«ស្បថឲ្យងាប់តៃហោង» ជាការបបួលលោក សម រង្ស៊ី ចូលរួមស្បថជាមួយលោក ពីសំណាក់លោក ហ៊ុន សែន នៅក្នុងការថ្លែងមួយរបស់លោក កាលពីថ្ងៃចន្ទ ក្នុងវិមានសន្តិភាព (រាជធានីភ្នំពេញ) ទៅកាន់ក្រុម អត្ដពលិក​ ​និង​កីឡាករ​ ​កីឡាការិនី​ ​គ្រូបង្វឹក​ ​និង​ប្រតិភូ​កីឡា​ជាង​៧០​នាក់​ ​មុន​ពេល​ពួកគេ​ចេញ​ទៅ​ប្រកួត ​កីឡា​ប្រចាំ​ទ្វីប​អាស៊ី​ ​(Asian Games)​ ​លើក​ទី​១៨ នៅឯប្រទេសឥណ្ឌូនេស៊ី។ 

ប៉ុន្តែការបបួលឲ្យស្បថ បានប្រែក្លាយជាការបង្ខំ បន្ទាប់ពីលោក សម រង្ស៊ី ឆ្លើយតបមកវិញ ថាការស្បថ ជាជា​វិធី​ឃ្លាត​ឆ្ងាយ​ពី​វិទ្យាសាស្ត្រ​ ​និង​បច្ចេកទេស​ជាក់ស្តែង ហើយបានប្រាប់លោក ហ៊ុន សែន ឲ្យមានគំនិតជឿនលឿនបន្តិចទៅ។ លោក ហ៊ុន សែន បានបង្ខំលោក សម រង្ស៊ី ឲ្យ​ត្រូវតែ​ទទួលសម្បថ ដើម្បីប្រតិកម្ម​នឹងចម្លើយតបនោះ ដោយអះអាងថា លោកបាន «លេងបែបវិទ្យាសាស្រ្តនេះ ជាមួយគ្នា​អស់ជាង២០ឆ្នាំ មកហើយ»។

លោក ហ៊ុន សែន បានថ្លែងបង្ខំលោក សម រង្ស៊ី ឲ្យស្បថ នៅក្នុងបទសម្ភាសមួយ ទៅឲ្យប្រព័ន្ធឃោសនារបស់លោក ដូច្នេះថា៖ «ឥឡូវយើងងាក មកលេងបែបផ្លូវងងឹតវិញម្តង។ បើទោះបីអ្នកឯង មិនហ៊ានស្បថ ក៏សម្បថនេះ ធ្លាក់ទៅលើអ្នកឯងដែរ ព្រោះខ្ញុំបានស្បថរួចហើយ ហើយសូមវត្ថុស័ក្តិសិទ្ធ​លើលោក ជួយនាំនូវពាក្យសម្បថរបស់ខ្ញុំ ទៅកាន់អ្នកឯងផង។»។

តែបន្ទាប់ពីការបង្ខំ របស់លោក ហ៊ុន សែន ដែលធ្វើឡើង តាមរយៈប្រព័ន្ធផ្សព្វផ្សាយនោះរួច លោក សម រង្ស៊ី ដូចជាមិនបាន​ចាប់​អារម្មណ៍​អ្វីបន្ថែមទៀតទេ។ នៅលើបណ្ដាញសង្គម គេបែរជាឃើញមេដឹកនាំប្រឆាំង បង្ហោះរូបភាពលោកហែលទឹក នៅក្នុងថ្ងៃសម្រាកវិសមកាលនោះទៅវិញ។ លោកបានសរសេរសារ​មួយខ្លី អះអាងថា៖ «កីឡាហែលទឹក ពេលវិស្សមកាល នៅតំបន់ Provence ប្រទេសបារាំង»។

ផ្ទុយទៅវិញ ការបង្ហោះរូបភាពធ្វើកីឡា របស់ប្រធានចលនាសង្គ្រោះជាតិ បានបង្កភាពរីករាយក្អាកក្អាយ សម្រាប់ក្រុមអ្នកគាំទ្រលោក នៅក្នុងបណ្ដាញសង្គមយ៉ាងសម្បើមដៃ។

លោក សុភ័ណ្ឌ ឡារី ដែលធ្លាប់ជាតារាសម្ដែង និងជាកូនធម៌លោក សម រង្ស៊ី បានសរសេរមុនគេ សរសើរឪពុកធម៌ខ្លួន ថាជា​«កីឡាករខ្លាំងពិត» និងចំអកឲ្យលោក ហ៊ុន សែន ថាជា​«កីឡាករដ៏កំសាក»។ លោក ឡារី សរសេរថា៖ «កីឡាករខ្លាំងពិត ដែលតែងតែប្រកួត​ដោយភាពស្មោះត្រង់ ដូចលោកប្រធាននឹងហើយ! ទើបធ្វើឲ្យកីឡាករដ៏កំសាកម្ខាងទៀត អន់មិនហ៊ានប្រកួត ដោយភាពត្រឹមត្រូវនោះទេ កីឡាករបែបនេះចូលចិត្តប្រកួត បែបទុច្ចរិតអាក្រក់ព្រៃផ្សៃ»។

អ្នកគាំទ្រខ្លះទៀត សរសើរលោក សម រង្ស៊ី មិនដាច់ពីមាត់ ពីការហែលទឹក ដែលមានលក្ខណៈជាអ្នកអាជីព និងជាពិសេស សរសើរពីភាពស្វាហាប់ កម្លាំងកាយមាំមួន ដូចនៅ«វ័យ៣៥ឆ្នាំ» ដែលខុសស្រឡះពីលោក ហ៊ុន សែន ដែលចេះតែបបួលគេឯង ឲ្យ​«ស្បថ​ងាប់តៃហោង»​ជាមួយខ្លួន។ អ្នកគាំទ្រពីរ-បីនាក់ ថែមទាំង​សរសេរ​ចំអកប្រហាក់ប្រហែលគ្នា ដូច្នេះទៀតថា៖ «ប្រយ័ត្តអាពោតស្ងោរ Copy ធ្វើតាម»៕