អាជ្ញាធរទទួលបន្ទុក អាកាសចរណ៍ស៊ីវិល របស់ប្រជុំកោះ «Seychelles»​ ហៅកាត់ថា «SCAA» បានអះអាងថា គឺក្រុមអ្នកស្រាវជ្រាវខាងសត្វស្លាប និងអណ្ដើកសមុទ្រ ជាអ្នករកឃើញបំណែកយន្ដហោះទាំងនោះ បានមុនគេ នៅលើឆ្នេររបស់កោះមួយ ឈ្មោះ «Faqhar» របស់ប្រជុំកោះ។

បើតាមអាជ្ញាធរ «SCAA» នេះដដែល បានពន្យល់ថា បំណែកយន្ដហោះទាំងនោះ មានសណ្ឋានចេញមកពីតួយន្ដហោះ ដែលគេបានរកឃើញបំណែកផ្សេងទៀត នៅលើកោះក្នុងតំបន់ (ភាគខាងលិច នៃមហាសមុទ្រឥណ្ឋា)។ បំណែកដែលទើបនឹងត្រូវបានរកឃើញ អាចជាគំរបម៉ាស៊ីនប្រតិកម្ម របស់យន្ដហោះ។

មន្ត្រី «SCAA» បានបញ្ជាក់បន្ថែមថា អាជ្ញាធររបស់ប្រទេសម៉ាឡេស៊ី កំពុងធ្វើការស្រាវជ្រាវបន្ថែម ពីលើបំណែកទាំងនេះហើយ។

» រាល់អត្ថបទ ដែលទាក់ទងនឹងការបាត់ខ្លួន របស់យន្ដហោះ «MH370»៖ ចុចលើទីនេះ

សូមរំលឹកជូនថា យន្ដហោះប៊ូអ៊ីង (Boeing 777) ដែល​​ភ្ជាប់​ជើង​ហោះហើរ «MH370» ពី​រដ្ឋធានីកូឡាឡំពួរ ប្រទេសម៉ាឡេស៊ី ឆ្ពោះ​ទៅ​កាន់រដ្ឋធានី ប៉េកាំង ប្រទេសចិន កាល​​ពី​ព្រឹក​ព្រហាមថ្ងៃទី៨ ខែមិនា​ ឆ្នាំ២០១៤ បានបាត់​ខ្លួនយ៉ាង​អាថ៌កំបាំង ជាមួយនឹងនឹងអ្នក​ដំណើរ និងបុគ្គលិកបម្រើការ ២៣៩​នាក់។ មក​ទល់​នឹង​ពេលនេះ ការរុករក​យន្ដហោះ​បាត់ខ្លួន នៅ​ក្នុង​មហា​សមុទ្រ​ឥណ្ឌា​ខាង​ត្បូង គ្មានទទួលបាន​​លទ្ធផល​ឡើយ ហើយការរុករុក ដែលដឹកនាំដោយប្រទេសអូស្ត្រាលី បានប្រកាសបញ្ឈប់ការរុករករបស់ខ្លួន កាលពីចុងខែមករា ឆ្នាំ២០១៧ កន្លងទៅ៕