ឥណ្ឌា៖ ក្រុមហ៊ុនរថយន្ដហ័ដ សុំទោសចំពោះការផ្សាយពាណិជ្ជកម្ម ពិសេសជ្រុល
បង្កើតគំនិតដោយ ភ្នាក់ងារពាណិជ្ជកម្មមួយនៅប្រទេសឥណ្ឌា ការផ្សាយពាណិជ្ជកម្មទាំងនេះ មិនត្រូវបានក្រុមហ៊ុនផលិតរថយន្ដ យកទៅប្រើប្រាស់ទេ។ ផ្ទុយទៅវិញ វាបានធ្វើអោយផ្ទុះនូវ ការក្ដៅក្រហាយមួយឡើង ជាពិសេសនៅបីខែក្រោយ មរណភាពរបស់និស្សិតស្រី ដោយការរំលោភជាក្រុម នៅក្នុងប្រទេសនេះរួចមក។
រូបទីមួយ បានបង្ហាញពីអតីតនាយករដ្ឋមន្ត្រីអ៊ីតាលី ស៊ីវីយ៉ូ ប៊ែរលូស្កូនី (Silvio Berlusconi) នៅនឹងចង្កូតរបស់រថយន្ដ ហ័ដ ហ្វីហ្គូ (Ford Figo) ជាមួយនឹងនាងៗ «ពិសេស» បីរូប នៅក្នុងឃ្លប់ខាងក្រោយ ជាមួយនឹងពាក្យស្លោកថា «ទុកភាពកង្វល់របស់អ្នក នៅខាងក្រោយ»។
«យើងសោកស្ដាយណាស់ នឹងការផ្សព្វផ្សាយនៃផ្លាកពាណិជ្ជកម្មទាំងនេះ ដែលមានចរិកលក្ខណៈយ៉ាងអាក្រក់ ហើយខុសពីមាត្រាដ្ឋានអាជីប និងការចង់បានរបស់ ហ័ដ (Ford)។ ផ្លាកផ្សាយទាំងនេះ មិនត្រូវបានបង្កើតឡើង សម្រាប់ការប្រើប្រាស់ក្នុងលក្ខណៈជំនួញជួញដូរ តែក៏រឹតតែមិនត្រូវអោយកើតមានដែរ និងកាន់តែមិនត្រូវអោយមានថែមទៀត នៅលើអាំងធើណែត។»
ពាក្យសុំទោសទាំងនេះ បានបង្ហាញពីដើមសប្ដាហ៍មុន របស់ក្រុមហ៊ុនផលិតយានយន្ដ ហ័ដ តែមិនបានរំងាប់អារម្មណ៍ របស់ពួកអ្នករិះគន់ និងសាធារណមតិទូទៅនោះបានឡើយ គិតចាប់តាំងពីរូបទាំងនេះ បានដាក់ចេញផ្សាយដោយភ្នាក់ងារពាណិជ្ជកម្មឥណ្ឌា ឈ្មោះជេដាប់ប៊ែលយូធី អ៊ីនឌៀ (JWT India)។ រូបទាំងនេះនៅមិនទាន់បាន ក្រុមហ៊ុន ហ័ដ ទទួលយកទៅប្រើប្រាស់នៅឡើយ តែបានដាក់ផ្សាយរួចជាស្រេច នៅលើគេហទំព័រ «ពាណិជ្ជកម្មនៃពិភពលោក (Ads of the World)» កាលពីចុងសប្ដាហ៍មុន។ រូបទាំងនេះ ត្រូវបានគេដកចេញពីគេហទំព័រ នៅពេលបន្ទាប់មក។
ឯរូបពីរផ្សេងទៀត បង្ហាញពីប៉ារីស ហ៊ីលតុន (Paris Hilton) បានចាប់ជម្រិតស្ត្រីបីរូប និងអ្នកប្រណាំងកាំជ្រួច លើវាលរាប ម៉ែឃើល ខ្យូម៉ារើ (Michael Schumacher) ចាប់គូរប្រជែងរបស់គាត់ ទុកនៅក្នុងឃ្លបនោះទាំងអស់។
--------------------------------------------------
ដោយ ឈូករ័ត្ន - ប៉ារីស ថ្ងៃទី៣១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ