បទចោទទាំងបីនោះ រួមមាន ការជ្រៀតជ្រែកដោយខុសច្បាប់ នៅក្នុងការបំពេញមុខងារសាធារណៈ ការញុះញង់ឲ្យមានការរើសអើង និងការរំលោភលើអំណាចតុលាការ។ នេះ បើតាមពាក្យបណ្ដឹង របស់គណបក្សខ្មែរក្រោក ដែលត្រូវបានចែកផ្សាយ​ជាសាធារណៈ កាលពីពេលមុននេះ ប្ដឹងលោក សុខ ទូច ប្រធានរាជបណ្ឌិត្យសភាកម្ពុជា ឡើងទៅសាលាដំបូងរាជធានី ភ្នំពេញ។

បណ្ដឹង ដែលប្ដឹងដោយអគ្គលេខាធិការរងគណបក្ស លោក ខែម ស៊ីឡេង បានសរសេរថា លោក សុខ ទូច បានផ្ដល់កិច្ចសម្ភាស ទៅឲ្យសារព័ត៌មានក្នុងស្រុកចំនួនពីរ និងបានបង្ហោះវីដេអូមួយ នៅលើគណនីរបស់លោក ដែលមានអត្ថន័យគម្រាមកំហែង និងញុះញង់ឲ្យរដ្ឋាភិបាល ចាប់ខ្លួនបញ្ចូលគុក នូវបណ្ដាអ្នកផ្ដួចផ្ដើមគំនិតធ្វើញត្តិ ទៅក្រុមប្រឹក្សាធម្មនុញ្ញ ដើម្បីពិនិត្យ និងដោះស្រាយឡើងវិញ លើសន្ធិសញ្ញាបំពេញបន្ថែម ខ្មែរ-វៀតណាម ឆ្នាំ២០០៥។ 

គណបក្សខ្មែរក្រោក បានស្នើឲ្យតុលាការ ចាត់ការលើលោក សុខ ទូច តាមច្បាប់ និងទាមទារ ឲ្យមានសំណងជំងឺចិត្ត ១០០លានរៀល។

នៅក្នុងបទសម្ភាស ផ្ដល់ទៅឲ្យប្រព័ន្ធសារព័ត៌មានក្នុងស្រុក ក៏ដូចជាវីដេអូផ្សាយផ្ទាល់ នៅលើបណ្ដាញសង្គម លោក សុខ ទូច បាន​ចាត់ទុក​យុទ្ធនាការ​ប្រមូល​ស្នាម​មេដៃ​ ទាមទារ​កោះត្រល់ ​ពី​វៀតណាម​មក​វិញ​នេះ​ គឺជា​សកម្មភាព ​ក្នុង​ទិដ្ឋភាព​នយោបាយ​សុទ្ធសាធ ហើយ​អះអាង​ថា​ កោះត្រល់​មិនមែន​បាត់​ក្នុង​ដៃរដ្ឋាភិបាល​លោក ហ៊ុន សែន បច្ចុប្បន្ន​នេះ​ទេ តែកោះត្រង់ ​ត្រូវ​បាន​បាត់បង់ ​តាំងពី​មុន​សង្គម​រាស្ត្រនិយម​ ពោលគឺ​ជំនាន់​អាណានិគម​បារាំង​។

ប្រតិកម្មតបនឹងបណ្ដឹងខាងលើ ​លោក សុខ ទូច បាន​ថ្លែងប្រាប់សារព័ត៌មានក្នុងស្រុក ឲ្យដឹង​ថា លោក​មិន​បាន​គំរាម​អ្នក​ណា​ទេ ហើយក៏មិនបានខ្វល់ខ្វាយចំពោះពាក្យបណ្ដឹងនេះដែរ។ លោកថា ការ​ដាក់​ពាក្យ​បណ្តឹង ​របស់​គណបក្ស​ខ្មែរ​ក្រោក ជា​សិទ្ធិ​របស់​គណបក្ស​សាមី ហើយលោកនឹងបញ្ជូនមេធាវី ទៅចាត់ការជាធម្មតា ប្រសិនជាមានការកោះហៅ ពីតុលាការ។

ប្រធានរាជបណ្ឌិត្យសភារូបនេះ បានបន្ថែមទៀតថា បណ្ដាមេដឹកនាំ​គណបក្ស​ខ្មែរ​ក្រោក ដែលទើបនឹងបង្កើតឡើងថ្មីថ្មោង ​គ្រាន់​តែធ្វើរឿងទាំងអស់នេះ ដើម្បីចង់​ល្បី ​និងដើម្បី​ផ្សាយ​ពាណិជ្ជកម្ម ឲ្យគណបក្សពួកគេប៉ុណ្ណោះ។

រីឯគម្រោងប្ដឹងទាមទារកោះត្រល់មកវិញនោះ ត្រូវបានប្រធានគណបក្សខ្មែរក្រោក លោក សុខសុវណ្ណ វឌ្ឍនាសារប៊ុង ដែលមានឈ្មោះ នៅលើបណ្ដាញសង្គម «William Guang» អះអាងថា នឹងនៅតែបន្តធ្វើដដែល ដោយធ្វើក្នុងជំហានដំបូង តាមយន្តការជាតិ ហេីយនឹងឈាន​ដល់​យន្តការអន្តរជាតិ បេីយន្តការជាតិមិនបានផល។

អ្នកច្បាប់មួយរូប បានពន្យល់ប្រាប់ទស្សនាវដ្ដីមនោរម្យ.អាំងហ្វូ​ថា ក្នុងដំណាក់កាលនេះ ទោះក្នុងជំហានណា ក៏មិនអាចធ្វើទៅរួចដែរ ជាពិសេសយន្ដការតុលាការអន្តរជាតិ។ អ្នកច្បាប់រូបនោះ បានពន្យល់ថា ក្នុងរឿងជម្លោះទឹកដី ស្ថាប័នសាលាក្ដីយុត្តិធម៌អន្តរជាតិ (ហៅកាត់តាមភាសាអង់គ្លេស ICJ ឬភាសាបារាំង CIJ) ទទួលយកបណ្ដឹង តែពីសំណាក់រដ្ឋាភិបាល ដែលតំណាងឲ្យរដ្ឋប៉ុណ្ណោះ៕