បើតាមចំណាត់ថ្នាក់ របស់សហគ្រាសអង់គ្លេសមួយ ជំនាញ​ខាងការស្រាវជ្រាវ​សេដ្ឋកិច្ច ឈ្មោះ «The Economist Intelligence Unit (EIU)» បានផ្ដល់ចំណាក់ថ្នាក់​ទីក្រុង ឬរដ្ឋធានី ដែលបានផ្ដល់គុណភាពជីវិត ថាមានកម្រិតខ្ពស់ជាងគេបំផុត នៅលើពិភពលោក ជូនទៅរដ្ឋធានី វីយ៉ែន នៃប្រទេសអូទ្រីស។ ចំណាត់ថ្នាក់នេះ បានបំបាក់ក្រុង មែលប៊ន នៃប្រទេសអូស្ត្រាលី ដែលធ្លាប់កាន់តំណែង ជា«ជើងឯក» តាំងពី​៥ឆ្នាំ​កន្លងមក ឲ្យមកជាប់លេខ២វិញ។

សំអាងលើលក្ខណៈពិសេសអ្វីខ្លះ ដែលធ្វើឲ្យរដ្ឋធានី វីយែន ទទួលបានពិន្ទុខ្ពស់យ៉ាងនេះ?

គួរកត់សម្គាល់ថា សហគ្រាសខាងលើ បានធ្វើការសិក្សាដោយឯករាជ្យ និងជារៀងរាល់ឆ្នាំ ទៅលើគុណភាពជីវិត និងការរស់នៅ ក្នុងទីក្រុងធំៗចំនួន ១៤០ នៅជុំវិញពិភពលោក ដោយសង្កត់ធ្ងន់ទៅលើ គុណភាព​សន្តិសុខ និងសុវត្ថិភាព (ទាក់ទងនឹងឧក្រិដ្ឋកម្ម មានហនិភ័យ) - សេវាកម្មថែទាំសុខភាព និងការអប់រំ - វប្បធម៌ និងគុណភាពនៃបរិស្ថាន និងហេដ្ឋារចនាសម្ព័ន្ធ។

ហើយបើតាមរបាយការណ៍ ឆ្នាំ២០១៨ ដែលភ្ជាប់មកជាមួយ​ចំណាត់ថ្នាក់ខាងលើ បានអះអាងថា រដ្ឋធានីវីយែន មានតួលេខឧក្រិដ្ឋកម្ម និងអំពើពុករលួយ នៃការផ្ដល់សេវាកម្មសាធារណៈ ទាបជាងគេបំផុត។ រដ្ឋធានីបានផ្ដល់សេវា ក្នុងការពិគ្រោះសុខភាព ព្យាបាលជំងឺ និងការអប់រំ ទៅឲ្យបណ្ដាជនគ្រប់គ្នា។ សីតុណ្ហភាពវិញ ក៏មានភាពមនោរម្យ ខណៈសេវាសាធារណៈផ្សេងទៀត ដូចជាការដឹកជញ្ជូនជាដើម មានតម្លៃថោក និងពោរពេញដោយប្រសិទ្ធិភាព។

នៅក្នុងរដ្ឋធានី វីយែន មានលំហបៃតង និងបឹងត្រពាំងជាច្រើនកន្លែង ដែលធ្វើបណ្ដាជន អាចដកដង្ហើមបាន យ៉ាងងាយស្រួល។ ចំណីអាហារ នៃការបរិភោគទទួលទាន មានភាពសម្បូរបែប ដោយសារទីតាំងដ៏ល្អ របស់រដ្ឋធានីមួយនេះ ស្ថិតនៅរវាងពិភពលោកទាំងសងខាង (បស្ចឹមលោក និងពិភពខាងកើត)។ រីឯវិស័យសិល្បៈវប្បធម៌វិញ មិនត្រឹមតែធ្លាប់មាន ប្រវត្តិដ៏អស្ចារ្យ និងគ្រប់បែបយ៉ាងទេ តែនៅពេលបច្ចុប្បន្ន រដ្ឋធានីនៃប្រទេសអូទ្រីស គឺជាជម្រើសនាំមុខមួយ សម្រាប់សិល្បករ-សិល្បការិនី មកពីជុំវិញពិភពលោក ក្នុងការបញ្ចេញស្នាដៃរបស់ពួកគេ។

បន្ថែមពីលើចំណុច ទាំងប៉ុន្មានខាងលើ រដ្ឋធានីវីយែន មិនដែលទទួលការគម្រាមកំហែង ឬទទួលការគម្រាមតិចតួច ពីអំពើភេរវកម្ម ដែលបង្កើតឡើង ដោយបណ្ដាញភេរវនិយមអន្តរជាតិ ដូចយ៉ាងក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ជាដើម។ របាយការណ៍បានបញ្ជាក់ទៀតថា នៅក្នុងប្រទេសអូទ្រីស ដែលជាប្រទេសប្រជាធិបតេយ្យ​សេរី ជាពិសេសក្នុងរដ្ឋធានី ដែលជាបេះដូងរបស់ប្រទេស​នេះ សិទ្ធិពលរដ្ឋមកពីគ្រប់និន្នាការ ត្រូវបានគោរពយ៉ាងខ្ជាប់ខ្ជួន ហើយសិទ្ធិសេរីភាពសង្គម មានលក្ខណៈទូលំទូលាយណាស់។

គួរជម្រាបឡើងវិញដែរ ពីចំណាត់ថ្នាកលើគេទាំង១០ នៃក្រុងដែលគួរឲ្យចង់រស់នៅ សម្រាប់ឆ្នាំ២០១៨៖

១) វីយែន ប្រទេសអូទ្រីស
២) មែនប៊ន ប្រទេសអូស្ត្រាលី
៣) អូសាកា ប្រទេសជប៉ុន
៤) កាលហ្គារី ប្រទេសកាណាដា
៥) ស៊ីដនី ប្រទេសអូស្ត្រាលី
៦) វេនខូវើ ប្រទេសកាណាដា
៧) តូរ៉ុងតូ ប្រទេសកាណាដា
៨) តូក្យូ ប្រទេសជប៉ុន
៩) កូផេនអាក ប្រទេសដាណឺម៉ាក
១០) អាដេឡែក ប្រទេសអូស្ត្រាលី៕