លោកអ្នកប្រហែលជាធ្លាប់ឮ រឿងនិទានលេងសើច (ឬអាចជាការពិត) ដែលនិយាយពីការព្រមាន គាស់យកធ្មេញមាស ពីសំណាក់ចោរប្លន់ម៉ូតូ នៅក្នុងប្រទេសកម្ពុជា។ ប៉ុន្តែនៅពេលនេះ ការប្លន់យកធ្មេញមាស បានកើតមាន​នៅក្នុងប្រទេសបារាំង បង្កឡើង​ដោយជនមួយក្រុម ខណៈដំបូងឡើយ ពួកគេគ្រាន់តែមានបំណង ចង់ប្លន់យកទូរស័ព្ទដៃប៉ុណ្ណោះ។

ហេតុការណ៍ដ៏ហួសចិត្ត បានកើតឡើង កាលពីយប់រំលងអាធ្រាត ថ្ងៃសុក្រទី២៩ ចូលមកថ្ងៃសៅរិ៍ ទី៣០ ខែមិថុនា ទៅលើបុរសម្នាក់ អាយុ៣៧ឆ្នាំ តាមដងផ្លូវមួយ នៃក្រុង «Aubervilliers (Seine-Saint-Denis)» ស្ថិតនៅភាគ​ខាងជើង ជាប់​រដ្ឋធានី ប៉ារីស។ ទន្ទឹមនឹងទូរស័ព្ទដៃរបស់ខ្លួន ដែលត្រូវបានប្លន់យកនោះ បុរសរងគ្រោះ នៅត្រូវបានជនល្មើសដៃឆៅ គាស់យកធ្មេញមាស ចំនួន៤គ្រាប់​ថែមទៀត ដោយមិនមាន​សម្ភារៈ​ពិសេសអ្វីឡើយ។ 

ប្រភពពីនគរបាលបារាំង និងត្រូវបានស្រង់សំដី ដោយសារព័ត៌មានក្នុងស្រុក បានអះះអាងថា នៅខណៈពេលជនរងគ្រោះ កំពុងដើរនៅតាមផ្លូវ ជនដៃដល់មួយក្រុម បានធ្វើសកម្មភាព ដោយដំបូងឡើយ មានបំណងចង់ប្លន់ យកទូរស័ព្ទដៃ។ តែនៅរំពេចនោះ  ក្រុមជនបង្កបានក្រឡេកឃើញ បុរសរងគ្រោះមានធ្មេញមាស​ពេញមាត់។ ពួកគេក៏បានប្រើដៃ ដើម្បីគាស់យកធ្មេញមាស ទាំងនោះចេញទៅ។

បើតាមប្រភពដដែល បានឲ្យដឹងទៀតថា ធេ្មញមាសទាំង៤គ្រាប់ អាចមានតម្លៃជាមាសលក់ចេញ ប្រមាណតែ ៥០អ៊ឺរ៉ូប៉ុណ្ណោះ។ រីឯបុរសរងគ្រោះវិញ ដែលបានរងរបួស ដោយការវ៉ៃតប់ ពីសំណាក់ក្រុមជនបង្ក ត្រូវបានបញ្ជូនទៅកាន់​មន្ទីរពេទ្យ នៅក្រោយពេលកើតហេតុ ប៉ុន្តែមិនមានសេចក្ដីរាយការណ៍មកថា បុរសម្ចាស់ធ្មេញមាស អាចមានគ្រោះថ្នាក់ ដល់ជីវិតទេ៕