ក្រសួងរ៉ែ និងថាមពល ប្រើយុទ្ធសាស្រ្តថ្មី លើអាជីវកម្ម«បូមខ្សាច់»
ក្រសួងរ៉ែ និងថាមពល បានសម្រេចផ្អាក ជាបណ្តោះអាសន្ន នូវការអាជ្ញាប័ណ្ឌថ្មី ទៅលើអាជីវកម្មបូមខ្សាច់ និងធ្វើការពិនិត្យ និងវាយតម្លៃឡើងវិញ នូវក្រុមហ៊ុនដែលមានអាជ្ញាប័ណ្ណស្រាប់ និងសកម្មភាពអនាធិបតេយ្យ ជីកយករ៉ែទាំងឡាយ នៅប្រទេសកម្ពុជា។ ក្រសួងបានបង្កើតក្រុមការងារ អធិការកិច្ច៣ក្រុម ដែលមានតួនាទី ត្រូវដោះស្រាយជាបន្ទាន់ គឺការចេញអាជ្ញាប័ណ្ណខ្សាច់ ឱ្យធ្វើអាជីវកម្មបានទាន់ពេលវេលា និងការដោះស្រាយភាពមិនប្រក្រតី នៃការធ្វើអាជីវកម្មរ៉ែផ្សេងទៀត ដោយអនាធិបតេយ្យ និងមិនត្រឹមត្រូវ តាមកិច្ចព្រមព្រៀងរវាងក្រុមហ៊ុន និងក្រសួង។
ថ្លែងនៅក្នុងសន្និសីទកាសែត នៅថ្ងៃទី២៥ មីនា ២០១៥នេះ លោក ស៊ុយ សែម រដ្ឋមន្រ្តីក្រសួងរ៉ែ និងថាមពល បានឱ្យដឹងថា ក្រសួងនឹងធ្វើការសិក្សា ពីទីតាំង នៅតាមដងស្ទឹង ទន្លេ ដើម្បីកំណាត់ថាកន្លែងណាអាចបូមខ្សាច់បាន ដើម្បីបង្កងាយស្រួល ក្នុងការផ្តល់អាជ្ញាប័ណ្ណដល់អាជីវករ ដែលធ្វើអាជីវកម្មបូមខ្សាច់។
[...]