បន្ទាប់ពីក្រុម អាហ្សង់ទីន និងព័រទុយហ្គាល់ ដែលធ្លាក់ចេញ ពី នៅល្ងាចថ្ងៃនេះ ក្រុមជម្រើសជាតិ អេស្ប៉ាញ បានក្លាយទី៣ ដែលត្រូវផាត់ចេញ ពីបាល់ទាត់ពិភពលោក ឆ្នាំ២០១៨ បន្ទាប់ពីបានទាត់បាល់រាប់គ្រាប់ ចាញ់ក្រុម រ៉ូស្ស៊ី នៅក្នុងការប្រកួតមួយ ដែលមិនសូវស្វាហាប់។

បើគេពិនិត្យមើលសាច់បាល់វិញ ក្រុម អេស្ប៉ាញ បានគ្រប់គ្រងបាល់ បានដល់ទៅ ៨០ភាគរយ ខណៈក្រុម រ៉ុស្ស៊ី មិនមានឱកាសច្រើនប៉ុន្មាន ដើម្បីវាយបកមកវិញទេ។ ផ្ទុយទៅវិញ គេត្រូវនិយាយពីកង្វះប្រសិទ្ធិភាព ក្នុងការទម្លុះរបាំងការពារគូប្រជែង និងការទាត់បញ្ចូលទី ពីសំណាក់កីឡាករក្រុម អេស្ប៉ាញ។ រីឯក្រុមបាល់ទាត់ម្ចាស់ផ្ទះ បានធ្វើគ្រប់បែបយ៉ាង ដើម្បីរំខានការវាយសម្រុក របស់ក្រុម អេស្ប៉ាញ កុំឲ្យនៅក្បែរទីរបស់ខ្លួនបាន។

ក្រុមអេស្ប៉ាញ ដែលរកគ្រាប់បាល់បាន​មួយគ្រាប់មុន នៅនាទីទី១២ បានបណ្ដោយឲ្យក្រុម រ៉ុស្ស៊ី ជាម្ចាស់ផ្ទះ រកគ្រាប់បាល់បានស្មើវិញ នៅនាទីទី ៤១។ តែគ្រាប់បាល់អេស្ប៉ាញមួយគ្រាប់នោះ មិនមែនរកបានដោយកីឡាករអេស្ប៉ាញទេ (ជាគ្រាប់បាល់ដែលខ្សែប្រយុទ្ធរ៉ុស្ស៊ី ទាត់ចូលទីខ្លួនឯង) ខណៈគ្រាប់បាល់ស្មើរបស់រ៉ុស្ស៊ី ជាគ្រាប់បាល់ពិន័យ ១១ម៉ែត្រ បណ្ដាលមកពីកីឡាករ «Gerard Piqué» ខ្សែការពារអេស្ប៉ាញលើកដៃឡើងលើ ទៅប៉ះបាល់ នៅក្នុងតំបន់គ្រោះថ្នាក់។

ការប្រកួតរវាងក្រុមទាំងពីរខាងលើ នៅតែរកគ្រាប់បាល់បន្ថែមមិនបាន បើទោះជាបានបន្ថែមម៉ោង ៩០+១៥+១៥ ទៀតក៏ដោយ។ ដូច្នេះ ការប្រកួតចាំបាច់សម្រេចការចាញ់ឈ្នះ ទៅឲ្យក្រុមណាមួយ ដោយការរាប់គ្រាប់បាល់ ១១ម៉ែត្រ ដែលតម្រូវឲ្យក្រុមទាំងសងខាង ទាត់ចំនួន៥គ្រាប់ដូចគ្នា។

ទីបំផុត គឺកីឡាករ «Igor Akinfeev» អ្នកចាំទីរបស់ក្រុម រ៉ុស្ស៊ី ដែលជាអ្នកទះ (និងទាត់) បាល់ចេញ បានពីរគ្រាប់ ដែលអនុញ្ញាតឲ្យក្រុមជម្រើសជាតិ របស់ម្ចាស់ផ្ទះ បានឆ្លងវគ្គ ឡើងទៅវគ្គ១ភាគ៤ ផ្ដាច់ព្រ័ត្រ។ ក្រុមរ៉ុស្ស៊ី នឹងត្រូវឡើង ទៅជួបក្រុម ក្រូអាស៊ី ឬក្រុម ដាណឺម៉ាក ដែលត្រូវជួបប្រកួតគ្នា ក្នុងយប់នេះ ពោលគឺប៉ុន្មាននាទីខាងមុខ៕

» វីដេអូសង្ខេប នៃការប្រកួតរវាងក្រុម អេស្ប៉ាញ និងក្រុម រ៉ុស្ស៊ី៖