លោក តារ៉ូ កូណូ (Taro Kono) ប្រមុខការទូតការបរទេសជប៉ុន កំពុងធ្វើទស្សនកិច្ច នៅក្នុងប្រទេសពីរ ក្នុងតំបន់អាស៊ីអាគ្នេយ៍ ចាប់ពីថ្ងៃសៅរ៍នេះ ដល់ថ្ងៃអាទិត្យស្អែក។ នៅថ្ងៃសៅរ៍ លោក តារ៉ូ កូណូ កំពុងស្ថិតក្នុងប្រទេសឡាវ មុននឹងមកដល់កម្ពុជា នៅថ្ងៃអាទិត្យ។

ក្រសួងការបរទេសកម្ពុជា បានបញ្ជាក់ថា ដំណើរទស្សនកិច្ច របស់រដ្ឋមន្ត្រីការបរទេសជប៉ុន នៅកម្ពុជា មានរបៀបវារៈសំខាន់ៗមួយចំនួន ក្នុងនោះ មានជំនួបជាមួយលោកនាយករដ្ឋមន្ត្រី ហ៊ុន សែន និងជាមួយលោក ប្រាក់ សុខុន រដ្ឋមន្ត្រីការបរទេសកម្ពុជា ព្រមទាំងមានពិធីចុះហត្ថលេខា លើលិខិត​ប្តូរ​សារ និង​កំណត់ហេតុ នៃ​ការពិភាក្សា ស្តីពី​ការផ្តល់​ហិរញ្ញប្បទាន ​របស់​រដ្ឋាភិបាល​ជប៉ុន ​មកកាន់​រដ្ឋាភិបាល​កម្ពុ​ជានោះផង។

ក្រសួងការបរទេស បានបញ្ជាក់បន្ថែមថា ការចុះហត្ថលេខាទី១ នឹងផ្ដោតលើ​កំណត់ហេតុ​ស្តីពី ហិរញ្ញប្បទាន​ឥត​សំណង ឬ ជំនួយឥតសំណង​មកដល់​ប្រទេស​កម្ពុជា ក្នុង​ទំហំ​ទឹកប្រាក់ ៥០០លាន​យ៉េន (ប្រមាណជា៤.៦ លាន​ដុល្លារ​អាមេរិក) សម្រាប់​អនុវត្ត​គម្រោង​កម្មវិធី​អភិវឌ្ឍន៍​សេដ្ឋកិច្ច និង​សង្គម នៅ​កម្ពុជា ខណៈការចុះហត្ថលេខា​ទី២ ទាក់ទងនឹង​ឥណទាន​សម្បទាន ឬ​កំចី​ដែលមាន​ការប្រាក់​ទាប ​ប្រមាណ​ជា ៩.២១៦ លាន​យ៉េន (ប្រមាណ​ជិត ៨៦ លាន​ដុល្លារ​អាមេរិក) សម្រាប់​អនុវត្ត​គម្រោង​ពង្រីក​ប្រព័ន្ធ​ខ្សែ​បញ្ជូន និង​ចែកចាយ​អគ្គិសនី នៅ​រាជធានី​ភ្នំពេញ។

ដោយឡែក ក្រសួងការបរទេសជប៉ុន ដែលបានជូនដំណឹង ពីដំណើរទស្សនកិច្ចខាងលើនេះដែរ មិនបានបញ្ជាក់លំអិត អ្វីច្រើនឡើយ។

ដំណើរទស្សនកិច្ច របស់លោក តារ៉ូ កូណូ ត្រូវបានលោកនាយករដ្ឋមន្ត្រី អះអាងកាលពីចុងខែកន្លងទៅ ខណៈស្ថានទូតជប៉ុននៅកម្ពុជា បានបញ្ជាក់ផ្ទុយទៅវិញ ក្នុងពេលភ្លាមៗនោះថា រដ្ឋាភិបាលជប៉ុន មិនទាន់សម្រេច ពីដំណើរទស្សនកិច្ចនេះនៅឡើយ។ នៅក្នុងការអះអាង ​របស់លោកនាយករដ្ឋមន្ត្រី ហ៊ុន សែន ដែលបានថ្លែង កាលពី​ថ្ងៃទី២៧ ខែ​មីនា បានឲ្យដឹងបន្ថែមថា ជំនួបរវាងរូបលោក និងរដ្ឋមន្ត្រីការបរទេសជប៉ុន  នឹងគ្មានរបៀបវារៈ ដែលជជែកពីបញ្ហាបក្សប្រឆាំង នៅកម្ពុជានោះទេ។

ក្នុងដំណើរទស្សនកិច្ចខ្លីមួយ កាលពីថ្ងៃទី២៣ ខែមីនា ទីប្រឹក្សានាយករដ្ឋមន្ត្រីជប៉ុន គឺលោក កង់តារ៉ូ សូនូរ៉ា (Kentaro SONOURA) បានជួបជាមួយ​លោក ប្រាក់ សុខុន រដ្ឋមន្ត្រីការបរទេស និងលោក ហ៊ុន សែន នាយករដ្ឋមន្ត្រី​កម្ពុជា ដោយបញ្ជាក់នៅក្នុងជំនួបដាច់ពីគ្នា ទាំងពីរនោះទេ ពីជំហររបស់ប្រទេសជប៉ុន ដែលចង់ឃើញការបោះឆ្នោតជាតិ នាពេលខាងមុខ នៅកម្ពុជា មានលក្ខណៈសេរី ត្រឹមត្រូវ និងយុត្តិធម៌។

សុំបញ្ជាក់ដែរថា ខណៈនេះ ព្រះមហាក្សត្រ​កម្ពុជា សម្តេចព្រះ បរមនាថ នរោត្តម សីហមុនី ក៏កំពុង​មានព្រះរាជវត្តមាន ក្នុង​ប្រទេស​ជប៉ុនដែរ ដើម្បី​ចូលរួម​សម្ពោធ​មហាសាល​ប្រជុំ Nalanda Mahavihara និង​បុណ្យ​រំលឹក​ខួប​លើក​ទី៤ នៃ​ទិវា​ព្រះពុទ្ធសាសនា​អន្តរជាតិ​។ ព្រះមហាក្សត្រកម្ពុជា បានយាងទៅកាន់ប្រទេសជប៉ុន តាំងពី​ថ្ងៃសុក្រ ទី៦ ខែមេសា និងទ្រង់គង់នៅទីនោះ រហូតដល់​ថ្ងៃចន្ទ ទី៩ ខែមេសា៕