អង្គការឃ្លាំមើលការបោះឆ្នោត៖ កម្កល់ប្រាក់១៥លានរៀល គឺជារនាំងសម្រាប់បក្សតូចៗ
បន្ទាប់ពីគណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) តម្រូវឲ្យគណបក្សនយោបាយ ឈរឈ្មោះបោះឆ្នោត តម្កល់ប្រាក់ជាមុនក្នុងតម្លៃ ១៥ លានរៀលនោះ អង្គការឃ្លាំមើលការបោះឆ្នោតមួយ បានចាត់ទុកនិតិវិធីនោះ ថាគឺជារនាំងមួយ មិនឲ្យគណបក្សនយោបាយតូចៗ មានសិទ្ធិចូលរួមការបោះឆ្នោតបានដោយសេរី។
លោក ហង្ស ពុទ្ធា។
លោក ហង្ស ពុទ្ធា នាយកគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) បានចាត់ទុកបទបញ្ញត្តិរបស់ គ.ជ.ប ថាគឺជាការកាត់បន្ថយសិទ្ធិ ចូលរួមក្នុងការប្រកួតប្រជែង របស់គណបក្សនយោបាយ ដោយសារនៅពេលកន្លងមក មានគណបក្សនយោបាយចុះឈ្មោះ នៅឯក្រសួងមហាផ្ទៃ ជាង ៤០គណបក្ស ប៉ុន្តែមានតែជាង ១០គណបក្សប៉ុណ្ណោះ ដែលឈរឈ្មោះបោះឆ្នោត។ លោក ហង្ស ពុទ្ធា បាននិយាយថា «ការកំណត់ខ្ពស់ពេក វាធ្វើឲ្យរាំងស្ទះ ហើយក៏ដូចជាបានកាត់បន្ថយ នូវសិទ្ធិចូលរួមក្នុងការធ្វើសកម្មភាព នយោបាយជាគណបក្សប្រកួតប្រជែងផងដែរ»។
ឆ្លើយតបទៅនឹងការលើកឡើង របស់អង្គការក្រៅរដ្ឋាភិបាលនោះ លោក ទេព នីថា អគ្គលេខាធិការ គ.ជ.ប បានឲ្យដឹងថា គ.ជ.ប មិនបានកំណត់ប្រាក់តម្កល់នោះទេ។ ប៉ុន្តែច្បាប់បោះឆ្នោត បានកំណត់ឲ្យគណបក្សនយោបាយ ដែលឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ត្រូវតម្កល់ប្រាក់ជាចាំបាច់។ លោកបានថ្លែងបន្តថា «នៅពេលចុះបញ្ជីគណបក្សនយោបាយ បេក្ខជនឈរឈ្មោះ លក្ខខណ្ឌគឺត្រូវបង់ប្រាក់តម្កល់ ១៥លានរៀល។ ១៥លានរៀល គាត់នឹងអាចទទួលយកវិញបាន នៅពេលដែលគាត់បាន ៣ភាគរយ ឬក៏គាត់បានទទួលអាសនៈមួយ។ តែក្នុងករណី គាត់មិនទទួលបានសំឡេងឆ្នោត មិនបាន ៣ភាគរយ ឬអាសនៈមួយទៀត ប្រាក់នឹងទៅជាប្រាក់របស់រដ្ឋ។»
លោកបានបញ្ជាក់ទៀតថា ការបោះឆ្នោតជ្រើសរើសតំណាងរាស្ត្រអាណ្តិទី៥ ដែលនឹងប្រព្រឹត្តទៅនៅថ្ងៃទី ២៨ កក្តដា ខាងមុខនេះអាចនឹងមាន គណបក្សនយោបាយប្រមាណជា១០ ឈរឈ្មោះបោះឆ្នោត។
កាលពីចុងខែមិនា គ.ជ.ប បានប្រកាសជូនដំណឹង ឲ្យគណបក្សនយោបាយ ដែលមានបំណងចូលរួមឈរបោះឆ្នោត សម្រាប់ជ្រើសតាំង តំណាងរាស្ត្រនីតិកាលទី៥ នាខែកក្កដា ខាងមុខនេះឲ្យតម្កល់ប្រាក់ ចំនួន១៥លានរៀល។ នៅក្នុងលិខិតជូនដំណឹងនោះ ក៏បញ្ជាក់ថា ប្រាក់តម្កល់ ១៥លានរៀល នឹងត្រូវបង្វិលជូន ទៅកាន់គណបក្សសាម៉ីវិញ ក្នុងករណីដែលគណបក្សនោះ ដណ្តើមបានការគាំទ្រយ៉ាងតិច ៣% នៃសំឡេងឆ្នោតសរុប ឬបានទទួលកៅអីយ៉ាងតិច មួយអាសនៈនៅក្នុងរដ្ឋសភា។ នៅក្នុងលិខិតនោះ បានបញ្ជាក់ទៀតថា «ប្រសិនបើគណបក្សនយោបាយណាមួយ មិនទទួលបានសំឡេងគាំទ្រគ្រប់ ឬកៅអីក្នុងរដ្ឋសភាទេនោះ ប្រាក់តម្កល់នឹងមិនត្រូវបង្វិលឲ្យវិញទេ។»
យោងទៅតាមប្រតិទិនរបស់ គ.ជ.ប ការចុះបញ្ជីគណបក្សនយោបាយ ឈរឈ្មោះបោះឆ្នោត និងបញ្ជីបេក្ខជន គឺចាប់ផ្ដើមពីថ្ងៃទី២៩ មេសា ដល់ថ្ងៃទី១០ ឧសភា៕
-----------------------------------------------
ដោយ ៖ គិន ងុយ - ភ្នំពេញ ថ្ងៃទី០២ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ