ការឃាត់-នាំខ្លួនអតីតឧត្ដមសេនីយ៍យោធា លោក ញឹក ប៊ុនឆៃ ដែលបានរងការចោទប្រកាន់ ពីគណបក្សប្រជាជនកម្ពុជា ថាបាន«ក្បត់សម្ព័ន្ធភាព» ទៅចូលរួមជាមួយគណបក្សប្រឆាំងនោះ ត្រូវបានធ្វើឡើង ក្នុងរសៀលថ្ងៃនេះ ក្រោមបទសង្ស័យ​នៅក្នុងសំនុំរឿងមួយ ដែលបានកើតឡើង តាំងពី១០ឆ្នាំមុន។ នេះ បើគេយោងតាមដីកាឲ្យនាំខ្លួន ចេញដោយលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ

ដីកាចុះថ្ងៃទី៣ ខែសីហា ឆ្នាំ២០១៧នេះ បានសរសេរបញ្ជា ឲ្យលោក ញឹក ប៊ុនឆៃ បង្ហាញខ្លួន​នៅ​ការិយាល័យ​ព្រហ្មទណ្ឌ​កម្រិតធ្ងន់ នៃស្នងការដ្ឋាននគរបាលរាជធានី «ដើម្បីសាកសួរពីដំណើររឿង សមគំនិត ពីបទផលិតគ្រឿងញៀនខុសច្បាប់ និង នាំចូលសរធាតុ​ផ្សំ​គ្រឿងញៀន ប្រព្រឹត្តនៅចំណុចភូមិ១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី១ ខែមេសា ឆ្នាំ២០០៧»។

បើតាមដីកាដដែលនោះ បានឲ្យដឹងទៀតថា សំណុំរឿងព្រហ្មទណ្ឌ ដែលទំនងជាជាប់ពាក់ព័ន្ធ នឹងលោក ញឹក ប៊ុនឆៃ ក៏ទើបត្រូវបានបង្កើតថ្មី នៅថ្ងៃទី១ ខែសីហានេះ​ប៉ុណ្ណោះ ខណៈដីកាបញ្ជូន របស់អយ្យការអមសាលាដំបូងរាជធានី ត្រូវបានធ្វើឡើង នៅថ្ងៃទី២ ខែសីហាម្សិលម៉ិញ។

សូមរំលឹកឡើងវិញថា កាលពីឆ្នាំ២០០៧ ក្រុមអាជ្ញាធរ បានចុះបង្ក្រាបទីតាំង ផលិតគ្រឿងញៀនមួយ ស្ថិតក្នុងឃុំ ត្រែងត្រយឹង ស្រុកភ្នំស្រួច ខេត្តកំពង់ស្ពឺ ត្រង់​ចំណុចគីឡូម៉ែត្រលេខ៨១-៨២។  ក្នុងការចុះបង្ក្រាបនោះ ជនជាតិថៃ១នាក់ ចិន១នាក់ និងខ្មែរពីរនាក់ ក្នុងមានឈ្មោះ ជា ជុង ដែលជាម្ចាស់ទីតាំងដី ទំហំ៥ហិចតាខាងលើ ត្រូវបានឃាត់ខ្លួន។

ទីប្រឹក្សាដ៏មានមន្ទិល...

សារព័ត៌មានក្នុងស្រុកមួយចំនួន ដែលស្និតនឹងរដ្ឋាភិបាល និងគណបក្សកាន់អំណាច បានអះអាងថា លោក ជា​ ជុង ធ្លាប់ជាទីប្រឹក្សារបស់លោក ញឹក ប៊ុនឆៃ។ សារព័ត៌មានមួយ បានរំលឹករឿងរ៉ាវនេះមកវិញថា នៅពេលនោះ ក្រុមសមត្ថកិច្ចប្រឆាំងគ្រឿងញៀនបានរកឃើញ វត្ថុធាតុដើមសំរាប់ផលិតគ្រឿងញៀនជាច្រើន ហើយគេ​ក៏បានឃើញ ​រថយន្តកាមរីពណ៌ស ដាក់ស៊ីរ៉ែន ពាក់ស្លាកលេខរដ្ឋ ដែលគេដឹងថា រថយន្តស៊ីរ៉ែន សំរាប់បើកនាំមុខក្បួនរថយន្ត របស់លោក ញឹក ប៊ុនឆៃ ចតនៅទីនោះដែរ។

ក្នុងខែមករា ឆ្នាំ​២០០៨ កន្លងទៅ លោក ជា ជុង ​ត្រូវបានសាលាដំបូងរាជធានី ប្រកាសសាលក្រមផ្តន្ទាទោស ឲ្យជាប់គុក ២៥​ឆ្នាំ និង​ផាកពិន័យ​ចំនួន ១​លាន​រៀល ស្មើនឹង ២៥០​ដុល្លារ​អាមេរិក។ លោក ជា ជុង និងជនសង្ស័យដទៃទៀត ត្រូវបានតុលាការរកឃើញ ថាពិតជាបាន​ផលិត​ និង​ជួញដូរ​គ្រឿងញៀន​ ចេញពីមូលដ្ឋានខាងលើ។​

បន្ទាប់មក នៅថ្ងៃទី១៣ ខែកក្កដា ឆ្នាំ២០១១ តុលាការកំពូល​បានប្រកាសតម្កល់​សាលក្រម របស់តុលាការជាន់ក្រោម​ទាំងពីរថ្នាក់ គឺសាលាឧទ្ធរណ៍ និងសាលាដំបូង ទុកជាបានការ ហើយលោក ជា ជុង និងមនុស្សដទៃទៀត បានជាប់ពន្ធនាគារ​ មកទល់នឹងថ្ងៃនេះ។ តែរាប់ចាប់តាំង ពីឆ្នាំ២០០៧ មកដល់ឆ្នាំ២០១១ គ្មានសារព័ត៌មានណាមួយ រាយការណ៍ឲ្យដឹងថា លោក ជា ជុង ជាទីប្រឹក្សា​របស់លោក ញឹក ប៊ុនឆៃ ទេ៕

» ដីការឲ្យបង្ហាញខ្លួនលោក ញឹក ប៊ុនឆៃ ចេញថ្ងៃនេះ ដោយលោក សៀង សុខ ព្រះរាជអាជ្ញារង៖