ហ៊ុន សែន បង្ខំ សម រង្ស៊ី ឲ្យងាកមក«លេងបែបផ្លូវងងឹតវិញម្ដង»
- ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី០៧ សីហា ២០១៨
- កែប្រែចុងក្រោយ: August 07, 2018
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
នយោបាយស្បថ - ចម្លើយរបស់លោក សម រង្ស៊ី មេដឹកនាំប្រឆាំងដ៏លេចធ្លោ របស់ប្រទេសកម្ពុជា មិនបានធ្វើឲ្យលោក ហ៊ុន សែន នាយករដ្ឋមន្ត្រីផុតអាណត្តិ បង្អង់យូរ ក្នុងការធ្វើប្រតិកម្ម តបមកវិញនោះទេ។ សម្រាប់បុរសខ្លាំងកម្ពុជា ទោះជាលោក សម រង្ស៊ី រៀបរាប់បែបណា ជុំវិញការបបួលស្បថ ពីសំណាក់លោក ហ៊ុន សែន នោះក៏ដោយ ក៏ចង់មិនចង់ លោក សម រង្ស៊ី ត្រូវទទួលការ«លេងបែបផ្លូវងងឹត»នោះរួចហើយ។
ប្រតិកម្មរបស់លោក ហ៊ុន សែន ធ្វើឡើងតាមរយៈប្រដាប់ឃោសនារបស់លោក តែប៉ុន្មាននាទី ក្រោយពីចម្លើយ របស់លោក សម រង្ស៊ី ត្រូវបានបង្ហោះ នៅលើបណ្ដាញសង្គមរួច។ លោក ហ៊ុន សែន បង្ខំលោក សម រង្ស៊ី ឲ្យចូលរួម «លេងបែបផ្លូវងងឹត» ជាមួយលោកដូច្នេះថា៖ «ឥឡូវយើងងាក មកលេងបែបផ្លូវងងឹតវិញម្តង។ បើទោះបីអ្នកឯង មិនហ៊ានស្បថ ក៏សម្បថនេះ ធ្លាក់ទៅលើអ្នកឯងដែរ ព្រោះខ្ញុំបានស្បថរួចហើយ ហើយសូមវត្ថុស័ក្តិសិទ្ធលើលោក ជួយនាំនូវពាក្យសម្បថរបស់ខ្ញុំ ទៅកាន់អ្នកឯងផង»។
នៅក្នុងពិធីជួបជុំអត្ដពលិក និងកីឡាករ កីឡាការិនី គ្រូបង្វឹក និងប្រតិភូកីឡាជាង៧០នាក់ មុនពេលពួកគេចេញទៅប្រកួតកីឡាប្រចាំទ្វីបអាស៊ី (Asian Games) លើកទី១៨ កាលពីថ្ងៃទី ៦ ខែសីហាម្សិលម៉ិញ ក្នុងវិមានសន្តិភាព លោក ហ៊ុន សែន បានចាប់ផ្ដើមបបួលលោក សម រង្ស៊ី ឲ្យស្បថជាមួយលោកថា៖
«តើពួកអ្នកឯងហ៊ានស្បថ ឲ្យរន្ទះបាញ់ ឲ្យងាប់ ដោយសារអ្វីក៏ដោយ ឲ្យតែងាប់ ហ៊ានឬអត់? ឬក៏អន្តរាយ ហ៊ានឬអត់? ដែលអ្នកឯងហ៊ានចោទថា ប្រជាពលរដ្ឋត្រូវបានគេបំប៉ោង បំភិតបំភ័យត្រូវគេ ស្អីអ៊ីចេះអ៊ីចុះ ហ៊ានស្បថឬអត់? ហ៊ានស្បថទេ? បើហ៊ាន ឥឡូវបង្ហោះតាមហ្វេសប៊ុកទៅ។ ខ្ញុំក៏ហ៊ានស្បថឲ្យងាប់តៃហោង ឲ្យងាប់គ្រប់ប្រភេទ តាមដែលងាប់ទៅបាន ឲ្យតែយមរាជចង់ខ្ញុំងាប់ តាមរបៀបណាក៏បាន»។
នៅចំពោះការបបួលស្បថ ពីសំណាក់បុរសខ្លាំងកម្ពុជា ប្រធានចលនាសង្គ្រោះជាតិ បានបង្ហោះសារឆ្លើយតបវិញ នៅលើបណ្ដាញសង្គម ដោយហៅ ការបបួលស្បថរបស់លោក ហ៊ុន សែន ថាជាវិធីឃ្លាតឆ្ងាយពីវិទ្យាសាស្ត្រ និងបច្ចេកទេសជាក់ស្តែង។ លោក សម រង្ស៊ី អះអាងថា លោកនឹងស្បថជាមួយលោក ហ៊ុន សែន តែលោកថា សូមឲ្យមានវិទ្យាស្ថានស្ទង់មតិអន្តរជាតិ និងឯករាជ្យមួយ ដើម្បីស្ទង់មតិប្រជាពលរដ្ឋ ពីការចូលរួមបោះឆ្នោត និងមានការរាប់សន្លឹកឆ្នោតឡើងវិញ ដោយភាពត្រឹមត្រូវ ជាមុនសិន។
មេដឹកនាំប្រឆាំង បានសរសេរថា៖
«សូមគណបក្សប្រជាជនកម្ពុជា និង គ.ជ.ប. កុំបំផ្លាញចោលសន្លឹកឆ្នោត ដែលប្រមូលបាន នៅតាមការិយាល័យបោះឆ្នោត ទូទាំងប្រទេស ដើម្បីយកមកពិនិត្យ និងរាប់ឡើងវិញទាំងអស់គ្នា ក្នុងគោលបំណង ឃើញឲ្យច្បាស់ថា សន្លឹកឆ្នោតមោឃៈ ដែលប្រជាពលរដ្ឋខ្វែងចោល មានចំនួនប៉ុន្មានភាគរយ ហើយសន្លឹកឆ្នោត ដែលគេអះអាងថា ជាសន្លឹកឆ្នោតគាំទ្រគណបក្សប្រជាជនកម្ពជា តើមានលក្ខណៈជឿជាក់បាន ឬក៏ក្លែងបន្លំ។ ពេលពិនិត្យ និងរាប់សន្លឹកឆ្នោតឡើងវិញបែបនេះ ខ្ញុំសូមអំពាវនាវ ឲ្យអ្នកសង្កេតការណ៍ជាតិ និងអន្តរជាតិច្រើនកុះករ មកចូលរួមផងដែរ ក្នុងនោះមានទាំងអ្នកសង្កេតការណ៍មកពីចលនាសង្គ្រោះជាតិផងដែរ។»
ប៉ុន្តែការលើកឡើង របស់លោក សម រង្ស៊ី ពីវិធីសាស្ត្រ តាមបែបវិទ្យាសាស្ត្រ និងបច្ចេកទេសនោះ ត្រូវបានលោក ហ៊ុន សែន បដិសេធ ដោយអះអាងថា រូបលោក និងលោក សម រង្ស៊ី បានលេងតាមបែបវិទ្យាសាស្ត្រនេះ អស់រយៈពេល ជាង២០ឆ្នាំហើយ។ នាយករដ្ឋមន្ត្រីផុតអាណត្តិរបស់កម្ពុជា បានអះអាងថា៖
«មិនបាច់លើកហេតុផលស្រាវជ្រាវ បែបវិទ្យាសាស្ត្រអ្វីនោះទេ។ លោកឯងឆ្លើយមក តើលោកឯងហ៊ានស្បថ ឲ្យងាប់តៃហោង ទាំងប្រពន្ធ ទាំងកូន ទាំងចៅ ទាំងចៅទួត និងមនុស្សជិតសិ្នទ្ធ យ៉ាងតិច១០០នាក់ដែរឬទេ ? ព្រោះយើងទាំងពីរនាក់ ធ្លាប់បានលេង បែបវិទ្យាសាស្រ្តនេះ ជាមួយគ្នា អស់ជាង២០ឆ្នាំ មកហើយ។»
បន្ទាប់ពីបង្ខំលោក សម រង្ស៊ី ឲ្យត្រូវតែលេង «បែបងងឹត» ជាមួយលោករួច លោក ហ៊ុន សែន បន្តហៅពលរដ្ឋខ្មែរទាំងអស់ ឲ្យចួលរួមធ្វើសាក្សីថែមទៀត។ លោកថា៖ «ខ្ញុំសូមឲ្យបងប្អូន ប្រជាពលរដ្ឋខ្មែរទាំងអស់ ជួយធ្វើសាក្សី និងរង់ចាំមើល តើ សម រង្ស៊ី ក្លាហានហ៊ានស្បថ ជាមួយខ្ញុំដែរឬទេ? បើមិនហ៊ានស្បថទេ នោះអ្នកឯង ជាជនកំសាក ក្បត់ជាតិ ខ្លាចងាប់ ដូចខ្មោចឪពុកចោលឆ្អឹង នៅក្រៅប្រទេស និងទង្វើដែលអ្នកឯងបានធ្វើ ពិតជាបោកប្រាស់យ៉ាងពិតប្រាកដ»៕