Alex Ferguson)។ ប៉ុន្តែ​ក្រោមការដឹកនាំរបស់គ្រូបង្វឹកថ្មី លោកដេវីដ ម៉យ (David Moyes) អ្នកគាំទ្រហាក់ដូចជា​មានការថមថយ​ទំនុក​ចិត្តបន្តិច ដោយសារតែខ្វះសកម្មភាពទិញដូរកីឡាករនៅក្នុងរដូវកាលថ្មីនេះ។

ទោះជាយ៉ាងណា វីឌិកជឿថា កីឡាករក្នុងក្រុមទាំងអស់ក្នុងពេលបច្ចុប្បន្ននេះ ក៏ដូចទៅនឹងឆ្នាំមុនៗដែរ ដែលមានន័យថា ល្អគ្រប់គ្រាន់ហើយសម្រាប់ប្រជែងយកពានកំពូលរបស់អ៊ឺរ៉ុប។

កីឡាករស៊ែប៊ី វ័យ៣១ឆ្នាំ បានប្រាប់ដល់ទស្សនាវដ្តីកីឡា (Sport Magazine) ថា៖ «យើងគិតថា យើងនឹងអាចឈាន​ដល់​វគ្គចុងក្រោយ ហើយយើងជឿជាក់ថា ម៉ែនញូប្រាកដជាបានឡើងដល់វគ្គផ្តាច់ព្រ័ត្រឆែមពានលីក។»

គាត់បានបន្តថា៖ «ខ្ញុំបាននៅជាមួយក្លិប៨ឆ្នាំហើយ ខ្ញុំបានលេងវគ្គផ្តាច់ព្រ័ត្រ៣លើក វគ្គពាក់កណ្តាលផ្តាច់ព្រ័ត្រ១លើក និងវគ្គ១ភាគ៤ចំនួន២លើក។ ដូច្នេះខ្ញុំយល់ថា បើយើងមានសំណាងតែបន្តិច យើងនឹងអាចឈ្នះពាននេះ។»

វីឌិក ក៏បានលើកឡើងដែរថា ការដែលក្រុមឆែលស៊ី (Chelsea) ឈ្នះឆែមពានលីកឆ្នាំ២០១២ នៅពេលដែល​ពួកគេយក​ឈ្នះក្រុមបាយឺន ម៉ូនិជ (Bayern Munich) ដោយបាល់ពិន័យប៉េណាល់ទីនោះ ជាឧទាហរណ៏ដ៏ល្អមួយ ដែល​បញ្ជាក់​ថា​ការប្រកួតធំៗ ក៏មិនប្រាកដថាក្រុមណាខ្លាំងជាងជាអ្នកឈ្នះនោះដែរ។

ខ្សែការពាររូបនេះដដែល បានបន្តថា៖ «យើងបានដឹងហើយថា កាលពី២ឆ្នាំមុន ឆែលស៊ីជាអ្នកឈ្នះ។ តើអ្នកគិតថា ឆែលស៊ីសាកសម្យជាអ្នកឈ្នះទេ? បាសេឡូណា ជាក្រុមខ្លាំងមួយ ដែលឈ្នះពានរង្វាន់គ្រប់បែបយ៉ាង ក្នុងរយះពេល​៣ឆ្នាំចុងក្រោយ ប៉ុន្តែកាលពីរដូវកាលមុន បាយឺន ម៉ូនិជជាអ្នកឈ្នះ។ សរុបមកអ្នកមិនអាចនិយាយបានទេថា ក្រុមណា​មួយជាអ្នកឈ្នះឲ្យពិតប្រាកដនោះ។»

វីឌិក ជាផ្នែកដ៏សំខាន់មួយ ដែលជួយឲ្យម៉ែនញូ លើកពានកំពូលរបស់អ៊ឺរ៉ុបឆែមពានលីក កាលពីរដូវកាល២០០៧/០៨។ ប៉ុន្តែគាត់ក៏ជាផ្នែកមួយ ខណៈដែលក្រុមបីសាចក្រហម ធ្លាក់វគ្គផ្តាច់ព្រ័ត្រទាំង២លើក ក្រោមថ្វីដៃក្រុមបាសេឡូណា (Barcelona) កាលពីឆ្នាំ២០០៩ និងឆ្នាំ២០១១ដែរ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៣ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ