ការផ្ទុះមួយ ធ្វើឲ្យមនុស្សបីនាក់ស្លាប់ នៅក្រុងម៉ានីល
ការផ្ទុះដ៏ខ្លាំងមួយ ដែលទំនងបណ្ដាលមកពីសម្ភារះចង្ក្រានបាយដែលខូច បានកំទេចអាគារមួយនៃសង្កាត់អ្នកមាន ក្នុងរដ្ឋធានីម៉ានីសប្រទេសហ្វីលីពីន កាលពីយប់ថ្ងៃសុក្រ ហើយបានសម្លាប់មនុស្សបីនាក់ នៅក្នុងរថយន្ដ ដែលចតនៅក្បែរនោះ។ នេះជាការប្រកាសឲ្យដឹង របស់អាជ្ញាធរក្នុងតំបន់។
ការផ្ទុះបានធ្វើឲ្យមានប្រហោងយ៉ាងធំ ជញ្ជាំងអាគារនោះ និងបានធ្វើឲ្យខ្ទាតបេតុង ធំៗជាច្រើនដុំ ធ្លាក់មកនៅលើដី និងផ្លូវខាងមុខ។ សហគ្រាសម្ចាស់អាគារ បាននិយាយក្នុងសេចក្ដីប្រកាសព័ត៌មានមួយថា មនុស្សបីនាក់ ដែលស្ថិតក្នុងរថយន្ដដឹកទំនិញនៅក្រោមអាគារ បានរងគ្រោះដល់ជីវិត ដោយសារដុំបេតុងទាំងនោះបានធ្លាក់សង្កត់លើ និងមានមនុស្ស៤នាក់ផ្សេងទៀត បានរងរបួស។
ស្ត្រីម្នាក់ធ្វើការក្នុងការិយាល័យនគរបាលជិតនោះ ក្នុងលក្ខខ័ណ្ឌមិនបញ្ចេញឈ្មោះ បាននិយាយថា ការផ្ទុះនេះបណ្ដាលមកពីសម្ភារះចង្ក្រានបាយ មិនមែនជាគ្រាប់បែបនោះទេ។ បើតាមអ្នកនាំពាក្យរបស់សហគ្រាសម្ចាស់អាគារ គេហដ្ឋាន (appartement) ពីរឈុតនៃអាគារ ត្រូវបានបំផ្លាញចោលទាំងស្រុង។
សង្កាត់ទាំងមូលត្រូវបានបិតបង្ខាំងដោយអាជ្ញាធរ ក្នុងយប់កន្លងទៅនេះ។ នគរបាល ក្រុមលត់អគ្គិភ័យ និងក្រុមអ្នកជួយសង្គ្រោះ បានមកដល់ហើយបានបញ្ជូនអ្នករបួសទៅកាន់មន្ទីរពេទ្យនៅក្បែរនោះ។
រដ្ឋលេខាធិការក្រសួងមហាផ្ទៃ លោកម៉ារ រ៉ូស្សាស (Mar Roxas) រួមជាមួយនឹងលោកប្រធានាធិតបតីហ្វីលីពីន ប៊េននីញ៉ូ អាគីណូ (Benigno Aquino) បានធ្វើដំណើរទៅកាន់ទីនោះ ហើយបានថ្លែងទៅកាន់អ្នកកាសែតថា អ្នករស់នៅក្នុងអាគារត្រូវបានជម្លៀសចេញទាំងអស់ ដើម្បីទុកឲ្យអាជ្ញាធរធ្វើការស៊ើបអង្កេត នូវរាល់គ្រប់ចំនុច។ លោករ៉ូស្សា បានបញ្ជាក់ថា ការស៊ើបអង្កេតផ្នែកស្រាវជ្រាវវេជ្ជសាស្ត្រ នៅមិនទាន់បានបញ្ចប់នៅឡើយ៕
-------------------------------------------------
ដោយ ៖ កេសរកូល - ភ្នំពេញ ថ្ងៃទី៣១ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ