ក្រុមបីសាចក្រហម ម៉ែនឆេស្ទើ យូណៃធីត (Manchester United) នឹងត្រូវជួបជាមួយក្រុម ម៉ែនឆេស្ទើ ស៊ីធី (Manchester City) ក្នុងការប្រកួតវគ្គពាក់កណ្តាលផ្តាច់ព្រ័ត្រ នៃពានរង្វាន់អេហ្វអេខាប់ (FA Cup) បើសិនជាពួកគេអាចយកឈ្នះ ក្រុម​តោខៀវ ឆែលស៊ី (Chelsea) នៅជើងទី២។

ពានរង្វាន់របស់សហព័ន្ធបាល់ទាត់អន្តរជាតិ។

យូណៃធីត បាននាំមុខ ២-០ ទៅលើក្រុមឆែលស៊ីក្នុងតង់ទី១ នៃវគ្គ១ភាគ៨ផ្តាច់ព្រ័ត្រកាលពីយប់ថ្ងៃអាទិត្យ។ ប៉ុន្តែពួកគេ​ត្រូវធ្វើការប្រកួតជើងទី២ ក្នុងកីឡាដ្ឋាន ស្ទែមហ្វដ ប្រិជ្ជ (Stamford Bridge) ជាថ្មីម្តងទៀត បន្ទាប់ពីឆែលស៊ី តាមបាន​ស្មើ​នៅពាក់កណ្ដាលម៉ោងទី២ ដោយបញ្ចប់លទ្ធផល ២-២។

ក្រុមដែលលេងក្នុងក្របខ័ណ្ឌ ឆែមពានស្ស៊ីប (Championship) ម៉ីលវ៉ល (Millwall) និងប្លែកបឺន (Blackburn) ក៏ត្រូវ​ប្រកួត​គ្នាម្តងទៀតដែរ បន្ទាប់ពីប្រកួតពេញ៩០នាទី គ្មានគ្រាប់បាល់ស៊ុតបញ្ចូលទីគ្នា។ អ្នកឈ្នះនឹងត្រូវទៅជួបជាមួយនឹងក្រុម វីកែន អាស្លេទិក (Wigan Athletic)។

ក្រុមដែលកំពុងតែស្ថិតនៅក្នុងតំបន់កាត់ចោល វីកែន បានឆ្លងមកដល់វគ្គពាក់កណ្តាល់ផ្តាច់ព្រ័ត្រនេះ ជាលើកដំបូង​របស់​ខ្លួន បន្ទាប់ពីបំបាក់ក្រុមទូកក្តោង អេវើតុន (Everton) ដោយលទ្ធផល ៣-០ កាលពីថ្ងៃសៅរ៏។ ខណះដែលក្រុម ម៉ែនស៊ីធី បានមកដល់វគ្គនេះជាលើកទី២ ក្នុងរយះពេល៣ឆ្នាំ បន្ទាប់ពីយកឈ្នះយ៉ាងខ្លាំងក្លាទៅលើក្រុម បានស្លេ (Barnsley) ដោយលទ្ធផល ៥-០។

លោកម្ចាស់ក្លឹបវីកែន ដេវ វេឡែន (Dave Whelan) មានការរីករាយយ៉ាងខ្លាំងចំពោះ ការចាប់ឆ្នោតនេះ ដែលក្រុមរបស់​លោកអាចនឹងជួបជាមួយក្រុមប្លែកបឺន ហើយគាត់បានប្រាប់ថា នេះជាក្តីសុបិន្តរបស់គាត់។

លោកបានប្រាប់ដល់អ្នកយកពត៌មានស្កាយស្ពត (Sky Sports) ថា «អ្វីៗដែលក្រុមប្លែកបឺន ត្រូវធ្វើនៅពេលនេះ គឺធ្វើ​យ៉ាងណាឲ្យអាចឡើងទៅវគ្គបន្តទៀត ហើយឲ្យដូចក្តីសុបិន្តរបស់ខ្ញុំ។ ខ្ញុំមានអារម្មណ៏ថា ខ្ញុំមិនទាន់បាន​ដោះស្រាយ​រឿង​មួយចំនួន រួចរាល់នៅឡើយទេ ក្នុងកីឡាដ្ឋាន វ៊ែមប្លី (Wembley)។»

យូណៃធីត និងឆែលស៊ី បានជួបគ្នាក្នុងការប្រកួតអេហ្វអេខាប់ វគ្គពាក់កណ្តាលផ្តាច់ព្រ័ត្រនេះ ម្តងរួចមកហើយ កាល​ពី​ឆ្នាំ២០១១។ ខណះដែលក្រុម ម៉ែនស៊ីធី និងក្រុមឆែលស៊ី មិនដែលជួបគ្នាសោះ ក្នុងវគ្គនេះ ចាប់តាំងពីឆ្នាំ១៩៧១ នៅ​ពេលនោះក្រុមម៉ែនស៊ីធី យកឈ្នះ ៣-០ ទៅលើក្រុមនៅទីក្រុងឡុងមួយនេះ។

គ្រូបង្វឹកក្រុមឆែលស៊ី លោក រ៉ាហ្វា បិនីតេស (Rafa Benitez) បាននិយាយបន្ទាប់ពីការប្រកួតចប់ថា «យើងត្រូវតែគិត​ដល់ការប្រកួតនៅជើងទី២សិន ហើយបន្ទាប់មកទើបគិតពីក្រុមម៉ែនស៊ីធី។ វាប្រាកដជាការប្រកួតមួយដ៏តានតឹង និង​លំបាក ពីព្រោះយូណៃធីត គឺជាក្រុមខ្លាំង។»

តារាងប្រកួតអេហ្វអេខាប់ វគ្គពាក់កណ្តាលផ្តាច់ព្រ័ត្រ៖
- ម៉ីលវ៉ល ឬ ប្លែកបឺនរ៉ូវើ ប្រកួតជាមួយ វីកែន អាស្លេទិក
- ម៉ែនឆេស្ទើ យូណៃធីត ឬ ឆែលស៊ី ប្រកួតជាមួយ ម៉ែនឆេស្ទើ ស៊ីធី។

ការប្រកួតវគ្គពាក់កណ្តាលផ្តាច់ព្រ័ត្រ នឹងធ្វើឡើងនៅថ្ងៃទី ១៣/១៤ ខែមេសា នៅឯកីឡាដ្ឋានវ៊ែមប្លី៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១១ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ