មន្ត្រី​សិទ្ធិ​មនុស្ស​ខ្មែរ​ទាំង​៥ នឹង​ទទួល​ពាន​រង្វាន់​អន្តរជាតិ ក្នុង​យប់​នេះ?

ពានរង្វាន់ «Martin Ennals» នឹងត្រូវប្រគល់ជូនអ្នកឈ្នះម្នាក់ (ឬមួយក្រុម) ក្នុងចំណោមសកម្មជនការពារ​សិទ្ធិមនុស្ស ចំនួន៧នាក់ (ឬបីក្រុម) ដែលត្រូវបានជ្រើសរើសចុងក្រោយបំផុត សម្រាប់ដណ្ដើមពានរង្វាន់មួយនេះ ក្នុងយប់នេះ នាទីក្រុង ហ្សឺណែវ ប្រទេសស្វីស។ មន្ត្រីអង្គការសង្គមស៊ីវិលម្នាក់ បានជឿជាក់ថា មន្ត្រីសិទ្ធិមនុស្សខ្មែរទាំង៥ ដែលបានជាប់ឃុំច្រើនខែ មុននឹងត្រូវបានដោះលែង កាលពីចុងខែមិថុនាកន្លងមកនេះ ទំនងជាឈ្នះពានរង្វាន់ខាងលើ។
មន្ត្រី​សិទ្ធិ​មនុស្ស​ខ្មែរ​ទាំង​៥ នឹង​ទទួល​ពាន​រង្វាន់​អន្តរជាតិ ក្នុង​យប់​នេះ?
មន្ត្រីទាំងប្រាំរូប ពីឆ្វេងទៅស្ដាំ៖ លោក ណៃ វង់ដា - លោក នី ចរិយា - អ្នកស្រី លឹម មុន្នី -លោក យី សុខសាន្ដ និងលោក នី សុខា។ (រូបថតសហការី)
  • ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី១០ តុលា ២០១៧
  • កែប្រែចុងក្រោយ: October 10, 2017
  • ប្រធានបទ: យុត្តិធម៌-សិទ្ធិ
  • អត្ថបទ: មានបញ្ហា?
  • អាន និងបញ្ចេញយោបល់

ពានរង្វាន់ «Martin Ennals» ដែលគេស្គាល់ម្យ៉ាងទៀត ថាជាពានរង្វាន់ «ណូបែលសម្រាប់វិស័យសិទ្ធិមនុស្ស» នោះ នឹងត្រូវប្រគលជូនអ្នកឈ្នះម្នាក់ (ឬមួយក្រុម) ក្នុងកម្មវិធីមួយ ចាប់ពីម៉ោង១៨ (ត្រូវនឹងម៉ោង ២៣ ម៉ោងក្នុងប្រទេសកម្ពុជា) យប់នេះ ដែលរៀបចំឡើងផ្ទាល់ ដោយសាលាក្រុង ហ្សឺណែវ ប្រទេសស្វីស។

សកម្មជនការពារសិទ្ធិមនុស្ស ចំនួនបីនាក់ (ឬបីក្រុម) ត្រូវបានជ្រើសរើស តាំងពីខែមីនាកន្លងមក ឲ្យជាប់ជាបេក្ខជនចុងក្រោយបង្អស់ ដើម្បីឈ្នះពានរង្វាន់ខាងលើ។ សកម្មជនទាំងនោះ រួមមាន៖ 

- សកម្មជន​សិទ្ធិមនុស្សខ្មែរ ៥រូប លោក នី ចរិយា (អគ្គលេខាធិការរង នៃគណៈកម្មាធិការជាតិ រៀបចំការបោះឆ្នោត) - អ្នកស្រី លឹម មុន្នី - លោក យី សុខសាន្ត - លោក នី សុខា និង​លោក ណៃ វ៉ង់ដា (អ្នកទាំងបួនរូប ជាមន្ត្រីរបស់សមាគម​ការពារ​សិទ្ធិ​មនុស្ស អាដហុក) មកពីប្រទេសកម្ពុជា
- អ្នកស្រី «Karla Avelar» សកម្មជនសិទ្ធិមនុស្ស មកពីប្រទេសសាលវ៉ាឌ័រ
- លោក «Mohamed Zaree» សកម្មជនសិទ្ធិមនុស្ស មកពីប្រទេសអេហ្សីព។

បើតាមការអះអាងរបស់លោក គល់ បញ្ញា នាយកប្រតិបត្តិរបស់អង្គការខុមហ្វ្រែល បានឲ្យដឹងថា មន្ត្រីការពារសិទ្ធិមនុស្សទាំងប្រាំរូប មកពីប្រទេសកម្ពុជា នឹងឈ្នះ ទទួលបានពានរង្វាន់ «Martin Ennals»។ មន្ត្រីទាំងប្រាំរូប ត្រូវ​បាន​ដោះលែងឲ្យនៅក្រៅឃុំ​ កាល​ពី​ថ្ងៃ​ទី​២៩ ខែ​មិថុនា ឆ្នាំ២០១៧ បន្ទាប់ពីត្រូវបានជាប់ឃុំ អស់រយៈពេល៤២៧ថ្ងៃ នៅក្នុងសំនុំរឿង«សូកប៉ាន់សាក្សី» ដ៏ចម្រូងចម្រាស់មួយ។

 

ចំពោះមន្ត្រីរដ្ឋាភិបាលខ្មែរវិញ បានចាត់ទុកពានរង្វាន់នេះ ថាមាននិន្នាការនយោបាយ។ លោក​ផៃ ស៊ី​ផាន ​អ្នកនាំពាក្យរដ្ឋាភិបាល បានថ្លែងប្រាប់សារព័ត៌មានក្នុងស្រុកថា ​លោក​មិនមាន​ការភ្ញាក់ផ្អើល​សោះឡើយ ចំពោះ​ការផ្តល់​ពាន​រង្វាន់ខាងលើ ពីព្រោះ​ការផ្តល់​នេះ គ្រាន់តែ​ជា​ការលើកទឹកចិត្ត ដល់​បុគ្គល​ដែល​បម្រើ​ផលប្រយោជន៍ ​របស់គេ​នោះ​តែប៉ុណ្ណោះ​។

ដោយឡែក តាមសេចក្ដីប្រកាសព័ត៌មានមួយ របស់គណៈកម្មការពានរង្វាន់ ដែលចេញផ្សាយ កាលពីថ្ងៃទី១ ខែតុលា បានអះអាងថា លោក «Mohamed Zaree» ត្រូវបានអាជ្ញាធររបស់ប្រទេសអេហ្សីព ហាមឃាត់មិនឲ្យធ្វើដំណើរ ចេញក្រៅប្រទេស ដើម្បីចូលរួម ក្នុងពិធីទទួលពាន់រង្វាន់នេះទេ។

ពានរង្វាន់ «Martin Ennals» ជាកិច្ចសហប្រតិបត្តិការួមគ្នា តែមួយ រវាងអង្គការអន្តរជាតិ​ធំៗ ​ចំនួន​១០ នៅក្នុងពិភពលោក ដែលធ្វើការផ្នែកសិទ្ធិមនុស្ស។ ពានរង្វាន់នេះ ដែលធ្វើឡើងជារៀង​រាល់​ឆ្នាំ តាំងពីឆ្នាំ១៩៩៣មកនោះ មាន​ទិស​ដៅ ដើម្បី​អះអាង​ជា​ថ្មី ពីកិច្ចការ​ប្រកប​ដោយ​ហនិភ័យ របស់ក្រុម​អ្នកធ្វើកិច្ចការ ដើម្បីវិស័យ​សិទ្ធិ​មនុស្ស ​នៅ​លើ​ពិភពលោក និង​ដើម្បី​ការពារ​ពួកគេ។ កាលពីឆ្នាំ២០១២ ព្រះសង្ឃ លួន សូវាត ក៏​បាន​ឈ្នះ​ពាន​រង្វាន់​ខាង​លើ​ដែរ។ អង្គការ​អន្តរជាតិ ទាំង១០នោះ ដែល​បាន​ចូលរួម ក្នុងការវិន្និច្ឆ័យ​ជ្រើសរើស អ្នក​ឈ្នះ​ពាន​រង្វាន់នេះ រួម​មាន៖

- Amnesty International
- Human Rights Watch
- Human Rights First
- FIDH – Fédération internationale des droits de l’homme
- Organisation mondiale contre la torture
- Front Line Defenders
- Commission internationale de juristes
- EWDE Germany
- Service international pour les droits de l’homme
- HURIDOCS​


Loading...

អត្ថបទទាក់ទង


មតិ-យោបល់