សេតវិមាន របស់និយាយកាលពីថ្ងៃសុក្រទី២៩ខែមិនានេះ ថាបានយកជា«បានការ» នូវការប្រកាសរបស់​ ប្រទេសកូរ៉េ​ខាងជើង ដែលដាក់ប្រទេសខ្លួន ទៅក្នុង«ស្ថានភាពសង្គ្រាម» ប្រឆាំងនឹងប្រទេសកូរ៉េខាងត្បូង។ តែសេតវិមាននៅតែ​បានកត់សម្គាល់ថា ការគម្រាមទាំងនេះ មិនមែនជារឿង ខុសមួយដងនោះទេ។

របបក្រុងព្យុងយ៉ាង បានដាក់ប្រទេសខ្លួន ទៅក្នុង«ស្ថានភាពសង្គ្រាម»។

លោកស្រី កៃលីន ហេដេន (Caitlin Hayden) អ្នកនាំពាក្យក្រុមប្រឹក្សាសន្តិសុខជាតិអាមេរិកាំង បានថ្លែងប្រកាសថា «យើង​បានឃើញពីព័ត៌មាន ស្ដីពីការប្រកាសថ្មី ដែលមិនល្អមួយ របស់កូរ៉េខាងជើង។ យើងចាត់ទុកការគម្រាមទាំងនេះ ជាបាន​ការ និងនៅតែមានជំហរយ៉ាងជិតស្និតជាមួយ កូរ៉េខាងត្បូងសម្ព័ន្ធមិត្តរបស់យើង»។

ប្រទេសកូរ៉េខាងជើង បានប្រកាសថាបាន ចាប់ផ្ដើមដោយជៀសពុំផុត ចូលទៅក្នុង«ស្ថានភាពសង្គ្រាម»មួយ ប្រឆាំង​នឹង​កូរ៉េខាងត្បូង ដែលជាសេចក្ដីប្រកាសមួយចុងក្រោយបំផុត រាប់តាំងពីការប្រកាសនានា ជិតមួយសប្ដាហ៍មកហើយ។ ការ​ប្រកាសនេះ បានបង្កអោយមានការព្រួយបារម្ភ ពីសំណាក់សហគមន៍អន្តរជាតិ ស្ដីពីសន្តិភាពនៅឧបទ្វីបកូរ៉េ។ ទីក្រុង​ព្យុងយ៉ាង បានបញ្ជាក់ច្បាស់ៗទៀតថា រាល់ការបង្ករឿងទាំងឡាយ នឹងអាចបង្កើតអោយមាន ប្រតិកម្មតបតភ្លាមៗ ឈាន​ទៅកាន់ជម្លោះ«នុយក្លេអ៊ែ»។

ក្នុងសេចក្ដីប្រកាសព័ត៌មានរបស់ខ្លួន អ្នកនាំពាក្យក្រុមប្រឹក្សាសន្តិសុខជាតិអាមេរិក បានកំណត់ពីការគម្រាមចុងក្រោយ នេះរបស់កូរ៉េខាងជើង ថានៅក្នុងផ្នែកមួយ នៃការគម្រាម«រាល់ដង»របស់របបកុម្មុយនីស ដឹកនាំដោយគឹមជុងអ៊ុន (Kim Jong-Un) ហើយមិនមានលក្ខណៈអ្វី អោយចម្លែកខ្លាំងលើសពីការគម្រាមលើកមុនៗទេ។ សេចក្ដីប្រកាសព័ត៌មាន​នោះ​ក៏និយាយដែរថា សហរដ្ឋអាមេរិក «ពិតជា»មានសមត្ថភាពគ្រប់គ្រាន់ ក្នុងការការពារខ្លួន និងការពារសម្ព័ន្ធមិត្តទាំងឡាយ នៅអាស៊ី។

«យើងបន្តចាត់វិធានការសំខាន់ៗ បន្ថែមទៀត ដើម្បីប្រឆាំងទប់នឹងការគម្រាមរបស់ប្រទេសកូរ៉េខាងជើង ដែលក្នុងនោះ​មានគម្រោង តម្លើងចំនួនយន្ដហោះត្រៀមប្រយុទ្ធ នៅលើទឹកដីអាមេរិក ក៏ដូចជាប្រព័ន្ធចាប់ព័ត៌មាន និងប្រព័ន្ធបង្វែ​ទិសដៅ» លោកស្រីហេដេន បានបន្ថែម។

មុននេះបន្តិច អ្នកនាំពាក្យរបស់សេតវិមាន បានថ្លែងបញ្ជាក់ទៅកាន់ អ្នកសារព័ត៌មានថា «យើងសហការយ៉ាងជិតស្និត មិនត្រឹមតែជាមួយសម្ព័ន្ធមិត្តរបស់យើងទេ តែជាមួយប្រទេសចិន និងរ៉ូស្សី ដែលសុទ្ធតែមានបំណងយ៉ាងមុតមាំ ក្នុងការ​ស្វែងរកដំណោះស្រាយមួយ ដោយសន្តិភាព ទៅលើស្ថានភាពនេះ»៕

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី៣០ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ