សម រង្ស៊ី ថា​វីដេអូ​ឃោសនា​ថ្ងៃ​៧មករា ប្រមាថ​ប្រវត្តិសាស្ត្រ និង​រាស្ត្រខ្មែរ

មេដឹកនាំប្រឆាំងកម្ពុជា បានប្រតិកម្មតបទៅនឹងវីដេអូឃោសនា ស្ដីពីថ្ងៃ៧មករា ដែលត្រូវបានចាក់បញ្ចាំង កាលពីថ្ងៃម្សិលម៉ិញ បន្តរហូតមកដល់ថ្ងៃនេះ ដោយហៅការខិតខំប្រឹងប្រែង ធ្វើការ«ឃោសនា»របៀបនេះ បង្ហាញឲ្យឃើញថា លោក ហ៊ុន សែន និងរដ្ឋាភិបាលរបស់លោក កំពុងប្រមាថម៉ាក់ងាយប្រវត្តិសាស្ត្រ និងចាត់ទុកប្រជាជនកម្ពុជា ថា«ល្ងិតល្ងង់»។
សម រង្ស៊ី ថា​វីដេអូ​ឃោសនា​ថ្ងៃ​៧មករា ប្រមាថ​ប្រវត្តិសាស្ត្រ និង​រាស្ត្រខ្មែរ
លោក សម រង្ស៊ី មេដឹកនាំប្រឆាំងធំជាងគេ នៅកម្ពុជា ក្នុងការតវ៉ាមួយ របស់ក្រុមកម្មករ នាពេលកន្លងមក។ (រូបថត MONOROOM.info)
Loading...
  • ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី០៤ មករា ២០១៨
  • កែប្រែចុងក្រោយ: January 04, 2018
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ការបញ្ចាំងវីដេអូឃោសនា របស់រដ្ឋាភិបាលកម្ពុជា ស្ដីពីថ្ងៃ៧មករា ដែលមានចំណងជើងថា «ដំណើរឆ្ពោះទៅរកការសង្គ្រោះជាតិ» ទទួលបានប្រតិកម្មមកវិញ ពីសំណាក់លោក សម រង្ស៊ី ខ្លាំងៗនៅមុននេះបន្តិច ដោយហៅវីដេអូនេះ ជាការប្រមាថមើលងាយប្រវត្តិសាស្ត្រ និងបានចាត់ទុកប្រជាជនកម្ពុជា ថា«មិនដឹងអី» និង«ឆោតល្ងង់»។

អតីតប្រធានគណបក្សសង្គ្រោះជាតិ បានប្រតិកម្មដូច្នេះ នៅលើបណ្ដាញសង្គមទ្វីសធើរ ជាភាសាអង់គ្លេស ដោយមានន័យ ជាខេមរភាសាដូច្នេះថា៖ «វីដេអូឃោសនាចុងក្រោយរបស់ហ៊ុនសែន គឺជាការប្រមាថមើលងាយប្រវត្តិសាស្រ្ត (...) និងជាការប្រមាថចំពោះប្រជាជនកម្ពុជា ដែលត្រូវបាន (លោក ហ៊ុន សែន និងរដ្ឋាភិបាលកម្ពុជា) ចាត់ទុកថាជាមនុស្សមិនដឹងអី និងឆោតល្ងង់»។

លោក សម រង្ស៊ី ដែលកំពុងរស់នៅ និរទេសខ្លួនក្នុងប្រទេសបារាំង បានបន្តទៀតថា៖ «របបផ្តាច់ការដ៏អាក្រក់បំផុត តែងតែលើកសរសើរ និងគោរព ចំពោះតែបុគ្គលិកលក្ខណៈ របស់មនុស្សម្នាក់។ ប្រជាជនកម្ពុជា មានការយល់ដឹង និងមានភាពឆ្លាតវៃ ជាងការគិតរបស់លោក ហ៊ុន សែន ហើយពួកគេនឹងយក (ខ្លឹមសារ)វីដេអូឃោសនាខាងលើនេះ ទៅគ្រវាត់ចោល ក្នុងធុងសម្រាម។»។

វីដេអូ​ឯកសារ​ «ដំណើរ​ឆ្ពោះ​ទៅ​រក​ការ​សង្គ្រោះ​ជាតិ​» ត្រូវបានចាក់បញ្ចាំង នៅតាមកញ្ចក់ទូរទស្សន៍នានា កាលពីយប់ម៉ោង៧ ថ្ងៃទី៣ ខែមករានេះ និងកំពុងបន្តបង្ហោះ ផ្សាយនៅលើបណ្ដាញសង្គម និងនៅលើគេហទំព័រនានាជាច្រើនទៀត។

វីដេអូនោះ បង្ហាញជាដដែលៗ ​ពី​ដំណើរ​តស៊ូ ​របស់​លោក​នាយក​រដ្ឋមន្រ្តី​ ហ៊ុន សែន ក្នុង​ការ​រំដោះ​ប្រទេស​កម្ពុជា​ ឲ្យ​ចេញ​ពី​របប​ខ្មែរ​ក្រហម ​ឆ្នាំ​១៩៧៥-ឆ្នាំ​១៩៧៩ ដូចជា​ទិដ្ឋភាព ​នៃ​ការ​រត់​ទៅ​ពឹងវៀតណាម​ ឲ្យ​មក​ជួយ​រំដោះ​ប្រទេស​កម្ពុជា ​របស់​លោក ​ហ៊ុន សែន និង​គូកន​៤​ទៀត របស់​លោក ​កាល​ពី​ចន្លោះ​ឆ្នាំ​១៩៧៧ និង​ឆ្នាំ​១៩៧៩។ ក្នុងវីដេអូ​ឯកសារ គេឃើញមានការផ្ដល់សក្ខីកម្ម ពីមនុស្សដែលជាប់ទាក់ទងជាច្រើន ជាពិសេសគឺការថ្លែងឡើងដោយផ្ទាល់ ដោយមានការសម្រក់ទឹកភ្នែកផង ពីសំណាក់លោក​នាយក​រដ្ឋមន្រ្តី​។

ការបង្ហាញពីប្រវត្តិថ្ងៃ៧មករា ឆ្នាំ១៩៧៩ ពីសំណាក់រដ្ឋាភិបាលកម្ពុជា តែងជួបការប្រទាំងប្រទើសគ្នា ជាមួយនឹងប្រវត្តិវិទូឯករាជ្យជាច្រើន ដែលបញ្ជាក់តាមរយៈសៀវភៅរបស់ពួកគេ ថាថ្ងៃ៧មករា ជាថ្ងៃដែលវៀតណាម លើកទ័ពចូលឈ្លានពានប្រទេសកម្ពុជា មុននឹងលើកបន្តុបរដ្ឋាភិបាលមួយ ដែលកាលនោះមានលោក ហ៊ុន សែន ជារដ្ឋមន្ត្រីការបរទេស ឲ្យឡើងកាន់អំណាច។

ម្យ៉ាងទៀត ការលើកឡើងដដែលៗ ពីគុណូបការៈនៃថ្ងៃមួយនេះ បានរងការរិះគន់ជារឿយៗថា មិនបានជួយលើកលោក ហ៊ុន សែន និងគណបក្សប្រជាជនកម្ពុជា ឲ្យមានប្រជាប្រិយភាពនោះទេ។ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន របស់រដ្ឋាភិបាលលោក ហ៊ុន សែន ខ្លួនលោក ក៏ធ្លាប់លើកយកមតិ របស់ប្រិយមិត្តមួយរូប មកបង្ហោះផ្សាយបន្ត នៅលើបណ្ដាញសង្គមដែរថា៖ «ចម្រៀង​ដដែលៗ​របស់ CPP ដែលតែងតែរំលឹកគុណពី ០៧ មករា ១៩៧៩ គួរតែមានការ Update សម្រាប់ឆ្នាំ ២០១៨ ព្រោៈ​ក្មេង​ក្រោយ​គ្រាប់ផ្លោង ជាម្ចាស់ឆ្នោត ២០១៨ និងទៅអនាគត មិនសូវចាប់អារម្មណ៌ទេ!»។

ប៉ុន្តែ នៅក្រោយការបង្ហោះរបស់លោក ខៀវ កាញារីទ្ធ ប៉ុន្មានថ្ងៃ លោក ហ៊ុន សែន បានសំដែងក្ដីក្រេវក្រោប ដាក់រដ្ឋមន្ត្រីក្រសួងព័ត៌មានរបស់ខ្លួន ដោយបន្ទោសលោក ខៀវ កាញារីទ្ធ នៅពេលនោះ ក្នុងសំនុំរឿងមួយទៀត ថា«គ្មានគ្រាប់ភ្នែក»មើលឃើញលោក ជានាយករដ្ឋមន្ត្រី៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...