សាកសពរបស់បេក្ខជន ដែលបានស្លាប់ នៅពេលកំពុងថតកម្មវិធីទូរទស្សន៍ បានបញ្ជូនមកដល់រាជធានីភ្នំពេញ​រួចរាល់​ហើយ។ ដោយឡែក ការិយាល័យរដ្ឋអាជ្ញា នៃទីក្រុងប៉ារីស មិនបានចាត់ការ បើកការស៊ើបអង្កេត ទាក់ទងនឹងសំនុំរឿង​មរណភាពនេះ ប្រឆាំងនឹងស្ថានីយទូរទស្សន៍ទេ។

រូបផ្លាក របស់កម្មវិធីទូរទស្សន៍កោះ ល័នតា។

សាកសពលោក ហ្សេរ៉ា បាបាំង បានដឹកមកដល់រាជធានីភ្នំពេញ នៅថ្ងៃសៅរ៍មួយថ្ងៃក្រោយហេតុការណ៍។ គេហទំព័រ​របស់​ទស្សនាវដ្ដី​បារាំង ឡឺព័ង (Le Point) បានសរសេរថា សមាជិកគ្រួសាររបស់លោកបាបាំង ចំនួន៩នាក់ ក្នុងនោះមានឪពុក​ម្ដាយ​លោក​ផង បានជិះយន្ដហោះនៅថ្ងៃដដែលនេះ ធ្វើដំណើរទៅកាន់ប្រទេសកម្ពុជា ដើម្បីទទួលសពត្រឡប់​មកកាន់​បារាំងវិញ។ នាយកស្ថានីយ៍ទូរទស្សន៍ ប៉ុស្ដ៍លេខមួយបារាំង លោក ណុន្ស៍ ប៉ាវលីនី (Nonce Paolini) ក៏បានធ្វើដំណើរ​ដោយផ្ទាល់ដែរ មក​សម្ដែងមរណទុក្ខ នៅចំពោះគ្រួសារសព និងបានអមដំណើរពួកគេ រហូតមកដល់ព្រលានយន្ដហោះ​អន្តរជាតិ។

ផលិតកម្មអេវេនឈើ ឡាញ (Adventure line productions - ALP ) ដែលផលិតកម្មវិធីនេះ សម្រាប់ស្ថានីយ៍ទូរទស្សន៍ បានពន្យល់ប្រាប់អ្នកកាសែតថា «យើងនឹងរងចាំពួកគេ នៅប្រទេសកម្ពុជា ដើម្បីធ្វើពិធីប្រសិទ្ធិពរជ័យមួយ ហើយ​បន្ទាប់​មក យើងនឹងនាំពួកគេ ទៅកាន់កន្លែងកើតហេតុ ដើម្បីពួកគេអាចរំលឹកវិញ្ញាណខ័ន»។ តាមសារព័ត៌មាន ឡឺប៉ារីស៊ីយៀន (Le Parisien) ការដឹកបញ្ជូនសាកសព ត្រឡប់ទៅប្រទេសបារាំងវិញ នឹងត្រូវធ្វើនៅដើមសប្ដាហ៍ក្រោយ។

សូមបញ្ជាក់ថា កម្មវិធី«កោះល័នតា» បានជ្រើសរើសកោះរ៉ុង នៅកណ្ដាលឆកកំពង់សោម ក្នុងប្រទេសកម្ពុជា ធ្វើជាកន្លែង​ថត។ នៅក្រោយមរណភាពរបស់បេក្ខជនរបស់ខ្លួន ស្ថានីយ៍ទូរទស្សន៍បានសម្រេចលប់ចោល នូវវគ្គទី១៦ ឆ្នាំ២០១៣នេះ ជាស្ថាពរ។ ក្រុមអ្នកទទួលខុសត្រូវកម្មវិធីនេះ ដែលស្ថិតក្នុងសភាពតក់ស្លុតនៅឡើយ កំពុងរៀបចំឲ្យបេក្ខជន និងក្រុមអ្នក​បច្ចេកទេសទាំងអស់ បានវិលត្រឡប់ទៅបារាំងវិញ។ ស្ថានីយ៍ទូរទស្សន៍បានថ្លែងថា «ដំណើរត្រឡប់វិញនៃបេក្ខជន នឹង​ត្រូវធ្វើក្នុងរយះពេល៤៨ម៉ោងនេះ។ មួយផ្នែកនៃអ្នកបច្ចេកទេស ក៏នឹងត្រូវអោយត្រឡប់មកវិញឆាប់ៗនេះដែរ តែប្រហែល​ជាត្រូវប្រើពេលយូរបន្តិច ព្រោះមានសម្ភារះច្រើនដែលត្រូវរៀបចំ។»

បេះដូងឈប់ដើរបីដង

ជនរងគ្រោះ លោក ហ្សេរ៉ា បាបាំង (Gérald Babin) អាយុ២៥ឆ្នាំ មកពីឃុំវីលជីហ្វ (Villejuif) ក្បែរទីក្រុងប៉ារីស ត្រូវបាន​បញ្ជូនតាមឧទ្ធម្ភាគចក្រ ទៅសង្គ្រោះជាបន្ទាន់ តែបានផុតដង្ហើមមែនទែន នៅពេលទៅដល់មន្ទីពេទ្យក្រុងព្រះសីហនុ។ នៅពេលចាប់ផ្ដើមវិញ្ញាសារ«ទាញខ្សែរពួរ» កាលពីថ្ងៃសុក្រទី២២ខែមិនា ហ្សេរ៉ា បាបាំង បានទទួលអារម្មណ៍ថា មានការ​ឈឺចុកចាប់នៅលើដៃ  ហើយបានសុំអន្តរាគមន៍ភ្លាមៗ ពីគ្រូពេទ្យបារាំងប្រចាំការនៅទីនោះ។ ពីទីនោះ រហូតមកដល់​មន្ទីពេទ្យ បេះដូងរបស់ ហ្សេរ៉ា បាបាំង បានបញ្ឈប់សកម្មភាពចំនួន៣ដង ប៉ុន្តែនៅលើកទីបី បេក្ខជនវ័យក្មេងរូបនេះ បាន​ឈានដល់ដំណាក់កាល លែងដឹងខ្លួនរហូត បើទោះមានការខ្នះខ្នែង ពីក្រុមគ្រូពេទ្យខ្មែរនៅនឹងមន្ទីពេទ្យនោះក៏ដោយ។

បើតាមអ្នកជិតខាង ដែលរស់នៅជាប់ក្បែរ នឹងហ្សេរ៉ា បាបាំង បានរំលឹកពីបេក្ខជនថា ជាមនុស្សម្នាក់ស្ងាត់ស្ងៀម គួរសម និងមានចិត្តថ្លើមល្អ។ ពួកគេទាំងនោះនិយាយថា ហ្សេរ៉ា ហាត់យកសាច់ដុំជាញឹកញាប់ ហើយថាបុរសវ័យក្មេងនេះ មាន​សុខភាពល្អ និងមានចរិកជាអ្នកផ្សងព្រេងមួយរូប តែមិនគួរណាមានអាយុខ្លីយ៉ាងដូច្នេះទេ៕

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី២៤ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ