ដីកាកោះដើមបណ្ដឹង របស់ព្រះរាជអាជ្ញារងនេះ បានធ្វើឡើងតែបីថ្ងៃប៉ុណ្ណោះ ក្រោយពាក្យបណ្ដឹង ដែលបានដាក់ចូល ទៅកាន់តុលាការ កាលពីថ្ងៃទី ២៦ ខែមិថុនា។ ក្នុងដីកាកោះនោះ ដែលត្រូវបាន​ផ្សព្វផ្សាយ​​ជាសាធារណៈ នៅព្រឹកថ្ងៃទី៣០ ខែមិថុនានេះ លោក សេង ហៀង ព្រះរាជអាជ្ញារង នៃអយ្យការអមសាលាដំបូង បានបង្គាប់ឲ្យដើមបណ្ដឹង កញ្ញា ធី សុវណ្ណថា ចូលខ្លួនមកបំភ្លឺ នៅវេលាម៉ោង ៩ព្រឹកថ្ងៃទី៩ ខែកក្កដាខាងមុខ ពីពាក្យបណ្ដឹងរបស់នាង ដែលបានដាក់ប្ដឹងលោក សាន្ដ ប៊ុនធឿន អ្នកសារព័ត៌មាន​លើបណ្ដាញសង្គម ពីបទ«ញុះញង់​ឲ្យប្រព្រឹត្ត​បទឧក្រិដ្ឋ​ជាអាទិ៍»។

កញ្ញា ធី សុវណ្ណថា បានសរសេរតបនឹងដីកាកោះនេះ នៅលើទំព័រហ្វេសប៊ុកថា៖ «សាន្ត ប៊ុនធឿន អើយ... ដីកាកោះ ចេញហើយ ! អ្វីដែលខ្ញុំអាចជួយបងបាន គឺដាក់ពាក្យសុំ "ឈប់ប្តឹង"។ តែបណ្តឹងអាជ្ញារបស់តុលាកា នៅតែបន្តដំណើរការ។ បើតុលាការសម្រេចឲ្យបងជាប់គុក ខ្ញុំនឹងប្រើសិទ្ធ ជាដើមបណ្តឹង សុំធានាបងឲ្យនៅក្រៅឃុំ... ។»

កាលពីម្សិលម៉ិញ យុវតីអ្នកគាំទ្រ​គណបក្ស​ប្រជាជន​កម្ពុជារូបនេះ បានប្រកាសយល់ព្រម ធ្វើការអាធ្យាស្រ័យ ឲ្យលោក សាន្ដ ប៊ុនធឿន បន្ទាប់ពីអ្នកសារព័ត៌មានរូបនេះ បានប្រកាសទទួលស្គាល់កំហុស តាមវីដេអូផ្សាយផ្ទាល់រាប់ម៉ោង នៅលើទំព័រហ្វេសប៊ុករបស់លោក 

ចំពោះសាធារណៈមតិវិញ បានប្រតិកម្មផ្សេងៗគ្នា ទាក់ទងនឹងពាក្យបណ្ដឹង របស់កញ្ញា ធី សុវណ្ណថា។ ក្រុមអ្នកគាំទ្រគណបក្សកាន់អំណាច ដូចកញ្ញា ធី សុវណ្ណថា បានយល់ស្របនឹងពាក្យបណ្ដឹងនេះ ថាត្រូវធ្វើឡើង ដើម្បីបង្ហាញពីការអនុវត្តន៍ច្បាប់ របស់នីតិរដ្ឋ ហើយពលរដ្ឋ ចាំបាច់ត្រូវគោរពច្បាប់។

តែសម្រាប់ក្រុម​អ្នកនិយមកណ្ដាល និងក្រុមដែលមិនចូលចិត្តកញ្ញា ធី សុវណ្ណថា បានបកស្រាយថា បើការអនុវត្តច្បាប់ និងការគោរពច្បាប់ មានលក្ខណៈស្មើភាពគ្នា សម្រាប់គ្រប់ពលរដ្ឋនោះ វាជាការប្រសើរណាស់។ ក្រុមនេះបានលើកឡើងថា ចំណាត់ការទៅលើបណ្ដឹង កញ្ញា ធី សុវណ្ណថា «ចៅតា» ដូចខាងលើនេះ ហាក់ដូចជាមានល្បឿន លឿនទៅមុខ ខណៈបណ្ដឹង​ដ៏ច្រើនផ្សេងទៀត ហាក់ដូចជានៅទ្រឹង ឬស្ថាត់ឈឹងតែម្ដង។

ក្រុមខ្លះទៀត ថែមទាំងបរិហារថា ស្ថាប័នតុលាការខ្មែរ កំពុងធ្វើខ្លួន ឲ្យក្លាយជា«បាយឡុកបាយឡ» សម្រាប់​ជន​អវិជ្ជា​ក្នុង​សម័យ​នេះ យកធ្វើ​ជាល្បែងកំសាន្ដ​ទៀត​ផង៕