ខណៈពេលដែលកូរ៉េខាងជើង បានប្រកាសក្នុងរយៈពេលចុងក្រោយ ពីការដាក់ប្រទេសខ្លួន ក្នុង«ស្ថានភាពសង្គ្រាម» ទល់​នឹងប្រទេសកូរ៉េខាងត្បូង សហគមន៍អន្តរជាតិក៏បានតម្លើងសម្លេងរបស់ខ្លួន ក្នុងការអំពាវនាវ អោយគ្រប់ភាគីទាំងអស់ ងាកមករកស្ថានភាពស្ងប់ស្ងៀមវិញ។

ព្យុះហយាត្រា បង្ហាញពីកាំជ្រួចម៊ីលស៊ីល របស់ប្រទេសកូរ៉េខាងជើង។

បន្ទាប់ភ្លាមៗ ពីការសេចក្ដីប្រកាសព័ត៌មាន របស់ទីក្រុងព្យុងយ៉ាង សហរដ្ឋអាមេរិកបានថ្លែងយកជាបានការ នូវការគម្រាម​ទាំងឡាយរបស់ប្រទេសកុម្មុយនីស។ «យើងបានដឹងពីសេចក្ដីថ្លែងការណ៍ថ្មីមួយមិនល្អ ពីសំណាក់ប្រទេសកូរ៉េខាងជើង។ យើងចាត់ទុកការគម្រាមទាំងនេះ យកជាបានការ ដោយរក្សាការទាក់ទង់យ៉ាងជិតដិត ជាមួយនឹងកូរ៉េខាងត្បូង សម្ព័ន្ធមិត្ត​របស់យើង។» នេះជាការថ្លែងអោយដឹង របស់លោកស្រី កេតលីន ហេដេន (Caitlin Hayden) អ្នកនាំពាក្យក្រុមប្រឹក្សា​សន្តិសុខជាតិ របស់សេតវិមាន។ លោកស្រីបន្ថែមថា «តែយើងសូមរំលឹកថា កូរ៉េខាងជើងមានទម្លាប់ ក្នុងការប្រើប្រាស់​ពាក្យសម្ដី និងការគម្រាមធ្វើសង្គ្រាម ហើយការប្រកាសដែលបានធ្វើមកនេះ ធ្វើអោយដឹង ពីការបន្តរូបមន្ដបែប​នេះជា​ថ្មី​ទៀត»។ មន្ទីប៉ង់តាហ្គោន (ក្រសួងការពារជាតិអាមេរិក) បានប្រាប់អោយដឹងដូចគ្នា ថាបានពង្រឹកនូវយុទ្ធសាស្ត្រការពារ ខ្លាំងជាងមុន នូវផ្នែកខាងលិចនៃសហរដ្ឋអាមេរិក។

ប្រទេសរ៉ូស្សី ឯណោះវិញ បានអំពាវនាវអោយប្រទេសកូរ៉េទាំងពីរ និងសហរដ្ឋអាមេរិក បង្ហាញនូវជំហរ«អត់ធ្មត់» និងការ​«ទទួលខុសត្រូវ» អោយបានខ្ពស់បំផុត នៅក្នុងឧបទ្វីបកូរ៉េ។ សេចក្ដីប្រកាសព័ត៌មានរបស់ក្រសួងការបរទេសរ៉ូស្សី បាន​ថ្លែងថា «យើងមិនយល់ស្របទៅនឹងសេចក្ដីថ្លែងការណ៍ ឬការសម្រេចចិត្តណាក៏ដោយ ដែលនៅគ្រប់រូបភាព នាំទៅ​ដល់​ការបង្កើតអោយមានភាពតានតឺង។ យើងកំពុងធ្វើការទាក់ទងជាប់ជាប្រចាំ ជាមួយដៃគូររបស់យើង ក្នុងការស្វែងរក​ការ​ចរចារ៦ភាគី លើបញ្ហានុយក្លេអ៊ែរ របស់កូរ៉េខាងជើង ដើម្បីទប់កុំអោយស្ថានការណ៍ ឃ្លាតឆ្ងាយពីរង្វង់ នយោបាយ-ការទូត។»

សូមបញ្ជាក់ថា ភាគីចរចាទាំង៦នោះ រូមមាន ប្រទេសកូរ៉េទាំងពីរ ចិន សហរដ្ឋអាមេរិក រ៉ូស្សី និងជប៉ុន។

រីឯប្រទេសបារាំង បានថ្លែងពីការព្រួយបារម្ភ «យ៉ាងខ្លាំង» ជាមួយនឹងស្ថានភាពនៅក្នុងតំបន់ ហើយបានអំពាវនាវ​អោយ​ប្រទេសកូរ៉េខាងជើង បញ្ឈប់នូវការបង្កហេតុណាជាថ្មីទៀត។ តាមរយះសេចក្ដីប្រកាសព័ត៌មានមួយ ចេញនៅថ្ងៃសៅរ៍​ទី៣០ខែមិនា អ្នកនាំពាក្យនៃក្រសួងការបរទេស លោកហ្វីលីព ឡាលីយ៉ូ (Philippe Lalliot) បានអោយដឹងថា «ប្រទេស​បារាំងបានសុំទៅប្រទេសកូរ៉េខាងជើង អោយបំពេញនូវកតព្វកិច្ចអន្តរជាតិរបស់ខ្លួន ជាពិសេសនៅក្នុងរង្វង់ នៃ​ដំណោះ​ស្រាយស្និតនឹងសំនុំរឿង របស់អង្គការសហប្រជាជាតិ និងចាប់បង្កើតអោយមាន នូវការជជែករកគ្នាឡើងវិញ»។

រដ្ឋមន្ត្រីការបរទេសអាឡឺម៉ង់ លោក ហ្គីដូ វេសធើវែល៍ (Guido Westerwelle) ឯណោះ បានប្រាប់របបក្រុងព្យុងយ៉ាង អោយ​ឈប់«ប្រលែងលេងជាមួយនឹងភ្លើង» ដោយបានចាត់ទុកជា«បានការ» នូវរាល់ការគម្រាមទាំងឡាយ ដែលបានដាក់​ទម្ងន់​ក្នុងតំបន់។ កាសែតមួយបានស្រង់សម្ដីរបស់លោករដ្ឋមន្ត្រី មកសរសេរថា «ល្បែងមិនទទួលខុសត្រូវ របស់កូរ៉េខាង​ជើង ជាមួយនឹងភ្លើង ត្រូវតែបញ្ឈប់»។ លោកបានសម្ដែងនូវការព្រួយបារម្ភថា បើទោះជារូបភាព និងពាក្យសម្ដី បានធ្វើអោយ​គេគិតថា ប្រទេសកូរ៉េខាងជើង បានឈានជើង ចូលមកដល់សម័យកាលថ្មីនោះក៏ដោយ តែអ្វីៗទាំងអស់ដែលបាន​កើត​ឡើង ក្នុងរយះពេលចុងក្រោយនេះ បង្កអោយមាន នូវការគម្រាមយ៉ាងជាក់ច្បាស់មួយ សម្រាប់«សន្តិភាព» នៅក្នុងតំបន់​ទាំងមូល៕

------------------------------------------------
ដោយ ៖ កេសរកូល - ភ្នំពេញ ថ្ងៃទី៣១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ