«សោកស្ដាយ» នេះ ជាឃ្លាបន្លឺឡើង យ៉ាងខ្លីរបស់លោក ម៉ម សូណង់ដូ ស្ថាបនិកវិទ្យុសំបុកឃ្មុំ ជាមួយនឹង​ការ​បង្ហោះ នៅលើគណនីហ្វេសប៊ុករបស់លោក នូវលិខិតក្រសួងព័ត៌មានមួយច្បាប់ ដែលបង្គាប់មកវិទ្យុលោក ឲ្យ​បញ្ឈប់​ការ​ផ្សាយ​ព័ត៌មាន​ឡើង​វិញ ពីវិទ្យុអាស៊ីសេរី (RFA) និងវិទ្យុសម្លេង​សហរដ្ឋ​អាមេរិក (VOA) ចាប់ពី​ថ្ងៃ​នេះ​ត​ទៅ។

លិខិតចេញថ្ងៃនេះ ដើម្បីបញ្ឈប់ថ្ងៃនេះ!

លិខិត ដែលចុះហត្ថលេខា ដោយលោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន ចុះថ្ងៃទី ៣ ខែកញ្ញានេះ បាន​ពន្យល់ ពីហេតុផល​ដែល​ក្រសួង​ហាម​មិនឲ្យ​វិទ្យសំបុកឃ្មុំ ១០៥ MHz ផ្សាយព័ត៌មាន របស់​វិទ្យុអាមេរិក ដែល​ផ្សាយ​ជា​ខេមរភាសា​​ទាំងពីរនេះ ដោយ​សារ​ក្រសួង​ ទើប​រក​ឃើញ​​ថា វិទ្យុអាស៊ីសេរី និងវិទ្យុសម្លេងសហរដ្ឋ​អាមេរិក ពុំទាន់បានចុះ​បញ្ជី​ ការិយាល័យតំណាង​ស្របច្បាប់​ នៅក្រសួង​ព័ត៌មាន។

លិខិតនោះ បានសរសេរព្រមានថា​ ប្រសិនបើ​វិទ្យសំបុកឃ្មុំ នៅតែបន្តផ្សាយ​ព័ត៌មាន ពីវិទ្យុទាំងពីរខាងលើ នោះ​ក្រសួង​នឹងដក​អាជ្ញា​ប័ណ្ណ​វិទ្យុ​នេះ ឲ្យ​បញ្ឈប់ការផ្សាយ​ជាស្ថាពរ។

នេះ ជាចំណាត់ការមួយទៀត បន្ថែមពីលើចំណាត់ការ ក្នុងពេលកន្លងមក ពីសំណាក់រដ្ឋាភិបាលកម្ពុជា ទៅលើ​ស្ថានីយវិទ្យុក្នុងស្រុកជាច្រើន ដែល​កន្លងមកបានជួលម៉ោង ទៅឲ្យវិទ្យុអាស៊ីសេរី និងវិទ្យុសម្លេង​សហរដ្ឋ​អាមេរិក។

បើទោះជារដ្ឋាភិបាល ការពារចំណាត់ការនេះ ថាជាការអនុវត្តន៍ច្បាប់ នោះ​ក៏ដោយ តែសម្រាប់​បណ្ដា​ស្ថាប័ន​ជាតិ និងអន្តរជាតិជាច្រើន ជាពិសេស​អង្គការ​សហប្រជាជាតិផង បានយល់ថា វាជាយុទ្ធនាការ របស់​រដ្ឋាភិបាល​​គណបក្សប្រជាជនកម្ពុជា ក្នុងការ​រឹតត្បិតសេរីភាព និងឈានទៅបំបាត់សម្លេង របស់​ប្រព័ន្ធ​ផ្សព្វ​ផ្សាយ​​ឯករាជ្យ នៅមុនការបោះឆ្នោតជាតិ ដែលនឹងឈានចូលមកដល់ នៅខែកក្កដា​ឆ្នាំខាងមុខ៕

» អានលិខិតបម្រាម របស់ក្រសួងព័ត៌មានដូចតទៅ៖